Read Kalanga Matewu 15 Bible Online

Matewu 15 - Kalanga bible

Matewu 15

¹Ipapo Bafarasi ne badiyi be nlayo bakazha kuna Jesu bedwa ku Jerusalema, ngono bakambhuzwa beti,

²“Ini badiyiwa babo betjuluka tjilenje tja bobatategulu kene? Abatongula maboko abo ha beja!”

³Jesu kabashandula nge bhuzo eti, “Ini tjilenje tjenyu tjithama kuti mutjuluke nlayo we Ndzimu?

⁴Ndzimu wakati, ‘Kudza tate babo na mmeyabo,’ kakale, ‘Iye unoleba bubi ngekwa tate babe na mmeyabe, nge malebeswa ngaabulawe.’

⁵Koga imwi moti, ‘Ha nthu angati kuna tate babe kene mmeyabe, bhatsho yamabe mungawana mundili yatjibe tjipo tjapiwa Ndzimu,

⁶aazotjafanila kudza tate babe.’ Ndizo molandulila dama le Ndzimu tjilenje tjenyu.

⁷Mapitipiti ndimwi! Isaya wakabe elebesa ha elebelambeli nge kwenyu eti,

⁸“ ‘Bathu ibaba banondilumbidza nge nlomo koga, koga mimoyo yabo ikule nami.

⁹Banondithigamilila suli, ngobe banodiya milayo ye bathu se banodiya nlayo wangu.’ ”

¹⁰Jesu kadanila mbunga we bathu kunli kati, “Mundibhulutane muhwisise.

¹¹Tjinongina mu nlomo we nthu ate itjo tjinonthama kuti asibe mbuyanana kwaangasanamata Ndzimu, koga tjinobhuda nge nlomo, itjetjo nditjo tjinonthama kuti atemapale.”

¹²Ipapo badiyiwa bakazha kunli bakambhuzwa beti, “Apa unoziba kuti Bafarasi bakuthika behwa ndebo iyeyi kene?”

¹³Kashandula eti, “Mmwe ne mmwe nti usakadzwagwa ndi Tate bangu ba kudzimu unowodzikunugwa.

¹⁴Mubaletje, mapofu e batungamili. Ha bhofu likweba bhofu limwe, wose anowila mu gomba.”

¹⁵Koga Pita kati kunli, “Utitjenesele tjifaniso itjetji.”

¹⁶Jesu kabe eti, “Apa namwibo amuthu mukabe ne kuhwisisa zwenyu kene?

¹⁷Amutobona kuti tjinongina mu nlomo tjongina mu ntumbu kudwa ipapo tjibhuda mu mbili kene?

¹⁸Koga tjinodwa mu nlomo tjodwa mu moyo, ngono nditjo tjinothama kuti nthu atemapale.

¹⁹Ngobe mu moyo kobhuda mikumbulo mibi, kubulaya ne bupombgwe ne kuwalilana ngubo kuzhe kwe ndobolo ne bubava ne manyepkhwa ne kutjinya bamwe mazina.

²⁰Ezwi ndizo zwinoyita nthu kasibe mbuyanana. Koga kuja nge maboko asakangugwa akutoyita nthu kuti asibe mbuyanana.”

²¹Jesu kabhudila ku ntuthu we Tire ne Sidoni.

²²Ngono nkadzi we Nkanana, edwa mu ntuthu iwoyo kazha kunli elila eti, “She, Nkololo wa Dafite, mundihwile ngoni! Nkololokadzi wangu unodziyila kwazo wakasungwa nge meya mbi.”

²³Jesu kasidabile. Ndizo badiyiwa babe bakazha kunli bakankumbila beti, “Untate, ngobe unodwilila koga etililila.”

²⁴Kadabila eti, “Ndakatumwa ku pkhwizi dzakalashika dze Iziraela koga.”

²⁵Nkadzi iwoyo kazha kathigama mbeli kukwe kati, “She, mundibhatshe!”

²⁶Kadabila eti, “Akuzolulwama kuti zojiwa zwe bana zwitogwe zwiposegwe mbgwa.”

²⁷Nkadzi iwoyo kati, “Ee, She, koga na idzo mbgwa dzoja mamburumburu anowa edwa mu tafuli ya tetshi wadzo.”

²⁸Ipapo Jesu kanshandula eti, “Nkadzi, kukulu kugalamoyo kuko! Yemulo iyo yashingikala.” Ngono nkololokadzi uwe kapodziwa nge tjibaka itjetjo.

²⁹Kudwa ipapo Jesu kayenda, kasupha nge gungwa gwe Galili. Wakatatha dombo kanogala pasi.

³⁰Mibunga ye bathu mikulu ikazha kunli kuzhisa banoshudza ne mapofu ne zwilema zwakasiyana siyana ne mbebebe ne bamwe banjinji, bakababiga pa makumbo awe, ngono kabapodza.

³¹Bathu bose bakakaabala kwazo ha bebona mbebebe dzilebeleka ne zwilema zwipodziwa ne banoshudza beyenda ne mapofu epofunuka. Ngono bakakudza Ndzimu we Iziraela.

³²Jesu kadanila badiyiwa babe kunli kati, “Ndohwila zogwadza bathu ibaba, kwabe mazhuba matatu banami, ngono akuna tjabanoja. Anditoshaka kubapaladza bana zhala, ngobe banowokonegwa mu zila.”

³³Badiyiwa bakati kunli, “Tingawana ngayi zwiwunga zwakalizana kujisa mbunga we bathu ungapa mu tjilambanyika itjetji kene?”

³⁴Jesu kabhuzwa eti, “Muna zwiwunga zwingana?” Bakadabila beti, “Zwili tendeka ne hwobe shomanana tukununu.”

³⁵Kadwa mbunga we bathu kuti ugale pasi.

³⁶Ipapo katola zwiwunga seme dzili tendeka ne hwobe, kukati aboka, kazwipemula kazwipa badiyiwa, badiyiwa bakakobela mibunga ye bathu.

³⁷Bose bakaja bakaguta. Kudwa ipapo badiyiwa bakanunga mamburumburu asala bakazhadza zwitundu zwili tendeka.

³⁸Ipapo bakaja bakabe bali balume bali zwiwulu zwinna, kuzhe kwe bakadzi ne bana.

³⁹Kukati Jesu apaladza mibunga ye bathu kangina mu n'goro kayenda pejo ne ntuthu we Magadani.