Read Kalanga Malaki 4 Bible Online

Malaki 4 - Kalanga bible

Malaki 4

¹“Bonani, nge malebeswa zhuba laswika linopisa se bhuba le moto, panowoti bose banozwikudza ne bashingi be mbipo bakabe nlota. Zhuba ilelo linozha lowobapisa. Koleba Yahwe Masimbawose. Akuna tjimwe tjabo tjalinowobasiyila.

²Koga imwi munoteta zina langu zhuba le ndulamo lowomubhudila lina kupodza mu mapapilo alo. Mowobhuda mutamba se phulu dzidwa mu danga.

³Ngono mowotshamba babi ngoti banowobe nlota kusi kwe makumbo enyu mu zhuba landinowotola thambo. Koleba Yahwe Masimbawose.

⁴“Kumbulani nlayo we nlanda wangu Mushe, milayo yandakampa ku Horebu kube ye Baiziraela bose.

⁵“Bonani ndowotuma Nlebesambeli Elija kumuli zhuba gulu lakabangalala la Yahwe lisathu likazha.

⁶Unowoshandulila mimoyo ye bazwadzi ku bana babo ne mimoyo ye bana ku bazwadzi babo akusajalo ndowozha aloba shango nge bhiso.”