Read Kalanga Matewu 1 Bible Online

Matewu 1 - Kalanga bible

Matewu 1

¹Ogu lukwalo ngekwe ludzi gwa Jesu Kirisiti nkololo wa Dafite, Dafite iye ali nkololo wa Abhurahama:

²Abhurahama wakazwala Isaki, Isaki kazwala Jakubo, Jakubo kazwala Juda ne banung'una babe.

³Juda kazwala Perezi na Zera, mme babo bali Tama, Perezi kazwala Hezironi, Hezironi kazwala Aramu.

⁴Aramu kazwala Aminadabhu, Aminadabhu kazwala Nashoni, Nashoni kazwala Salimoni.

⁵Salimoni kazwala Bhoazi mmeyabe bali Rahabu, Bhoazi kazwala Obhedi mmeyabe bali Ruti; Obhedi kazwala Jesi.

⁶Jesi kazwala Dafite She. Dafite ne nkadzi wa Uriya bakazwala Solomoni.

⁷Solomoni kazwala Rehobhoamu, Rehobhoamu kazwala Abhija, Abhija kazwala Asafi.

⁸Asafi kazwala Jehoshafati, Jehoshafati kazwala Joramu, Joramu kazwala Uziya,

⁹Uziya kazwala Jotamu, Jotamu kazwala Ahazi, Ahazi kazwala Hezekiya.

¹⁰Hezekiya kazwala Manase, Manase kazwala Amoni, Amoni kazwala Josiya,

¹¹Josiya kazwala Jekoniya ne banung'una babe be tjilume nge tjibaka tje kutapigwa ku Bhabhiloni.

¹²Shule kwe kutapigwa ku Bhabhiloni, Jekoniya kazwala Sheyalitiyele, Sheyalitiyele kazwala Zerubhabeli.

¹³Zerubhabeli kazwala Abhiudi, Abhiudi kazwala Eliyakimu, Eliyakimu kazwala Azori.

¹⁴Azori kazwala Zadoki, Zadoki kazwala Akimu, Akimu kazwala Eliudi.

¹⁵Eliudi kazwala Eleaza, Eleaza kazwala Matani, Matani kazwala Jakubo.

¹⁶Jakubo kazwala Josefa nlume wa Mariya iye kazwala Jesu unoyi Mesiya.

¹⁷Ndizo kwakabe ne zwizekugwana zwili gumi lina zwinna kudwa kuna Abhurahama kunoti kuna Dafite ne zwizekugwana zwili gumi lina zwinna kudwa muna Dafite kunoti mu tjibaka tjekutapigwa ku Bhabhiloni ne zwizekugwana zwili gumi lina zwinna kudwa mu kutapigwa ku Bhabhiloni kunoti tjibaka tjakazwagwa Mesiya.

¹⁸Kuzwagwa kwa Jesu Kirisiti kwakazha sahwoku: Mmeyabe Mariya bakabe bakabigilidzigwa kulobogwa ndi Josefa, ngono bakati basathu bakawalilana Mariya kaboneka atjizwisenga nge Meya yakayengemala.

¹⁹Josefa nlume uwe wakabe ali nthu wakalulwama kakale asingashake kumbhatisa shoni, ngono kakumbula kunlamba nge zila yakasumbikala.

²⁰Koga kwakati atjakumbula ikoku, ntumwa wa She kaboneka kunli mu hwope eti, “Josefa nkololo wa Dafite, usitje kukotosa Mariya nkadzi uwo, ngobe tjaakazwisenga nge tje Meya yakayengemala.

²¹Unowowana mwana we tjilisana, ngono unowontumila zina uti Jesu, ngobe unowotjidza bathu babe mu matjinyo abo.”

²²Kose ikoku kwakashingikala kuti matama a She akalebgwa nge nlebesambeli asiwile pasi. Nlebesambeli wakabe aleba eti,

²³“Mwanadi unowozwisenga kawana mwana we tjilisana ngono banowondana Imanuwele.” Kudwa kuti, “Ndzimu Unaswi.”

²⁴Ndizo Josefa kati emuka mu hwope kashinga tjaabudziwa nge ntumwa wa She ngono kakotosa nkadzi uwe.

²⁵Koga kasiwalilane naye kudzina atshibama mwana we tjilisana, ngono kantumila zina eti Jesu.