Read Kalanga Zakhariya 9 Bible Online

Zakhariya 9 - Kalanga bible

Zakhariya 9

¹Dama Dama la Yahwe lobhayana ne shango ye Hadiraki lakatemelela kwazo ku Damasiko, ngobe mesho e bathu bose ne njudzi dze Iziraela Yahwe bakazwibiga zhisho,

²ne Hamati bo iyo yakashanganyila n'gathu nayo, ne mu Tire ne Sidoni nenguba dzina butjenjedu bukulu.

³Tire yakazwibakila matizhilo, ikazwikubunganyila siliva se nsetje bakakubunganya golide ikanga zwizhala nlota hwunde ye zila.

⁴Koga bonani, tetshi banowobatolela thundu yabo ngono bakalashila masimba abo ku gungwa, ngono unowopisiwa nge moto.

⁵Ashikeloni inowobona ikoko ngono inowotja kwazo. Gaza naiyobo inotshinda nge zogwadza Ekironi naiyo kugalabgwe kwayo kowopela. Gaza inowolashikigwa na mambo wayo ne Ashikeloni inowobe dongo.

⁶Bathu bakashangashangana lutshinga banowogala mu Ashidodi, ngono ndowopedza kuzwikudza kwe Bafilisitiya.

⁷Ndowodusa malopa abo mu milomo yabo ne zojiwa zwakatemapala mu meno abo, naibo banowobe malimbelimbe e Ndzimu wedu kakale bakabe ludzi mu Juda, ngono Ekironi inowonga Bajebusi.

⁸Koga ndowobakilila ng'umba yangu, kuti kushete unoyenda yenda muili. Akutowofa kwabe ne ntshambilidzi ungatshambilidza bathu bangu, ngoti ndobona nge mesho angu.

⁹Shatha kwazo iwe nkololokadzi we Ziyoni! Pembela kaa iwe nkololokadzi we Jerusalema! Bona mambo uwo unozha ku kuli, ana ndulamo ne jidzo, akatebama akatatha donki ili donkana.

¹⁰Ndowodusa koloyi dze ngwa mu Ifureimi ne mbizi dze ngwa mu Jerusalema ne misebe ye ngwa inowodusiwa. Unowoleba ngekwe kunyalala ku zwitjaba. Unowobusa kudwa ku gungwa kunoti gungwa, ne kudwa pa gwizi gwe Ifuratesi kunoti ku phelelo dze shango.

¹¹Koga nge kuko, ngekwe tjidumano tjangu nawe tjandakasisithila nge lopa, ndowosunungula basungwa bakatapiwa pasi pasi kwe shango.

¹²Bgwililani ku matizhilo enyu imwi basungwa batjina kugalabgwe na ngwenu kose nditjaleba nditi ndowokubgwilizila kwakakulashikila kungabe kabili.

¹³Ndowopeta Juda se dati langu, Ifureimi ili nsebe, ndowodzonga bakololo babo iwe Ziyoni, kuti bamukilane ne bakololo babo iwe Javani, akuthama ukanga thumo le mbhayani.

¹⁴Ipapo Yahwe banowozwilakidza mubali, misebe yabo inowopubulila se lupenyo gwe vula. She Yahwe banowolidza lunyanga, banowokabula bali mu dutu le burwa,

¹⁵Yahwe Masimbawose banowobabakilila, ngono banowolobesa bakakunda nge zwivirimabgwe, banowong'wa malopa abo se nkumbi, bakagutshika se ikutili tjinoshingisiwa kubigilidza malopa e tjibhayilo bakakapa se nyanga dze tjibeso tjinopisigwa zwibhayilo.

¹⁶Yahwe Ndzimu banowobatjidza mu zhuba ilelo, se bali ngubi dze bathu babo. Banowopenya mu shango, se ndalama dze tjiala.

¹⁷Kowobe kuli kubuya kwakanaka seni! Bazhuzha banowomonyoka nge mathunde baanadi nge nkumbi ntshwa we zhambi!