Read Kalanga Matewu 13 Bible Online

Matewu 13 - Kalanga bible

Matewu 13

¹Mu zhuba ilelo zwalo Jesu wakabhuda mu ng'umba kanogala pa gungwa.

²Mibunga ye bathu ikankubunganila, kadzina kangina mu n'goro kagala muuli, bathu bose bali mile mu phili ye gungwa.

³Ipapo wakababudza zwithu zwinjinji nge zwifaniso eti, “Ndzwali wakabhuda enodzwala.

⁴Ngono kati edzwala, imwe mbewu ikawila mu zijana, ngono nyuni dzikazha dzikaija.

⁵Imwe ikawila mu lushale, ngono ikashaya mavu akalizanila. Yakatjimbidza kumela, ngobe kwakabe kusina mavu manjinji akaivukidza.

⁶Koga kukati zhuba libhuda, mmela ukatshwa ngono ukawoma, ngobe usina midzi.

⁷Imwe mbewu ikawila pakati kwe mihwa, ngono mihwa ukakula ukadzipa mmela.

⁸Kakale imwe mbewu ikawila mu mavu mabuya ikazwala zwizwalo zwinopinda zwakadzwagwa ka zana (100), imwe kuli makumi matathatu (60), imwe kuli makumi matatu (30).

⁹Iye una zebe, ngaahwe.”

¹⁰Badiyiwa babe bakazha kunli bakambhuzwa beti, “Ini ulebeleka ne bathu ibaba nge zwifaniso kene?”

¹¹Kabashandula eti, “Zibo ye masazibgwe e bushe gwe kudzimu yakapiwa imwi koga ibo abazoipiwa.

¹²Iye unohwa unowopiwa kuhwisisa, ndizo unowohwisisa nge buzhalo, koga iye usingahwe ne tjitukununu tjaanohwisisa unowotjitolegwa.

¹³Ndizo ndilebeleka nabo nge zwifaniso, ngobe ne bakalinga abatobona ne bakahwilila abatohwa kakale abatohwisisa.

¹⁴Nge kwabo, kowoshingikala tjakalebgwa nge nlebesambeli Isaya eti, “ ‘Nge malebeswa mowohwa koga musingahwisise; nge malebeswa mowobona koga musingabonesese,

¹⁵ngobe mimoyo ye bathu ibaba yakakukutala, ne zebe dzabo dzolema kuhwa, kakale bakazwimba mesho abo. Ha babe bangabona nge mesho abo, bakahwa nge zebe dzabo, bakahwisisa nge mimoyo yabo, bakashandukila kundili, ndabe ndingabapodza.’

¹⁶“Akakombolegwa mesho enyu, ngobe anobona ne zebe dzenyu dzakakombolegwa ngobe dzohwa.

¹⁷Ndolebesa ndoti, balebesambeli banjinji ne balulwami, bakayemula kubona tjamunobona koga bakasitjibone ne kuhwa tjamunohwa koga bakasitjihwe.

¹⁸“Tjihwililani kuti tjifaniso tje ndzwali tjodwani.

¹⁹Ha mmwe ehwa dama le bushe asingalihwisise, mbi unozha kadzamula tjadzwagwa mu moyo uwe. Eyi ndiyo mbewu yakadzwagwa mu zijana.

²⁰Yakadzwagwa mu lushale imilile nthu unohwa dama kaliamutjila tjinyolotjo nge kushatha.

²¹Koga se asina midzi, unolibhata tjibaka tjifupi koga. Kudziyila ne kuhwisiwa zogwadza ngekwe dama koti kuzha, katjimbidza awa mu kugalamoyo.

²²Yakadzwagwa pakati kwe mihwa imilile nthu unohwa dama ngono kudziyidzika nge zwe butjilo igogu kose nenge butjengedzi gwe fumwa zwikalidzipa, kukayita kuti lishaye zwizwalo.

²³Koga yakadzwagwa mu mavu mabuya imilile nthu unohwa dama kalihwisisa. Unodusa zwizwalo zwinopinda zwakadzwagwa kuli zana (100), nge tjimwe tjibaka kuli makumi matathatu (60), ngono tjimwe tjibaka kuli makumi matatu (30).”

²⁴Jesu kababudza tjimwe tjifaniso eti, “Bushe gwe kudzimu gungafanidzanyiwa ne nthu wakadzwala mbewu mbuyanana mu nnda uwe;

²⁵koga kukati bathu bakayizela, tjita tjitje tjikazha tjikadzwala gotsha pakati kwe mathunde, ngono tjibe tjiyenda.

²⁶Kukati mathunde ekula edusa zwizwalo, gotsha na ilo likabhuda.

²⁷Balanda be mweni we nnda bakazha kunli bakati, ‘Tetshi, apa amuzobe madzwala mbewu mbuyanana mu nnda wenyu kene? Ini nnda una makotsha?’

²⁸Kati ku bali, ‘Kuna tjita tjakathama ikoku.’ Balanda bakambhuzwa bakati, ‘Apa moshaka kuti tiyende tinolisimula kene?’

²⁹Kashandula eti, ‘Aa, ngobe mowoti musimula makotsha, mukadwa musimulilanya ne mathunde.

³⁰Letjani kukule kose kuswikila nsi we kuvuna. Nge nsi iwoyo ndowobudza bavuni nditi, Kutanga kubunganyani makotsha muasunge nge zwishwa kuti apisiwe, kudwapo mu kubunganye mathunde mualonge mu dula langu.’ ”

³¹Kababudza tjifaniso tjimwe eti, “Bushe gwe kudzimu gofanana ne shanga tukununu ye lusaba, yakati nthu kaitola kaidzwala mu nnda uwe.

³²Ndiyo mbewu tukununu tjose mu mbewu dzose, koga ha ikula ndiyo inobe hwulu pa matenjana wose, ngono inobe nti, nyuni kwadzinozha dzikabaka mashaka mu thabi dzawo.”

³³Kababudza tjimwe tjifaniso eti, “Bushe gwe kudzimu gonga mbidzo yakatogwa nge nkadzi kaishanganya ne bgwisa gunjinji gwe tjiwunga kudzina bgwisa gose gubila.”

³⁴Jesu wakaleba zwithu zose izwezwi ku mibunga ye bathu nge zwifaniso. Akuna tjaakababudza asingashingise tjifaniso.

³⁵Oku kwakabe kuli kuti kusiwile pasi matama akalebgwa nge nlebesambeli eti, “Ndowozhula nlomo wangu nge zwifaniso, ndowoleba tjakabe tjakasumbikala kudwa mu kubumbiwa kwe shango.”

³⁶Ipapo kasiya mbunga we bathu kangina mu ng'umba. Badiyiwa babe bakazha kunli beti, “Utitjenesele tjifaniso tje gotsha mu nnda.”

³⁷Kadabila eti, “Oyu wakadzwala mbewu yakalulwama Nkololo we Nthu.

³⁸Nnda i shango, ngono mbewu mbuyanana imilile bana be bushe. Gotsha bana be mbi,

³⁹ne tjita tjinobadzwala ndi Satani. Kuvuna kodwa bupelo gwe shango, ngono bavuni batumwa be kudzimu.

⁴⁰Koga se gotsha lisimugwa likapisiwa mu moto, kowobe kwakajalo mu bupelo gwe shango.

⁴¹Iye Nkololo we Nthu unowotuma batumwa babe, ngono banowosimula bedusa mu bushe gugwe tjimwe ne tjimwe tjinozhisa jinyo na ibo bose banoyita mbipo.

⁴²Banowobalashila mu bhuba le moto, kunowobe yapo kulila ne kulobanya meno nge kugwadziwa kukulu.

⁴³Ipapo balulwami banowopenya se zhuba mu bushe gwa Tate babo. Iye una zebe ngaahwe.

⁴⁴“Bushe gwe kudzimu gofanana ne fumwa yakasumbikiwa mu nnda. Ha nthu aiwana kaivumbika ngono mu kushatha kukwe kanotengesa kose kwaakabe anako katenga nnda iwoyo.

⁴⁵“Kakale Bushe gwe kudzimu gofanana ne ntengi unoshaka mabgwe mabuya.

⁴⁶Kukati awana le ntengo upezhugwi, kayenda kanotengesa kose kwaanako kalitenga.

⁴⁷“Kakale bushe gwe kudzimu gofanana ne gwanga gwakaposegwa mu gungwa ngono gukabhata njudzi dzose dze hwobe.

⁴⁸Gukati gwazhala balume bakagukwebela pa phili. Ipapo bakagala pasi bakakubunganyila hwobe dzakalulwama mu zwija, koga belasha dzisakalulwama.

⁴⁹Kowobe kwakajalo mu bupelo gwe shango. Batumwa be kudzimu banowozha kuwothubukanya babi mu balulwami.

⁵⁰Bakalashila babi mu bhuba le moto kunowobepo kulila ne kulobanya meno nge kugwadziwa kukulu.”

⁵¹Jesu kababhuzwa kati, “Apa mahwisisa zwithu izwezwi zose kene?” Bakadabila beti, “Ee.”

⁵²Ngono kati ku bali, “Ndizo N'diyi mmwe ne mmwe we nlayo wadiyiwa ngekwe bushe gwe kudzimu unofanana ne mweni we ng'umba unodusa mu dula lile fumwa tshwa ne hwulukugwi.”

⁵³Kukati Jesu apedza zwifaniso izwezwi kadwa ipapo,

⁵⁴kalinga ku shango ya kanyi kwabo kati eswika katangisa kudiya bathu mu ng'umba yabo ye mitembezelo, ngono bakakaabala. Bakabhuzwana beti, “Iwoyu nlume wakawana poni butjenjedu igogu ne masimba iyawa e kuthama matjenamiso kene?

⁵⁵Apa ate ali iye nkololo we mbezhi kene? Apa mmeyabe ate Mariya kene, kakale apa banung'una babe ate Jakubo na Josefa na Simoni na Judasi kene?

⁵⁶Apa hazwadzi dzidze dzose adzinaswi kene? Ngono iwoyu nlume wakazwitola ngayi kene zwithu izwezwi?”

⁵⁷Ngono bakakuthika nge kukwe. Koga Jesu kati ku bali, “Nlebesambeli aatoshaya tjilumbi mu shango imwe ne imwe kuzhe kwe shango ya kanyi kwabo nenge mu nsha wa kanyi kwabo.”

⁵⁸Aazoyita matjenamiso manjinji ipapo nge kusheta kugalamoyo kwabo.