Read Kalanga Matewu 21 Bible Online

Matewu 21 - Kalanga bible

Matewu 21

¹Bakati babepejo ngoswika ku Jerusalema, babe pa nzi we Bhetifage ku Dombo le Mitoba, Jesu katuma badiyiwa babili

²eti ku bali “Yendani mungine mu nzi iwoyu wamakalingisana nawo, ngono mowoti muswika koga mowowana donki yakasungiligwa ina donkana yayo. Muasunungule muazhise kundili.

³Ha mmwe angamudwa tjimwe, mun'dwe muti, ‘She banoashaka,’ ngono iye unowoasunungula tjinyolotjo.”

⁴Ikoku kwakashingikala kuti kushingikale matama e nlebesambeli anoti,

⁵“Budza Nkololokadzi we Ziyoni uti, ‘Bona, mambo uwo unozha ku kuli, nge kuzwiyisa pasi akatatha donki, ali pezhugwi kwe donkana, mwana we donki.’ ”

⁶Badiyiwa bakayenda bakashinga sekwa badwiwa ndi Jesu.

⁷Bakazhisa donki ne donkana, bakawala zwiambalo zwabo pezhugwi kwawo, ngono Jesu kaitatha.

⁸Mbunga we bathu nkulu kwazo ukawala zwiambalo zwabo mu zila, bamwe bakakwaula thabi dze miti bedziwala mu zila.

⁹Mibunga ye bathu yakabe iyenda mbeli ne yakabe ili shule ikapululudza iti, “Hosana ku Nkololo wa Dafite! Wakakombolegwa iye unozha nge zina la She! Hosana, pezhugwi zhugwi.”

¹⁰Jesu kati engina mu Jerusalema, nzi wose ukadzongeka ukabhuzwa uti, “Ndiani iwoyu?”

¹¹Mibunga ikadabila iti, “Oyu ndi Jesu, nlebesambeli, unodwa ku Nazareta mu Galili.”

¹²Jesu kangina mu Ng'umba ye Ndzimu katatila kuzhe bose bakabe betengesa ipapo. Kapitula tafuli dze bakabe betenganya mari, kakale kapitula zwigalo zwe bakabe betengesa ngurukuku.

¹³Kati ku bali, “Kwakakwagwa kukayi, ‘Ng'umba yangu inowodang'wa ng'umba ye ntembezelo,’ koga imwi moithama guwu le mbava!”

¹⁴Mapofu ne zwilema bakazha kunli ku Ng'umba ye Ndzimu, ngono kabapodza.

¹⁵Koga bapirisiti bakulu ne badiyi be nlayo bakagwadza moyo bebona zwithu zwinotjenamisa zwaakathama ne bana bemimila mu Ng'umba ye Ndzimu beti, “Hosana ku Nkololo wa Dafite.”

¹⁶Bakambhuzwa beti, “Apa unohwa kuti bana ibaba bakatini kene?” Jesu kashandula eti, “Ee, apa amuthu mukabala panoti, ‘Makathama milomo ye zwitole ne ngawana kuleba gudzo le zhele.’ ”

¹⁷Ngono kasiya bathu kabhuda mu nzi kayenda ku Bhetani kwaakanolalako.

¹⁸Ngono kukati kuli mangwanana Jesu, ebgwilila ku Jerusalema, kabe ana zhala,

¹⁹kabona nti we mpaya pa zila kayenda kuuli koga kawana kusina tjimwe kuzhe kwe mazhani woga. Ipapo kati kuuli, “Kusitjabe ne mitjelo inowobhuda mukuli kakale.” Tjinyolotjo nti ukawoma.

²⁰Badiyiwa bakati bebona ikoku bakakaabala kwazo. Ngono bakabhuzwa beti, “Nti iwoyo we mpaya wawoma tjinyolotjo zwingapa tjini?”

²¹Jesu kashandula eti, “Ndolebesa ndoti, ha muna kugalamoyo, musingatongo dudumwa, amutowoyita tjayitiwa mu nti iwoyu we mpaya koga, koga mungati ne ku dombo ileli, ‘Simuka uwile mu gungwa,’ ngono kowoshingikala.

²²Ha mugalamoyo tjimwe ne tjimwe tjamunokumbila mu mitembezelo mowotjiwana.”

²³Jesu kangina mu Ng'umba ye Ndzimu, ngono kukati atjadiya, bapirisiti bakulu ne bakulu be Bajuta bakazha kunli bakati, “Zwithu izwezwi unozwishinga nge simba lipi? Ndiani wakakupa simba ileli?”

²⁴Jesu kadabila eti, “Ndowomubhuzwabo bhuzo ing'ompela. Ha mungandidabila, ndowomubudza kuti simba landinoshingisa ndilipi.

²⁵Kudubika kwa Johani kwakadwa ngayi? Kwakadwa kudzimu kene mu bathu?” Bakalebeleka tje kwabo beti, “Ha tingati, ‘Kwakadwa kudzimu,’ unowobhuzwa eti, ‘Ini ngono musakan'galamoyo?’

²⁶Koga ha tingati, ‘Kwakadwa mu bathu,’ totja mbunga we bathu, ngobe banogalamoyo bose kuti Johani wakabe ali nlebesambeli.”

²⁷Ndizo bakashandula Jesu beti, “Atitoziba.” Ipapo kati ku bali, “Namibo andingamubudze kuti zwithu izwezwi ndozwiyita nge simba lipi.

²⁸“Mobona tjini? Kwakabe kuna mmwe nlume ana bakololo babili. Kayenda kuna we kutanga kati kunli, ‘Nkololo wangu, en'da unoshinga mu nnda we mizhambi nasi.’

²⁹Nkololo uwe kan'dabila kati, ‘Anditoyenda.’ Koga shule kashandusa nkumbulo kayenda.

³⁰Ipapo tate babe bakayenda kuna we bubili bakaleba sa ikoko. Kashandula kati, ‘Ndowoyenda, tate,’ koga kasiyende.”

³¹Jesu kababhuzwa kati “Ndiupi wa ibaba babili wakashinga kuda kwa tate babe?” Bakashandula beti, “We kutanga.” Jesu kati ku bali, “Ndolebesa ndoti, bakhethisi ne fukula banongina mbeli kwenyu mu bushe gwe Ndzimu.

³²Johani wakazha kumuli kumulakidza zila ye ndulamo, koga mukasingalemoyo, ngono bakhethisi ne fukula bakan'galamoyo. Koga kukati ne mabona, mukasishanduke kuti mungalemoyo.

³³“Hwililani tjimwe tjifaniso, kwakatongobe kuna nthu ali mweni we nzi akalima nnda we mizhambi. Wakaushoshela, katsha gomba linokobolegwa zhambi pakati kwawo, kabaka thungamakole[10] muuli kauhirisa ku bamwe balimi, ngono iye kayenda ku imwe shango ipoga.

³⁴Kwakati tjibaka tje mitjelo tjisedzela katuma balanda babe ku bahiri be nnda kunotola gobe lile le mitjelo.

³⁵Bahiri be nnda bakabhata balanda babe bakaloba mmwe, bakabulaya mmwe, ngono bakakikithidza mmwe nge mabgwe.

³⁶Ngono mweni we nnda kapapha katumila balanda bamwe banji pana be kutanga, ngono bahiri be nnda bakabayita sa ikoko kakale.

³⁷Kudwapo katumila nkololo uwe ku bali eti, ‘Banowoteta nkololo wangu.’

³⁸Koga kukati bahiri be nnda bebona nkololo uwe bakan'langana beti, ‘Oyu ndiye n'gali thaka, izhani, ngatimbulayeni titole thaka iye.’

³⁹Ndizo bakantola bakanlashila kuzhe kwe nnda we mizhambi bakambulaya.

⁴⁰“Ndizo ipapo mweni we nnda we mizhambi ha ezha unowoshingani ku bahiri ibabo kene?”

⁴¹Bakashandula beti, “Unowolobesa ibaba balume bakabipa kunogwadza, kayisa nnda mu maboko e bahiri bapoga banowompa gobe lile bavuna.”

⁴²Jesu kati ku bali, “Apa amuthu mukatongo bala hwalo dze Ndzimu dzinoti, “ ‘Bgwe ilo lakalambiwa nge babaki lakabe bgwe linotambunudza mbako; ikoku kwakayitiwa ndi She, ngono kotjenamisa mu mesho edu?’

⁴³“Ndizo ndomubudza nditi, bushe gwe Ndzimu gowotogwa mu muli gokapiwa itjaba tjinodusa mitjelo yago.

⁴⁴Iye unowila pezhugwi kwe bgwe ileli unowovunikana kasala ali zwitibhutibhu, koga ha liwila nthu lowompkhwanya.”

⁴⁵Kukati bapirisiti bakulu ne Bafarasi behwa zwifaniso zwa Jesu bakaziba kuti unolebeleka nge kwabo.

⁴⁶Bakashaka zila ye kunsunga, koga bakabe betja mbunga we bathu, ngobe bathu bakabe beti nlebesambeli.