Read Kalanga Malaki 3 Bible Online

Malaki 3 - Kalanga bible

Malaki 3

¹“Bonani, ndotuma ntumwa wangu kululwamisa zila mbeli kwangu, ngono She wamunoshaka unowozha tjinyolotjo ku Ng'umba iye. Ntumwa we tjidumano wamunoshathila, tjoselele unozha. Koleba Yahwe Masimbawose.

²“Koga ndiani kene ungamilana ne zhuba le kuzha kukwe? Ndiani ungama ha embona ezha kene? Ngoti iye unofanana ne moto we vutho, unofanana ne isipa tje nsuki.

³Unowogala pasi se nsuki ne ntjenesi we siliva ngono unowotjenesa bana ba Levi kabasuka se golide ne siliva kuswikila bezhisa zwibhayilo kuna Yahwe nge ndulamo.

⁴Ndiko tjibhayilo tje Juda ne Jerusalema tjowoshathisa Yahwe se mu mazhuba a ntolo nemu makole akapinda.

⁵“Ipapo ndowosedzela pejo namwi kusumikilisa, ndowolibilidza kupa butendeki kunyanyayidzana ne baloyi ne phombgwe ne banotuna manyepkhwa ne banotjebela bashingi mu mibhayilo yabo, betshambilidza tjilikadzi ne siyang'wa, beshalawula bataya, ngono basinganditje. Koleba Yahwe Masimbawose.

⁶“Ngoti imi Yahwe anditoshanduka, ndizo wali imwi bana ba Jakubo musakaloba.

⁷Kudwila tjose mu mazhuba a bobatategulu benyu makapambuka mu milayo yangu, amuzoyilondolodza. Shandukilani kundili, namibo ndowoshandukila kumuli. Koleba Yahwe Masimbawose. Koga imwi moti, ‘Tingashanduka tjini?’

⁸“Apa nthu ungatolela Ndzimu kene? Koga imwi monditolela. Koga mobhuzwa muti, ‘Tomutolela tjini?’ Muna zwe bugumi ne zwipo.

⁹Makalongwa bhiso ngoti ludzi gwenyu mose monditolela.

¹⁰Zhisani tjebugumi tjizhele mu dula kuti ndizo kube ne zojiwa mu ng'umba yangu, ngojalo mundilike mubone kene ndisingo womuzhulila mafesitere e kudzimu amutebulila makombolelo manjinji amunowosheta ne pamungaabiganya. Koleba Yahwe Masimbawose.

¹¹Ndowotjemela phashu kuti dzisije zwidzwalo zwenyu ne mizhambi yenyu mu minda inowozwala. Koleba Yahwe Masimbawose.

¹²Ipapo njudzi dzose dzowomudana bakakombolegwa ngoti shango yenyu inowobe shango yakashatha. Koleba Yahwe Masimbawose.

¹³“Makaleba matama akabangalala nge kwangu. Koleba Yahwe. Koga imwi moti, ‘Takalebani tjakabangalala nge kwenyu?’

¹⁴Makati, ‘Madatha koga kushingila Ndzimu. Tobuyigwa ngeni ngolondolodza nlayo wawo kene ne kuyenda se balili mbeli kwa Yahwe Masimbawose?

¹⁵Totola banozwikudza kuti bakakombolegwa, bashingi be mbipo abatowatshika koga ne banolika Ndzimu banosiya.’ ”

¹⁶Ipapo ibabo banotja Yahwe bakalangana ngono Yahwe bakateedza bakabahwa. Ndizo lukwalo gwe ikumbuludzo gukakwagwa mbeli kwabo ngekwa ibabo banotja Yahwe kakale bekumbula ngekwe zina labo.

¹⁷“Banowobe bangu. Koleba Yahwe Masimbawose. Banowobe bashalugwa bangu mu zhuba landinowobe nditola thambo, ngono ndowobatjidza se nlume etjidza nkololo uwe unonshingila.

¹⁸Ipapo mowobona kakale kuthubukana pakati kwe balulwami ne babi, pakati kwe unoshingila Ndzimu ne usingaushingile.”