Read Kalanga Matewu 18 Bible Online

Matewu 18 - Kalanga bible

Matewu 18

¹Nge tjibaka itjetjo badiyiwa bakazha kuna Jesu bakambhuzwa beti, “Ndiani nkulu tjose mu bushe gwe kudzimu?”

²Wakadana mwana ntukununu kammisa pakati kwabo,

³ndizo kati ku bali, “Ndolebesa ndoti kumuli, kuzhe kwe mungashanduka mukafanana ne bana batukununu, amungatongo ngina mu bushe gwe kudzimu.

⁴Ndizo, iye unozwiyisa pasi sa iwoyu mwana, ndiye nkulu tjose mu bushe gwe kudzimu.

⁵Na iye unoamutjila mwana ntukununu unonga iwoyu nge zina langu, unoamutjila imi.

⁶“Koga iye unothama kuti mmwe wa ibaba batukununu banogalamoyo mundili athame jinyo, kungabhatsha kuti gwiyo gulu lisungiligwe mu ntshibha uwe atshindikigwe mu gungwa lakangina afe.

⁷Yee mme wee! Shango yapalala ngekwe ndiko inothama bathu kuti bathame jinyo! Kwakafanila kuti ndiko izhe, Yee mme wee wapalala! Iye unowoti zwithu izwezo zwikazha ndiye!

⁸“Ha luboko gugo kene gumbo lilo likuthamisa jinyo, ulithubule ulilashe. Koyita kuti ungine mu butjilo uli tjilema kene ushudza, pakuti ube ne maboko mabili kene makumbo mabili ukowoposegwa mu moto usingapele.

⁹Kakale ha zhisho lilo likuthamisa jinyo, ulikonyombole ulilashe. Koyita kuti ungine mu butjilo una zhisho ling'ompela pana kuti ube ne mesho mabili ukowolashigwa mu moto usingapele.

¹⁰“Mubone kuti musilingile pasi mmwe wa ibaba batukununu, ngobe ndomubudza nditi, batumwa babo be kudzimu banobona buso gwa Tate bangu ba kudzimu misi yose.[8]

¹²“Mobona tjini? Ha nlume ana pkhwizi dzili zana ling'ompela (100), ngono ing'ompela yadzo ibe imila, apa aangasiye makumi ali zhanalume ana dzili zhanalume (99) mu matombo, enoshaka ing'ompela yamila kene?

¹³Ha eiwana, ndolebesa ndoti kumuli, unoshatha ngekwa iyeyo ing'ompela kupinda dzili makumi ali zhanalume ana zhanalume dzakabe dzisamila.

¹⁴Ndizo ate kuli kuda kwa Tate bangu ba kudzimu kuti mmwe wa ibaba batukununu alashike.

¹⁵“Ha ikamu tjitjo tjikutjinyila, yenda kutjili utjilakidze nlandu watjo, muli babili koga. Ha tjikuhwilila unowobe watjidza ikamu tjitjo.

¹⁶Koga atjisingakuhwilile dana nng'ompela kene babili, kuti ndizo dama limwe ne limwe lisimisiwe nge batendeki babili kene batatu.

¹⁷Ha tjilamba kubahwilila, ubudze gubungano, koga ha tjilamba kuhwilila na ilo gubungano, utjitole se mmwe we zwitjaba kene nkhethisi.

¹⁸“Ndolebesa nditi, tjimwe ne tjimwe tjamunosunga mu shango tjowosungwa kudzimu ne tjimwe ne tjimwe tjamasunungula mu shango tjowosunungugwabo kudzimu.

¹⁹“Kakale, ndomubudza kuti ha babili benyu bedumilana mu shango ngekwe tjimwe tjabanokumbila, mowotjiyitigwa ndi Tate bangu ba kudzimu.

²⁰Pakubungana babili kene batatu nge zina langu, ipapo ndi pakati kwabo.”

²¹Ipapo Pita kazha kuna Jesu kambhuzwa kati, “She, ndizwiibhatigwe ikamu tjangu kangana ha tjinditjinyila? Katendeka kwakalizana kene?”

²²Jesu kashandula eti, “Ndokubudza nditi, kusi katendeka koga, koga kuswikila makumi ali tendeka katendeka.

²³Ndizo, bushe gwe kudzimu gofanana na mambo wakabe eshaka kuti balanda babe banonkolota banlipe.

²⁴Kati etangisa kukumbuludzana nabo, nlume wakabe enkolota talenta[9] dzili zwiwulu zwili gumi (10 000) kazhisiwa kunli.

²⁵Se akabe asina tjaangalipa nditjo, tetshi uwe kalaula kuti iye ne nkadzi uwe ne bana babe na kose kwaanako, batengesiwe kulipiwe ikoloto.

²⁶Nlanda iwoyo kawa nge zwidwi mbeli kwa tetshi uwe, enkumbila eti, ‘Ibeni ne moyonlefu nge kwangu. Ndowolipa tjimwe ne tjimwe.’

²⁷Tetshi uwe kanhwila ngoni, kabukusha ikoloto tjitje, kanletja kayenda.

²⁸“Kukati nlanda iwoyo ebhuda, kawana mmwe we balanda sa iye unonkolota mari e siliva ali zana ling'ompela. Kambhata nge hwulo kati kunli, ‘Lipa ikoloto tjitjo.’

²⁹Iwoyu mmwe we balanda sa iye kankumbila eti, ‘Ibe ne moyonlefu nge kwangu, ndowokulipa.’

³⁰Koga kalamba, kamilika kanomposela mu ng'umba ye busungwa kudzina elipa ikoloto tjitje.

³¹Kukati balanda bamwe bebona tjashingikala, bakahwa zogwadza kwazo, bakayenda bakanobudza tetshi wabo.

³²Ipapo tetshi kadanila nlanda iwoyo kunli kan'dwa kati, ‘Nlanda wakabipa ndiwe! Ndakabukusha ikoloto tjitjo tjose, ngobe wandikumbila.

³³Apa wabe usakafanila kube ne ngoni ngekwe mmwe nlanda sawe sekwa ndabe ne ngoni nge kuko kene?’

³⁴Nge bushongola, tetshi uwe kan'yisa ku balindi be ng'umba ye busungwa kudzina alipe ikoloto tjitje tjose.

³⁵“Oku ndiko Tate bangu ba kudzimu kwabanowoyita mu mmwe ne mmwe wenyu kuzhe kwe mungazwiibhatigwa zwikamu zwenyu nge moyo wose.”