Read Kalanga Matewu 14 Bible Online

Matewu 14 - Kalanga bible

Matewu 14

¹Mu tjibaka itjetjo, She Herode, kahwa ngekwe tjilumbi tja Jesu,

²ngono kati ku balanda babe, “Oyu ndi Johani we N'dubiki wakamuka mu bafi; ndizo wali masimba iyawa eshinga munli.”

³Herode wakabe abhata Johani, kansunga kanlonga mu ng'umba ye busungwa ngekwa Herodiyasi nkadzi we nnung'una uwe Herode, wakabeyi Filipo,

⁴ngobe Johani wakabe egala endwa eti “Ate kuli mu nlayo kuti unlobole.”

⁵Nenguba Herode akabe eshaka bulaya Johani, wakabe etja bathu, ngobe beti Johani nlebesambeli.

⁶Mu zhuba le kuzwikumbuludza kuzwagwa kwa Herode, nkololokadzi wa Herodiyasi kabazanila, kashathisa Herode kwazo,

⁷Herode kwaakadzina kan'gadzabgwe nge kutuna kuti unowompa tjimwe ne tjimwe tjaangakumbila.

⁸Nge kukulumbidziwa ndi mmeyabe kati, “Mundipe nsholo wa Johani we N'dubiki uli mu ndilo.”

⁹Mambo kahwa zogwadza, koga nge tuna kukwe kakale ngekwe bakokiwa babe, kalaya kuti nkololokadzi apiwe tjaakumbila.

¹⁰Ndizo katuma bathu bakanothubula nsholo wa Johani mu ng'umba ye busungwa.

¹¹Nsholo uwe wakazhisiwa uli mu ndilo, ukapiwa mwanadi iwoyo, ngono kauyisa kuna mmeyabe.

¹²Badiyiwa ba Johani bakazha bakatola itumbu tjitje bakatjibiganya. Kudwa ipapo bakayenda bakanobudza Jesu.

¹³Jesu kati ehwa tjakashingikala, kamilika ipapo nge n'goro kayenda kanobe ega, pasina bathu. Koga mibunga ye bathu ikati ihwa kwaayako ikantobela nge makumbo bedwa mu mizi yabo.

¹⁴N'goro ukati uswika pa phili, kabona mbunga nkulu we bathu, ngono kabahwila zogwadza, kapodza bagwele babo.

¹⁵Madekwana badiyiwa bakazha kunli beti, “Pathu ipapa tjilambanyika kakale zhuba lamila. Paladza mibunga iyeyi ye bathu kuti ndizo bayende ku mizi banozwitengela zojiwa.”

¹⁶Jesu kadabila eti, “Abazofanila kuti bayende. Mubape tjabangaja imwi.”

¹⁷Bakati kunli, “Pano tina zwiwunga zwili zwishanu koga ne hwobe mbili.”

¹⁸Jesu kati ku bali, “Muzwizhise kundili.”

¹⁹Ngono kadwa bathu kuti bagale pasi mu bushwa. Katola zwiwunga zwishanu ne hwobe idzedzo mbili kalinga kudzimu, kaboka Ndzimu, kazwipemula, kapa badiyiwa zwiwunga bakazwikobela bathu.

²⁰Bose bakaja bakaguta, ngono badiyiwa bakanunga mamburumburu bakazhadza seme dzili gumi lina mbili.

²¹Ibabo bakaja bakabe bali balume bali zwiwulu zwishanu, kuzhe kwe bakadzi ne bana.

²²Ipapo Jesu kadwa badiyiwa kati bangine mu n'goro babe bali mbeli, bayende seli, iye atjapaladza mibunga ye bathu.

²³Kati abapaladza katatha dombo ali ega kunotembezela. Kukati kube madekwana kabe ali ikoko ega,

²⁴ngono n'goro, wakabe wabe thambo kudwa mu phili, wakabe uhwuhwunganyiwa nge matuthu e vula inokapha, ngobe phepo yakabe yakalingisana nawo.

²⁵Kukati mazhokuyedza, kayenda ku bali enangayila pezhugwi kwe vula.

²⁶Kukati badiyiwa bembona enangayila pezhugwi kwe vula bakapalukamoyo ngono bakamimila ngotja beti, “Ipuku.”

²⁷Koga tjinyolotjo Jesu kati ku bali, “Simisani moyo! Ndimi, musitje.”

²⁸Pita kati, “She, ha muli imwi mundidwe ndizhe kumuli ndinangayila pezhugwi kwe vula.”

²⁹Jesu kati kunli, “Izha.” Ipapo Pita kadeluka mu n'goro kanangayila pezhugwi kwe vula eyenda kuna Jesu.

³⁰Koga kati ebona phepo katja, ngono kati etangisa kunyelela kadanilila eti, “She, munditjidze!”

³¹Tjinyolotjo Jesu kan'abilila kambhata kati kunli, “Nthu we kugalamoyo kutukununu ndiwe, wadudumwani?”

³²Bakati bengina mu n'goro, dutu likanyalala.

³³Ipapo bakabe bali mu n'goro bakan'namata, beti kunli, “Tjose u Nkololo we Ndzimu.”

³⁴Bakati batjulukila seli bakaswika mu shango ye Genezareta.

³⁵Kukati balume be nzi iwoyo baziba kuti ndi Jesu, bakazibisa ntuthu wose. Bathu bakazhisa bagwele babo kunli,

³⁶ngono bakankumbila kuti bagwele babhate lupeto gwe tjiambalo tjitje. Bose bakagubhata bakapodziwa.