Read Kalanga Matewu 23 Bible Online

Matewu 23 - Kalanga bible

Matewu 23

¹Ipapo Jesu kalebeleka ne mibunga ye bathu ne badiyiwa babe eti,

²“Badiyi be nlayo ne Bafarasi bagele mu tjigalo tja Mushe.

³Ndizo itani kuti mulondolodze tjimwe ne tjimwe tjabanomubudza. Koga musitongo shinga zwabanoshinga, ngobe abatoshinga zwabanoleba.

⁴Banosunga mitolo mikukutu inolema beibiga mu mathudzi e bathu, koga ibo tjekwabo basingake bakainyanyula.

⁵Zose zwabanoyita nge zwe mashungwa ndibong'we. Banothama zwitshwegu zwabo zwe mitembezelo[11] zwikabe zwilefu ne mahabi e hazu dzabo dze mitembezelo kabe malefu.

⁶Banoda magalo a pezhugwi mu mizano ne magalo mabuya mu ng'umba dze mitembezelo.

⁷Banoda kulezwiwa ku matengeselo ne kudang'wa nge bathu kuyi, ‘N'diyi.’

⁸Koga imwi amuzofanila dang'wa kuyi ‘N'diyi,’ ngobe muna N'diyi ali ung'ompela koga kakale imwi mose mu zwikamu.

⁹Kakale musitongo dana mmwe muti tate mu shango, ngobe muna tate bang'ompela ba kudzimu.

¹⁰Kene musitongo dang'wa kuyi ‘Ntungamili,’ ngobe muna ntungamili ng'ompela koga Mesiya

¹¹Nkulu tjose pakati kwenyu wakafanila kube nlanda wenyu.

¹²Iye unozwikudza unowoyisiwa pasi na iye unozwiyisa pasi unowokudziwa.

¹³“Yee mme wee! Mapalala imwi badiyi be nlayo ne Bafarasi, batjengedzi ndimwi! Mozhalilila bathu bushe gwe kudzimu. Imwi nge kwenyu amutongina mu bushe gwe Ndzimu kakale amutoletja banoshaka ngina bakangina.[12]

¹⁵“Yee mme wee! Mapalala imwi badiyi be nlayo ne Bafarasi, batjengedzi ndimwi! Moyenda shango yose ne gungwa kushandulila nthu nng'ompela mu bugalimoyo gwe Tjijuta, koga kati ashanduka mukan'yita mwana we mbipo kabili kupinda sekwa muli iko.

¹⁶“Yee mme wee! Mapalala imwi mapofu e batungamili! Moti, ‘Ha mmwe etuna nge Ng'umba ye Ndzimu, akutoti tjimwe, koga ha mmwe etuna nge golide le Ng'umba ye Ndzimu wasungwa ngotuna kukwe.’

¹⁷Mapofu e zwilengwe ndimwi! Tjikulu nditjipi, i golide kene Ng'umba ye Ndzimu inoyita kuti golide liyengemale?

¹⁸Kakale moti, ‘Ha mmwe etuna nge tjibeso, akutoti tjimwe, koga ha mmwe etuna nge tjipo tjipezhugwi kwatjo, wasungwa ngotuna kukwe.’

¹⁹Mapofu e bathu ndimwi! Tjikulu nditjipi, tjipo kene tjibeso tjinoyita tjipo kuti tjiyengemale?

²⁰Ndizo iye unotuna nge tjibeso unotuna nditjo na iko kose kumutjili;

²¹na iye unotuna nge Ng'umba ye Ndzimu unotuna ndiyo, na iye unogala muili.

²²Na iyebo unotuna nge kudzimu unotuna nge tjigalo tje bushe gwe Ndzimu na iye ugele pezhugwi kwatjo.

²³“Yee mme wee! Mapalala imwi badiyi be nlayo ne Bafarasi, batjengedzi ndimwi, mopa tjebugumi* tje matenjana enyu e nvavani ne dili[13] ne kumini. Koga moletjedza zwikulu kwazo zwe nlayo: kusumikilisa kwakalulwama ne mahwilo zogwadza ne kugalamoyo. Mobe muyita izwezwi koga musingalashe zwimwe.

²⁴Mapofu e batungamili ndimwi! Mowungunula nyunyu koga mumidza kamela.

²⁵“Yee mme wee! Mapalala imwi badiyi be nlayo ne Bafarasi, batjengedzi ndimwi! Mosuka kuzhe kwe nkombe ne ndilo koga mukati dzezhele kusazwidziba ne bugovu.

²⁶Nfarasi we bhofu ndiwe! Suka mukati kwe nkombe ne ndilo kutanga, ndizo na kuzhe kwayo kowobe kubuyananabo.

²⁷“Yee mme wee! Mapalala imwi badiyi be nlayo ne Bafarasi, batjengedzi ndimwi! Mofanana ne zwikumbu zwakadzulugwa nge butjena, zwakanaka kuzhe koga mukati zwili zhele mafupa e bathu bakafa ne zwakatemapala.

²⁸Sa ikoko, kuzhe molingika ku bathu muli balulwami, koga mukati muzhele butjengedzi ne jinyo.

²⁹“Yee mme wee! Mapalala imwi badiyi be nlayo ne Bafarasi, batjengedzi ndimwi! Mobakilila zwikumbu zwe balebesambeli mukanakisa zwikumbu zwe balulwami,

³⁰muti, ‘Ha tingabe takatjila mu misi ya bobatategulu bedu, tingabe tisakabhatana nabo mu nshingo we kutebula malopa e balebesambeli.’

³¹Ndizo mozwileba kuti mu bana be bathu bakabulaya balebesambeli.

³²Zhadzisani tjilizanyo tje jinyo la bobatategulu benyu.

³³Nyoka ne nyokana ndimwi! Apa mowotizha tjini kusumikilisigwa kulashigwa mu moto usingadzime?

³⁴Ndizo ndomutumila balebesambeli ne balume bakatjenjela ne badiyi be nlayo. Bamwe babo mowobabulaya mukababambula, bamwe mubaloba mu ng'umba dzenyu dze mitembezelo mukabadziyidza nzi ne nzi.

³⁵Ndizo kowobe pezhugwi kwenyu malopa e balulwami akatebugwa mu shango, kutangisa nge malopa a Abele usina nlandu kunoti mu malopa a Zakhariya nkololo wa Bharakiya wamakabulayila pakati kwe Ng'umba ye Ndzimu ne tjibeso.

³⁶Ndolebesa ndoti kumuli, kose ikoku kowozha pezhugwi kwe bathu bangwenu.

³⁷“Jerusalema, Jerusalema wee! Iwe unobulaya balebesambeli ukakikithidza nge mabgwe ibabo batumwa ku kuli. Ndikangana ndiyemula kukubunganya bana babo se hwuku ibubatila hwukwana dzayo nge mapapilo ayo, koga ulamba.

³⁸Bona, ng'umba iyo yafupatigwa kakale yabe dongo.

³⁹Ndizoke ndokubudza nditi, autowondibona kakale kuswikila uti, ‘Wakakombolegwa iye unozha nge zina la She.’ ”