Read Kalanga Matewu 16 Bible Online

Matewu 16 - Kalanga bible

Matewu 16

¹Gupo le Bafarasi ne Basadusi lakazha kuna Jesu ngon'lalila benkumbila kuti abalakidze tjilakidzo tjinodwa kudzimu.

²Kabadabila eti, “Ha kuli madekwana makole ali mashaba moti, ‘Kowomuka kwakalulwama,’

³kakale ha zhuba libhuda moti, ‘Nasi kowobe matutu, ngobe zhuzhugwi ishaba lina makole matema.’ Moziba kutjenesa kulingika kwe makole, koga musingazibe kutjenesa zwilakidzilo zwe misi.

⁴Bana bangwenu babi basingagalikebgwe nge Ndzimu banoshaka tjilakidzo, koga akuna tjilakidzo tjabanowopiwa kuzhe kwe tjilakidzo tja Jona.” Ipapo Jesu kabasiya kayenda.

⁵Kukati badiyiwa beswika seli kwe gungwa, bakabe bakangang'wa kusenga tjiwunga.

⁶Jesu kati ku bali, “Lingani mube ne njele ngekwe mbidzo ye Bafarasi ne ye Basadusi.”

⁷Bakalebeleka tje kwabo beti, “Akuna tjiwunga tjatazha natjo.”

⁸Jesu kaziba tjabanoalakana ndizo kababhuzwa kati, “Bathu be kugalamoyo kutukununu ndimwi, ini mulebeleka tje kwenyu ngekwe kuti amuna tjiwunga?

⁹Apa amuthu mukahwisisa zwenyu kene? Amutoalakana zwiwunga zwishanu zwakajiwa nge bali zwiwulu zwishanu (5 000) ne kuti makazhadza seme dzili ngana?

¹⁰Kene zwiwunga zwili tendeka zwakajiwa nge bali zwiwulu zwinna (4 000) ne kuti makazhadza seme dzili ngana?

¹¹Ini musingahwisise kuti imi ndabe ndisingalebeleke namwi ngekwe tjiwunga? Koga ibeni nge njele ngekwe mbidzo ye Bafarasi ne Basadusi.”

¹²Ipapo bakahwisisa kuti aatodwa kuti batjenjelele mbidzo ye tjiwunga, koga kuti babe ne njele ngekwe zwidiyo zwe Bafarasi ne Basadusi.

¹³Kukati Jesu ezha mu ntuthu we Sizariya Filipi kabhuzwa badiyiwa babe kati, “Bathu banoti Nkololo we Nthu ndiye ani?”

¹⁴Bakashandula beti, “Bamwe banoti ndi Johani we N'dubiki, bamwe banoti ndi Elija, koga bamwe banoti ndi Jeremiya kene mmwe we balebesambeli.”

¹⁵Kababhuzwa kati, “Koga imwi moti ndimi ani?”

¹⁶Simoni Pita kashandula eti, “Ndimwi Mesiya, Nkololo we Ndzimu unotjila.”

¹⁷Jesu kadabila kati, “Wakakombolegwa Simoni Nkololo wa Jona, ngobe oku auzokuzumbunuligwa nge nthu koga wakazumbunuligwa ndi Tate bangu ba kudzimu.

¹⁸Kakale ndokubudza kuti ndiwe Pita, ngono pezhugwi kwe shongwe iyeyi, ndowobaka gubungano langu, ngono masimba e lufu atowolikunda.

¹⁹Ndowokupa khiyi dze bushe gwe kudzimu, tjimwe ne tjimwe tjawasunga mu shango tjowosungwa kudzimu ne tjimwe ne tjimwe tjawasunungula mu shango tjowosunungugwa kudzimu.”

²⁰Ipapo kadwa badiyiwa babe akasimisa kuti bashete wabanobudza kuti ndiye Mesiya.

²¹Kudwa mu tjibaka itjetjo Jesu katangisa kulakidza badiyiwa babe kuti wakafanilo yenda ku Jerusalema, ngono adziyidziwe nge zwinjinji mu maboko e bakulu* ne bapirisiti banolaula ne badiyi be nlayo ne kuti wakafanila kubulawa, ngono mu zhuba le butatu amusiwe.

²²Pita kantolela ntome, katangisa kuntjemela eti kunli, “Akungajalo She! Zwithu izwezwi azwitowo mushingikalila!”

²³Jesu katjebuka kati kuna Pita, “Idwa pandili Satani! Utjidzibilidzi kundili, ngobe autoalakana zwithu zwe Ndzimu, unoalakana zwithu zwe bathu koga.”

²⁴Ipapo Jesu kati ku badiyiwa babe, “Ha mmwe enditobela, ngaazwilandule, atole tjileyanyo tjitje anditobele.

²⁵Ngobe iye unoshaka kuzwitjidza, butjilo gugwe gowonlashikila, koga iye unowolashikigwa nge butjilo gugwe nge kwangu, unowoguwana.

²⁶Kobuzilani kuti nthu athuwe shango yose koga atjinyikigwe nge meya iye. Apa nthu ungatetshanya butjilo gugwe ngeni kene?

²⁷Ngobe Nkololo we Nthu unowozha nge gudzo la Tate babe, ana batumwa babe be kudzimu ngono ipapo unowolipa nthu mmwe ne mmwe muna tjaakathama.

²⁸Ndolebesa ndoti kumuli, kuna bamwe bamile ipapa banowobona kuzha kwe Nkololo we nthu mu Bushe gugwe, basathu bakafa.”