Read Kalanga Matewu 12 Bible Online

Matewu 12 - Kalanga bible

Matewu 12

¹Mu tjibaka itjetjo Jesu kapalama minda mu zhuba le Sabata. Badiyiwa babe bakabe bana zhala ndizo bakatangisa kumwaula zwiyako mu nnda kuti baje.

²Bafarasi bakati bebona ikoku bakati kunli, “Bona! Badiyiwa babo banothama tjisimu nlayo nge zhuba le Sabata.”

³Kati ku bali, “Amuzobala kuti Dafite ne baakabe anabo bakati bakathamani bana zhala kene?

⁴Wakangina mu Ng'umba ye Ndzimu, ngono iye ne baakabe anabo bakaja zwiwunga zwinopiwa Ndzimu, koga nge nlayo zwakabe zwili zwiwunga zwe bapirisiti koga.

⁵Amuzobala mu nlayo kuti mu zhuba le Sabata bapirisiti banoshinga mu Ng'umba ye Ndzimu banotjuluka nlayo we zhuba le Sabata, koga bakabe basina nlandu kene?

⁶Ndomubudza kuti iye nkulu pa Ng'umba ye Ndzimu upano.

⁷Ha mabe makaziba kuti matama iyawa anodwani anoti, ‘Ndoshaka mahwilo zogwadza, kusi tjibhayilo,’ mobe musakabona nlandu basina nlandu.

⁸Ngobe Nkololo we Nthu ndi She we Sabata.”

⁹Wakayendila mbeli kudwa ipapo, ngono kangina mu ng'umba yabo ye mitembezelo.

¹⁰Ipapo kwakabe kuna nlume una luboko gwakashweshwana. Kwakabe kuna bathu bakabe beshaka tjimwe tjabangabona Jesu nlandu nditjo, ngono bakabhuzwa Jesu bakati, “Apa kumu nlayo kupodza nge zhuba le Sabata kene?”

¹¹Kati ku bali, “Apa ndiupi wenyu ungati ana pkhwizi ing'ompela yawila mu gomba nge Sabata, kasiyiduse kene?

¹²Ngono nthu iye unopinda pkhwizi kungapani kene! Ndizo kumu nlayo kuyita ndulamo nge zhuba le Sabata.”

¹³Ipapo kati ku nlume iwoyo, “Tambunudza luboko gugo.” Ndizo nlume iwoyo kagutambunudza gukapola tjose gukafanana ne gumwe.

¹⁴Koga Bafarasi bakabhuda bakanolangana sekwa bangabulaya Jesu.

¹⁵Jesu wakabe abona tjabanoshaka thama ngono, kabhuda mu magalo iyawo. Banjinji bakantobela, ngono kabapodza bose,

¹⁶kakowomedza kuti bashaye wababudza kuti ndiye ani.

¹⁷Oku kwakabe kuli kuti kushingikale matama akalebgwa nge nlebesambeli Isaya eti,

¹⁸“Hwoyu nlanda wangu wandakashalula, iye wandinoda, wandinoshatha munli. Ndowodelusila Meya yangu munli, ngono unowozibisa nge kwe ndulamo muna Bezwitjaba.

¹⁹Aatokakabadzana ne nthu kene kulonga zhoba, akuna unowohwa hwi lile mu dzizila.

²⁰Lushanga gwakakombama aatoguvuna, ne luvone gunothungayila aatowogudzima, kudzina etungamilila ndulamo mu kukunda.

²¹Bezwitjaba banowogalabgwe munli.”

²²Ipapo bakazhisa kunli nlume wakabe akasungwa nge meya mbi ali bhofu kakale ali mbebebe, ngono Jesu kampodza, ndizo kalebeleka kakale kabona.

²³Bathu bose bakatjenama kwazo bakati, “Apa ungabe ali Nkololo wa Dafite iwoyu kene?”

²⁴Ngono Bafarasi bakati behwa ikoku bakati, “Nlume iwoyu unotata meya mibi ndi Bheelizebhuli koga, iye she we meya mibi.”

²⁵Jesu ngekuziba mikumbulo yabo kati ku bali, “Bushe gumwe ne gumwe gwakazwithubukanya gowokolomoka, kakale akuna nzi kene nsha wakazwithubukanya inowobakika.

²⁶Satani ha etata Satani, wakathubukana nge kukwe, bushe gugwe gungasima tjini kene?

²⁷Ngono ha kuli kuti ndodusa meya mibi na Bheelizebhuli, bakololo benyu ibo banoidusa nayani? Ndizoke, banowobe basumikilisi benyu.

²⁸Koga ha kuli kuti ndodusa meya mibi nge Meya ye Ndzimu, ipapo bushe gwe Ndzimu gwatjiswika mu muli.

²⁹“Kene, apa nthu ungangina mu ng'umba ye nlume wakasima tjini katapa thundu iye asasunga iwoyo nlume wakasima kutanga? Ipapo ekotapa ng'umba iye.

³⁰“Iye usimile nami unonyanyayidzana nami, na iye usingakubunganye nami, unopaladza.

³¹Ndizo ndomubudza nditi, jinyo limwe ne limwe ne kutuka Ndzimu kwe bathu kowozwiibhatigwa, koga kutuka Meya yakayengemala aatokuzwiibhatigwa.

³²Iye unonyanyayidza Nkololo we Nthu, unowozwiibhatigwa, koga iye unonyanyayidza Meya yakayengemala aatowozwiibhatigwa, mu misi iyeyo kene mu misi inozha.

³³“Itani kuti nti ululwame, ngono zwizwalo zwawo zowolulwamabo, kene itani nti kuti ubipe zwizwalo zwawo zwobipabo, ngobe nti unozibgwa nge zwizwalo zwawo.

³⁴Bana be nyoka ndimwi! Mungati muli babi mukaleba tjakalulwama tjini? Nlomo unoleba tjizhele mu moyo.

³⁵Nthu wakalulwama unodusa bubuya mu fumwa iye yakanaka ne nthu wakabipa unodusa bubi mu fumwa iye yakabipa.

³⁶“Koga ndomubudza nditi, bathu banowobe ne kuzwidabiligwa mu zhuba le kusumikilisiwa mu dama limwe ne limwe le butjapa labakaleba.

³⁷Ngobe mowolulwamisiwa nge matama enyu kakale mukabong'wa nlandu nge matama enyu.”

³⁸Ipapo bamwe be Bafarasi ne badiyi be nlayo bakati kunli, “N'diyi, toshaka kubona tjilakidzo tjinodwa kumuli.”

³⁹Jesu kabadabila kati, “Bathu ndimwi bangwenu babiibi kakale musingagagwebgwe nge Ndzimu moshaka tjilakidzo, ngono akuna tjilakidzo tjamunowopiwa kuzhe kwe tjilakidzo tje nlebesambeli Jona.

⁴⁰Koga sa Jona akabe mu ntumbu we hwobe hwulu mazhuba matatu ne masiku matatu, sa ikoko Nkololo we Nthu unowobe mu ikumbu mazhuba matatu ne masiku matatu.

⁴¹Balume be Ninive banowomuka ne bathu ibaba bangwenu mu nsi we kusumikilisiwa, bakababona nlandu, ngobe ibo bakashandukila matjinyo abo pa kusumikila kwa Jona, ngono ngwenu bonani, iye nkulu pana Jona upano.

⁴²Nfumakadzi we burwa unowoma ne bathu ibaba bangwenu mu zhuba le kusumikilisiwa, ngono kababona nlandu, ngobe wakazha edwa ku phelelo dze shango kuwohwilila butjenjedu gwa Solomoni, ngono bonani, iye nkulu pana Solomoni upano.

⁴³“Ha meya mbi ibhuda mu nthu, inopinda mu magalo akawoma ishaka kunyaluluka, koga isingakuwane.

⁴⁴Ipapo unoti, ‘Ndowobgwilila ku ng'umba yangu yandakadwa muili.’ Ha iswika, inowana ng'umba iyeyo isina mmwe umuili, yakatshwayigwa, kakale yakabiganyika.

⁴⁵Ipapo inowoyenda ikanotola meya mimwe ili kutendeka mibi kuupinda, ngono ibe ingina igala mukati. Ngono tjimo tje nthu iwoyo tje bupelo tjokobipa kupinda tje kutanga. Ndiko sekwa kunowobe iko nge bathu bangwenu bakabipa.”

⁴⁶Jesu kati atjalebeleka ne bathu, mmeyabe ne banung'una babe bakama kuzhe, bekumbila lebeleka naye.

⁴⁷Mmwe kabudza Jesu kati, “Mmeyabo ne banung'una babo bamile pazhe banokumbila lebeleka nawe.”

⁴⁸Kadabila nlume wambudza kati, “Mmeyangu ndiani ne banung'una bangu ndiboani?”

⁴⁹Katendeka badiyiwa babe ngono kati, “Aba ndibo mmeyangu ne banung'una bangu.

⁵⁰Iye unoshinga kuda kwa Tate bangu ba kudzimu ndiye nnung'una wangu ne hazwadzi yangu na mmeyangu.”