Read Kalanga Matewu 22 Bible Online

Matewu 22 - Kalanga bible

Matewu 22

¹Jesu kalebeleka nabo ne zwifaniso kakale eti,

²“Bushe gwe kudzimu gofanana na mambo wakalulwamisila nkololo uwe ndobolo.

³Ngono katuma balanda babe kunodana bakabe bakokiwa ku nzano we ndobolo, koga bakalamba zha.

⁴Ipapo katuma bamwe balanda kati, ‘Kabudzeni bakakokiwa kuti, ndalulwamisa zojiwa zwangu, mangabe angu ne makondogwana angu akakola abhayiwa ne tjimwe ne tjimwe tjalulwama. Izhani ku nzano we ndobolo!’

⁵Koga bakanshayila hanya bakayenda, mmwe ku nnda uwe, mmwe ku mishingo iye,

⁶bakatola balanda babe bakababhata nge kunobhatisa shoni bakababulaya.

⁷Mambo kagwadzamoyo, katuma babhayani babe bakalobesa babulayi ibabo kakale kapisa nzi wabo.

⁸Ndizo kati ku balanda babe, ‘Nzano we ndobolo walulwamisiwa, koga ibabo bandakakoka abazobe bakafanila kuzha.

⁹Yendani mu dzizila mukoke mmwe ne mmwe wamunowobona azhe ku nzano.’

¹⁰Ndizo balanda ibabo bakabhuda bakayenda mu dzizila bakakubunganya bathu bose babanowana, babi ne balulwami, ngono ng'umba ye ndobolo ikazhala bakokiwa.

¹¹“Koga mambo kati engina kunobona bezi, kabona mmwe nlume ipapo wakabe asakaambala tjiambalo tje ndobolo.

¹²Kambhuzwa kati, ‘Nkwinya, wangina tjini ipapa usina tjiambalo tje ndobolo?’ Nlume iwoyo kasheta tjaangaleba.

¹³Ipapo mambo kadwa balanda babe kati, ‘Munsunge maboko ne makumbo munlashile kuzhe mu zhalima. Ikoko kowobe ne kulila ne kulobanya meno nge kugwadziwa kukulu.’

¹⁴Ndizo wali, banjinji banodang'wa, koga bashomanana banoshalugwa.”

¹⁵Ipapo Bafarasi bakabhuda bakanolangana kuti bangambhatshila tjini nge matama awe.

¹⁶Bakatuma badiyiwa babo ne batobeli ba Herode kunli beti, “N'diyi, toziba kuti muna malebeswa ne kuti modiya zila ye Ndzimu nge malebeswa. Amuna hanya kuti nthu ndiani ngobe amutolinga mamo e bathu.

¹⁷Mutibudze ngono, mobona tjini? Apa kumu nlayo kene, kuti tilipe lukhetho kuna Kaisara mambo we Roma, kene?”

¹⁸Koga Jesu, ngoziba mikumbulo yabo yakabipa, kati ku bali, “Batjengedzi ndimwi, ini mundilalila?

¹⁹Mundilakidze mari anoshingisiwa kulipa lukhetho.” Bakanzhisila mari e zhuba ling'ompela,

²⁰ngono Jesu kati ku bali, “Tjifano tjaani itjetji ne zina nge laani ileli?”

²¹Bakashandula beti, “Nge zwa Kaisara.” Ipapo Jesu kati ku bali, “Ipani Kaisara zwithu zwizwe, ngono mupe Ndzimu zwawo.”

²²Bakati behwa ikoku bakatjenama. Ndizo bakansiya bakayenda.

²³Mu zhuba ilelo zwalo Basadusi, ibo banoti akuna kumuka kwe bafi, bakazha kunli nge bhuzo.

²⁴Bakati kunli, “N'diyi, Mushe wakati, ‘Ha nlume efa asina bana, nnung'una uwe wakafanila agale thaka nkulu uwe, kuti anzwalile bana.’

²⁵Ngwenu kwakabe kuna thobeledzani pakati kwedu dze balisana dzili kutendeka. We kutanga kalobola, ngono kafa. Wakabe asina bana kasiyila nkadzi uwe nnung'una uwe.

²⁶Kukayitika sa ikoko mu nnung'una uwe we bubili ne we butatu kudzina kunoti kuna we butendeka.

²⁷Gwe bupelo, nkadzi na iye kafa.

²⁸Ngwenu ipapo mu kumuka kwe bafi unowobe nkadzi waani muna bali kutendeka ngoti bose bakabe banlobola?”

²⁹Jesu kashandula eti, “Makadzimila, ngobe amutoziba hwalo dze Ndzimu kene simba le Ndzimu.

³⁰Mu kumuka kwe bafi, bathu abatolobola kene kuli kulobodziwa. Koga banonga batumwa be kudzimu.

³¹Ngekwe kumuka kwe bafi, apa amuzobala tjakalebgwa kumuli nge Ndzimu uti,

³²‘Apa ndimi Ndzimu wa Abhurahama, ndimi Ndzimu wa Isaki, ndimi Ndzimu wa Jakubo kene?’ Ate Ndzimu we bafi koga Ndzimu we batjili.”

³³Kukati mibunga ye bathu ihwa ikoku ikakaabadziwa nge kudiya kukwe.

³⁴Bafarasi bakati behwa kuti Jesu wanyaladza Basadusi bakakubungana.

³⁵Mmwe wabo, wakabe ali nthu wakazwidiya milayo, kambhuzwa bhuzo enlika, kati,

³⁶“N'diyi, ndiupi nlayo nkulu pa mimwe?”

³⁷Jesu kashandula eti, “ ‘Ida She Ndzimu uwo nge moyo uwo wose nenge meya iyo yose nenge nkumbulo uwo wose.’

³⁸Oyu ndiwo nlayo nkulu tjose kakale we kutanga.

³⁹Ne we bubili unonga iwo, unoti, ‘Ida mmwe nthu sekwa unozwida.’

⁴⁰Nlayo wose ne balebesambeli bose bakateyegwa mu milayo iyeyi mibili.”

⁴¹Bafarasi bakati batjakakubungana, Jesu kababhuzwa kati,

⁴²“Mokumbula tjini ngekwa Mesiya? Nkololo waani?” Bakadabila beti, “Nkololo wa Dafite.”

⁴³Kati ku bali, “Ngono kwakazha tjini kuti Dafite paakabe ali mu Meya an'dane eti She? Dafite wakati,

⁴⁴“ ‘She bakati kuna She wangu, gala ku luboko gwangu gwe luji kudzina ndibiga zwita zwizo pasi kwe makumbo awo.’

⁴⁵“Ha Dafite en'dana eti ‘She,’ apa ungabe nkololo uwe tjini kene?”

⁴⁶Akuna wakatubula kun'dabila, ngono kudwa mu zhuba ilelo tjose akuna wakambhuzwa dzimwe bhuzo.