Read Kalanga Malaki 2 Bible Online

Malaki 2 - Kalanga bible

Malaki 2

¹“Ngwenu nlayo iwoyu wakalingisana namwi imwi bapirisiti.

²Ha musingawo hwilila, ha musingawo musa moyo kukudza zina langu, ndowomulonga bhiso abuya alonga bhiso mu makombolelo enyu, nge malebeswa ndaalonga bhiso kale nge kuti amutotongokumusila moyo. Koleba Yahwe Masimbawose.

³Bonani, ndowotjemela bana benyu amuzhodza nswane mu njiso, ndowomuzhodza nswane we zwibhayilo zwenyu ngono ndowomudusa pandilipo.

⁴“Ndizo mowoziba kuti ndatumila nlayo iwoyu kumuli kuyita kuti tjidumano tjangu na Levi tjidwilile. Koleba Yahwe Masimbawose.

⁵Tjidumano tjangu naye tjakabe tjili tjidumano tje butjilo ne mbakiso, ndakampa izo kuti atete, ngono wakanditeta ngono kakudza zina langu.

⁶Wakabe ediya malebeswa koga, akuna tjisilebeswa tjakadwa mu nlomo uwe. Wakabe etjila nami mu malebeswa akatambunuka ngono kashandula banji kudwa mu matjinyo.

⁷Ngoti milomo ye mpirisiti yakafanila kubakilila zibo, ne bathu bakafanila kushaka kudiyiwa nge nlomo uwe ngoti ntumwa wa Yahwe Masimbawose.

⁸Koga makapambuka mu zila, makathama banjinji nge kudiya kwenyu kuti batjinye, makatjinya tjidumano tja Levi. Koleba Yahwe Masimbawose.

⁹Ndizo wali ndothama kuti ulengudzike usibe tjimwe mbeli kwe bathu bose se usakalondolodza zila dzangu koga wakabe usiyilila mu kudiya kuko.

¹⁰“Apa tose atina tate bang'ompela kene? Apa atizobumbiwa nge Ndzimu nng'ompela kene? Ini tilengudza tjidumano tja botate bedu nge kusagalana moyo kene?

¹¹Juda aazogalika moyo, tjimwe tjinoshimisa tjakashingikala mu Iziraela ne mu Jerusalema. Juda wakalengudza bugalo gwakayengemala gwa Yahwe igo gwabanoda, ngolobola nkololokadzi we ndzimu upoga.

¹²Yahwe ngabaduse mmwe ne mmwe unothama ikoku mu mishasha ya Jakubo una butendeki ngekwako nenguba edusila Yahwe Masimbawose tjibhayilo.

¹³“Tjimwe etji naitjobo tjamunoshinga. Mozhadza tjibeso tjinopisigwa zwibhayilo tja Yahwe nge mishodzi mulila mububula ngoti basingayitile hanya zwibhayilo zwenyu kene kuli kuzwiamutjila nge kushatha mu maboko enyu.

¹⁴Mobhuzwa muti, ‘Kanti ini basingaamutjile?’ Hwuti Yahwe bakabe ntendeki pakati kuko ne nkadzi uwo we buzhuzha gugo wawusakagalika moyo kunli nenguba ali nkwinya uwo ali nkadzi uwo nge tjidumano.

¹⁵Apa Ndzimu iwozwawo ate iwo wakababumba kube tjing'ompela kene? Nyama kose ne meya nge kwawo. Ndzimu iwoyu tjaunoda ini? Unoda bana bana Ndzimu mubali. Ndizo muzwibhate muthame kuti mmwe ne mmwe aletje kusagalika moyo ku nkadzi we buzhuzha gugwe.

¹⁶Ngoti Yahwe Ndzimu we Iziraela bakati, ‘Ndoshima kukolomoka kwe ndobolo, ndoshima ne nthu unosumbika phipiti nge tjiambalo. Koleba Yahwe Masimbawose. Ndizo wali muzwiyele njele musibe basingagalike moyo.’

¹⁷“Manyadza Yahwe nge matama enyu. Koga mobhuzwa muti, ‘Tabanyadza tjini?’ Mabanyadza ngoleba muti, ‘Bose banoshinga mbipo bakalulwama mu mesho a Yahwe, naiko banobashathila.’ Monyadza nge kubhuzwa muti, ‘Ungayi Ndzimu we kutambunuka?’ ”