Read Kalanga Matewu 20 Bible Online

Matewu 20 - Kalanga bible

Matewu 20

¹“Bushe gwe kudzimu gofanana ne mweni we nnda wakabhuda mangwanana kunopa bathu nshingo kushinga mu nnda uwe we mizhambi.

²Kadumana nabo kubalipa mari e zhuba ling'ompela, ndizo kabayisa ku nnda uwe we mizhambi.

³Kati ebhuda mangwanana zhuba latatha kabona bamwe bathu bali mile pa matengeselo basingashinge tjimwe,

⁴kabadwa kati, ‘Namwibo yendani munoshinga mu nnda wangu we mizhambi, ngono ndowomulipa kwakafanila.’ Ndizo bakayenda.

⁵Kabhuda kakale masikati ne mu matewuko kayita sa ikoko.

⁶Kukati madekwana kabhuda kanowana bamwe kakale bali mile koga. Kababhuzwa kati, ‘Ini mashwa muli mile ipapa zhuba lose musina tjamunoshinga kene?’

⁷Bakanshandula beti, ‘Akuna watipa nshingo.’ Kati ku bali, ‘Namwibo yendani munoshinga mu nnda wangu we mizhambi.’

⁸“Kukati zhuba limila, mweni we nnda we mizhambi kati ku nshingisi uwe, ‘Dana bashingi ubape mibhayilo yabo, utange nge be bupelo kudzina kunoti kuna be kutanga.’

⁹Bashingi bazha madekwana bakazha, ngono mmwe ne mmwe wabo kaamutjila mari e zhuba ling'ompela.

¹⁰Ndizo kukati be kutanga bezha bakakumbula kuti banowoamutjila kunji. Koga mmwe ne mmwe wabo kaamutjila mari e zhuba ling'ompelabo.

¹¹Bakati beaamutjila, bakang'ong'ola ku mweni we nnda,

¹²bakati, ‘Balume ibaba be bupelo bashinga tjibaka tjifupi, ngono wabalizanya koga naswi, iswi tashwa tilemegwa nge nshingo kakale titshwa nge zhuba.’

¹³“Koga kadabila mmwe wabo eti, ‘Nzwalani, anditokutjebela. Apa auzodumana nami kushingila mari e zhuba ling'ompela kene?

¹⁴Tola mbhayilo uwo uyende. Ndada kupa ibaba be bupelo sekwa ndapa iwe.

¹⁵Apa andina fanilo ye kushinga tjandada nge mari angu kene? Ini una ndandala, imi ndishaka kuyita buthu?’ ”

¹⁶Jesu kati, “Ndizo be bupelo banowobe be kutanga ne be kutanga bakabe be bupelo.”

¹⁷Ngwenu Jesu kati etathila ku Jerusalema kadanila ntome badiyiwa babe bali gumi lina babili, ngono kati ku bali,

¹⁸“Bonani, totathila ku Jerusalema, kunowoti Nkololo we Nthu kayisiwa mbeli kwe bapirisiti bakulu ne badiyi be nlayo, kwabanowontilika nlandu kuti abulawe,

¹⁹ngono banowonsa kuna Bezwitjaba kudadigwa ne kulobgwa nge rwabha ne kubambugwa ngono unowomusiwa mu zhuba le butatu.”

²⁰Ipapo mme be bakololo ba Zebhedi bakazha kuna Jesu ne bakololo babo, ngono bakathigama bakankumbila tjimwe.

²¹Kababhuzwa kati, “Ini tjamunoshaka?” Mme be bakololo ba Zebhedi bakati, “Ndokumbila kuti bakololo bangu babili ibaba bagale mmwe ku luboko gugo gwe luji, mmwe kuna gwe lumeshwe mu bushe gugo.”

²²Jesu kati ku bali, “Amutoziba tjamunokumbila. Apa mungatubula kung'wa nkombe wandinowong'wa kene?” Bakati kunli, “Tingatubula.”

²³Jesu kati ku bali, “Mowong'wa nkombe wangu koga kugala ku luboko gwangu gwe luji kene ku luboko gwangu gwe lumeshwe ate kuli kwangu kukukoba, koga ngekwa ibabo bakwakabigigwa ndi Tate bangu.”

²⁴Ngono kukati bamwe badiyiwa bali gumi behwa ikoku bakagwadzilamoyo bakololo ba Zebhedi ibabo babili.

²⁵Jesu kabadanila kunli, ngono kati ku bali, “Moziba kuti boshe be zwitjaba banobusa bathu babo nge kubadziyidza, ngono balauli ibabo banobalaula nge masimba.

²⁶Koga ngakusijalo mu muli. Ha kuli kuti kuna mmwe unoshaka kube nkulu pa bamwe mu muli, ngaabe nlanda wenyu,

²⁷na iyebo unoshaka kube mbeli, ngaabe iye nlanda wenyu.

²⁸Ngobe na iye Nkololo we Nthu aazozha kuwoshingigwa koga wakazha kuwoshingila ne kupa butjilo gugwe kudzitunula banji.”

²⁹Ngono kukati Jesu ne badiyiwa babe bebhuda mu Jerikho mbunga we bathu nkulu ukabatobela,

³⁰mapofu e balume babili bakabe bali gele pa hwunde ye zila, ngono bakati behwa kuti Jesu unopinda ipapo bakamimila beti, “Nkololo wa Dafite utihwile ngoni!”

³¹Mbunga we bathu ukabatjemela ukabadwa kuti banyalale, koga bakamimila kwazo beti “She mutihwile ngoni, Nkololo wa Dafite!”

³²Jesu kama kabadana kababhuzwa kati, “Moshaka kuti ndimuyitileni?”

³³Bakashandula beti, “She, toshaka kuti mesho edu azhuke.”

³⁴Jesu kabahwila zogwadza, ngono kabhata mesho abo. Tjinyolotjo bakapofunuka, ngono bakantobela.