Read Kalanga Matewu 11 Bible Online

Matewu 11 - Kalanga bible

Matewu 11

¹Kwakati Jesu apedza kulaya badiyiwa babe bali gumi lina babili, kudwa ipapo kayenda kunodiya ne kunosumikila mu mizi yabo.

²Johani kati ali mu ng'umba ye busungwa kahwa ngekwe mishingo ya Kirisiti katuma badiyiwa babe

³kunombhuzwa beti, “Apa ndiwe wakafanila kuzha kene tilindile mmwe?”

⁴Jesu kadabila eti, “Yendani munobikila Johani tjamunohwa nenge tjamunobona.

⁵Mapofu anopofunuka, zwilema zoyenda, banogwala mapele banopodziwa, mabhubuzebe anohwa, bafi banomusiwa ne ndebo mbuya inosumikigwa ku bashayi.

⁶Wakakombolegwa iye usingakuthike nge kwangu.”

⁷Kukati badiyiwa ba Johani boyenda Jesu katangisa kulebeleka ne mbunga we bathu ngekwa Johani ebhuzwa eti, “Ini tjamakayendila kunobona ku tjilambanyika? Apa makabe munobona lushanga guzunguziwa nge phepo kene?

⁸Akusakajalo makabe manobonani ngono? Makabe manobona nthu wakaambala zwiambalo zwakanaka kene? Bonani, ibabo bakaambala zwiambalo zwakanaka bamu ng'umba dza boshe.

⁹Makabe manobonani ngono? Kunobona nlebesambeli kene? Ee, ndomubudza tjose, na iko makabona nkulu kupinda nlebesambeli.

¹⁰Oyu ndiye wakakwagwa nge kukwe kuyi, ‘Ndowotuma ntumwa wangu mbeli kuko iye unowolulwamisa zila iyo mbeli kuko.’

¹¹Ndolebesa ndoti kumuli, pakati kwabo bakazwagwa nge bakadzi akuna wakaleliwa nkulu pana Johani we N'dubiki; nenguba iye ntukunu tjose mu bushe gwe kudzimu ali nkulu panli.

¹²Kudwa mu mazhuba a Johani we N'dubiki kudzina kube ngwenu, bushe gwe kudzimu gongingwa nge masimba, ne bana masimba banogutola nge masimba.

¹³Hwalo dze balebesambeli bose ne nlayo dzakalebesambeli kuswikila Johani ezha.

¹⁴Ndizo ha kuli kuti moda kuamutjila, ndiye Elija wakabe ewozha.

¹⁵Iye una zebe dze kuhwa, ngaahwe.

¹⁶“Bathu bangwenu ndingabafanidzanya ngeni kene? Banonga bana bali gele pa thanga bedana babanozana nabo beti,

¹⁷‘Tamulidzila nyele mukasizane, tikamba lumbo gwe tjililo koga mukasilile.’

¹⁸Johani wakazha asingaje kakale asingang'we, ngono bakati, ‘Una meya mbi.’

¹⁹Nkololo we Nthu wakazha eja kakale eng'wa, ngono bakati, ‘Bonani, eli govu le tjidakwa ne nzwalani we bakhethisi ne batjinyi.’ Koga butjenjedu golakidziwa kuti gu malebeswa nge mishingo yago.”

²⁰Ipapo Jesu katangisa kasola mizi yaakati muili kashinga bunji gwe matjenamiso awe, ngobe basakashanduka mu matjinyo abo.

²¹“Yee mme wee! Wapalala iwe Korazini! Yee mme wee! Wapalala iwe Bhetisaida! Ha matjenamiso akashingwa mu muli ha akabe ashingwa mu mizi ye Tire ne Sidoni bathu bako banobe bakashandukila ku Ndzimu ntolo, bakaambala masaka bali gele mu nlota.

²²Koga ndomudwa nditi mu zhuba le sumikiliso, sumikiliso inobendelu mu bathu be Tire ne Sidoni pana yenyu.

²³Nawe nzi we Kapenaume, apa unowomilidzigwa kudzimu kene? Aa, unowodelusigwa pasi, ku bugalo gwe bafi. Ha matjenamiso akashingwa mukuli akabe ashingwa mu Sodoma, nzi iwoyu unobe uli yapo na nasi.

²⁴Koga ndomudwa nditi, mu zhuba le sumikiliso, sumikiliso inowobendelu mu bathu be Sodoma pamuli mu zhuba le kusumikilisiwa.”

²⁵Nge tjibaka itjetjo Jesu kati, “Ndomuboka Tate, She we Kudzimu ne shango, ngobe makasumbikila zwithu izwezwi batjenjedu ne bakadiyika, koga mukazwizumbunulila basakadiyika.

²⁶Ee, Tate, ngobe oku kwakabe kumushathisa.

²⁷“Zwithu zose zwakapiwa imi ndi Tate bangu. Akuna unoziba Nkololo kuzhe kwa Tate, kakale akuna unoziba Tate kuzhe kwe Nkololo na ibabo Nkololo baanoshaka iye kubabudza kuti na ibo babazibebo.

²⁸“Izhani kundili imwi makanyala kakale munolemegwa, ndowomunyalulusa.

²⁹Muzwitilike jokwi[4] langu muzwidiye mundili, ngobe ndina moyo nnyolo ne kuzwiyisa pasi ngono mowozwiwanila kunyaluluka.

³⁰Ngobe jokwi langu lilelu ne ntolo wangu nlelu.”