Read Kalanga Matewu 2 Bible Online

Matewu 2 - Kalanga bible

Matewu 2

¹Kwakati Jesu asinobe azwagwa mu nzi we Bhetelehema we Judiya, mu tjibaka tje mbuso wa Herode mambo, kukazha balume bakatjenjela ku Jerusalema bedwa ku bhezhuba, ngono bakabhuzwa bakati,

²“Ungayi mambo we Bajuta wazwagwa kene? Tabona nyenyedzi iye ku bhezhuba ngono tawonnamata.”

³Ngono kwakati mambo Herode ne bunji gwe bathu mu Jerusalema, behwa ikoku bakadziyidzika kwazo.

⁴Herode wakakubunganya bapirisiti bakulu bose ne badiyi be nlayo ngono kababhuzwa kuti Mesiya unowozwaligwa ngayi.

⁵Bakashandula beti, “Mu nzi we Bhetelehema mu ntuthu we Judiya, ngobe ikoku ndiko kwakakwagwa nge nlebesambeli eti,

⁶“ ‘Koga iwe nzi we Bhetelehema, mu ntuthu we Juda, aute uli ntukununu tjose mu balauli be Juda, ngobe mukuli kowobhuda nlauli unowolisa bathu bangu Baiziraela.’ ”

⁷Ipapo Herode kadana balume ibabo bakatjenjela nge kwakasumbikala, kuti awane malebeswa mubali ekuti nyenyedzi yakaboneka tjibaka tjipi.

⁸Ndizo Herode kabatumila ku Bhetelehema eti, “Yendani munoshaka mwana iwoyo nge njele. Muti ha mambona, mundizibise kuti namibo ndiyende ndinonnamata.”

⁹Bakati basinohwa tjalebgwa ndi mambo, bakayenda, ngono bakabona nyenyedzi yabakabe babona ku bhezhuba, ikabatungamila kudzina ima pezhugwi kwe pakabe mwana alipo.

¹⁰Bakati bebona nyenyedzi bakashatha kwazo kwazo,

¹¹ngono bakati bengina mu ng'umba bakabona mwana na mmeyabe Mariya, bakazwiyisa pasi bakan'namata. Kudwapo bakadusa fumwa yabo bakampa zwipo zwe golide ne nti we motsha unonuhwa zwinozipa ne nti we mira.

¹²Ngono balume ibabo se bakabe batjenjedziwa mu hwope kuti basibgwilile kuna Herode, bakabgwilila ku shango yabo nge zila ipoga.

¹³Bakati bayenda, ntumwa wa She kaboneka kuna Josefa mu hwope eti, “Muka, tola mwana na mmeyabe utizhile ku Egipiti. Ugale ikoko kudzina ndikubudza kuti utini, ngobe Herode wabe pejo ngoshaka mwana kuti ambulaye.”

¹⁴Ndizo kamuka, katola mwana na mmeyabe busiku kayenda ku Egipiti,

¹⁵kwaakagala kuswikila Herode efa. Oku kwakashingikala kuti ndizo kusiwile pasi matama a She akalebgwa nge nlebesambeli eti, “Ndakadanila Nkololo wangu kuzhe kwe Egipiti.”

¹⁶Herode kati ebona kuti balume bakatjenjela bantjenjelela, kangina bushongola kwazo, ngono kadusa ndaulo kuti bana bose be tjilisana mu Bhetelehema ne ntuthu wose bana makole mabili ne kuyenda pasi babulawe. Makole iyawa Herode wakabe ealebela pezhugwi kwe tjakabe tjalebgwa nge balume bakatjenjela.

¹⁷Ipapo matama akalebgwa nge nlebesambeli Jeremiya kasiwile pasi, Jeremiya wakabe ati,

¹⁸“Hwi lakahwika mu nzi we Rama kumimila ne kulila kukulu kulu Rahele elilila ngawana dzidze elamba nyaladziwa, ngobe dzafa.”

¹⁹Herode kati asinofa, ntumwa we kudzimu kaboneka mu hwope kuna Josefa ali ku Egipiti, eti,

²⁰“Milika utole mwana na mmeyabe uyende ku shango ye Iziraela, ngobe ibabo bakabe beshaka kupedza butjilo gugwe bakafa.”

²¹Ndizo kamilika katola mwana na mmeyabe kayenda ku shango ye Iziraela.

²²Ngono Josefa kati ehwa kuti Akelaosi wagala tate babe Herode thaka, unobusa mu Judiya katja kuyendako. Ndizo kati atjenjedziwa mu hwope kashandukila ku ntuthu we Galili.

²³Wakayenda kanogala mu nzi we Nazareta, kuti ndizo kusiwile pasi matama akalebgwa nge balebesambeli beti, “Unowodang'wa Nnazareta.”[1]