Read Kalanga Matewu 24 Bible Online

Matewu 24 - Kalanga bible

Matewu 24

¹Jesu kabhuda mu Ng'umba ye Ndzimu, ngono kati atjayenda badiyiwa babe bakanlakidza bakika kwe Ng'umba ye Ndzimu.

²Kabadabila eti, “Mobona kose ikoku kene? Ndolebesa ndoti kumuli, akuna bgwe ling'ompela linowosala lakatiliyana ne limwe, lisingawoligigwa pasi.”

³Kukati Jesu atjigele pezhugwi kwe Dombo le Mitoba, badiyiwa babe bakazha kunli bali boga, ngono bakambhuzwa bakati, “Mutibudze, zwithu izwezwi zowoshingikala lini ne tjilakidzo tje kuzha kwenyu ne tje kupela kwe shango tjowobeni?”

⁴Jesu kabashandula eti, “Ibeni ne njele kuti mmwe asitongo mudzimidza.

⁵Banji banowozha nge zina langu beti, ‘Ndimi Mesiya,’ ngono banowodzimidza banji.

⁶Mowohwa ngekwe ngwa kose ne makwayi e ngwa, koga itani kuti musipaluke moyo. Zwithu izwezwi zwakajalo zwakafanila shingikala, koga bupelo gutjawozha.

⁷Itjaba tjowomukila itjaba ne bushe gukamukila bushe. Kowobe yapo bhamba ne kutengenyeka kwe shango mu magalo akasiyana.

⁸Zose izwezwi zofanana ne kutangisa kwe zwibhayo zwe thumbgwa.

⁹“Ipapo mowosungisiwa kunohwisiwa zogwadza mukabulawa ne zwitjaba zose zowomubenga ngekwe zina langu.

¹⁰Mu tjibaka itjetjo banjinji banowowa mu kugalamoyo kakale banowongana kakale bakabengana.

¹¹Ne balebesambeli be manyepkhwa banjinji banowobe yapo bakadzimidza bathu banji.

¹²Nge kuwanda kwe matjinyo, ludo gwe banji gowotothola.

¹³Koga iye unowodzikitadza kunoti ku bupelo ndiye unowotjidziwa.

¹⁴Ngono ndebo mbuya iyeyi ye bushe inowosumikigwa mu shango yose, guli butendeki mu zwitjaba dzose, ndizo ipapo bupelo gowozha.

¹⁵“Ndizo mowoti mubona kuli mile mu magalo akayengemala ‘Zhithu le mbipo linopaladza,’ lakalebgwa nge kwalo ndi Daniyele nlebesambeli (unobala ngaahwisise),

¹⁶ipapo bamu Judiya ngabatizhile ku matombo.

¹⁷Upezhugwi kwe ng'umba ngaasideluke kunotola zwithu zwimu ng'umba iye.

¹⁸Ngono na iye umu nnda ngaasibgwilile kunotola ngubo iye.

¹⁹Yee mme wee! Kowobangalala seni kumuli imwi bakadzi bakazwisenga ne banomwisa mu misi iyeyo.

²⁰Tembezelani kuti kutizha kwenyu kusibe mu mbaba kene mu zhuba le Sabata;

²¹ngobe ipapo kowobe ne kudziyidziwa kukulu kusathu kukabe yapo kudwa mu kutangisa kwe shango kuwoti ngwenu, kakale kusingatjawobe yapo.

²²Ha mazhuba iyawo akabe asatapudziwa, kwabe kusina unowotjidziwa. Koga ngekwe bashalugwa, mazhuba iyawo anowotapudziwa.

²³“Mu misi iyeyo ha mmwe eti kumuli, ‘Bonani woyu Mesiya kene eti, bonani hwouje,’ musitongo duma ikoko.

²⁴Bomesiya be manyepkhwa ne balebesambeli be manyepkhwa banowobe yapo bakayita zwilakidzo zwikulu ne matjenamiso makulu kudzimidza na ibo bashalugwa ha kwabe kutubuka.

²⁵Bonani, ndamubudza tjibaka tjitjiyapo.

²⁶“Ndizo ha beti kumuli, ‘Bonani umu tjilambanyika,’ musibhudileko. Kene beti, ‘Bonani, umukati kwe ng'umba,’ musitongo duma,

²⁷ngobe se lupenyo gwe vula gudwa ku bhezhuba gukaboneka ku golombedzo, kowojalo ne kuzha kwe Nkololo we Nthu.

²⁸“Pana itumbu magola anokubunganapo.

²⁹“Koga tjinyolotjo shule kwe budziyili gwe mazhuba iyawo, zhuba lowoti zwii ne mwedzi autowopa tjedza tjawo. Nyenyedzi dzowowila pasi na zose zwe zhuzhugwi zowotengenyeka.

³⁰Mu misi iyeyo tjilakidzo tje Nkololo we Nthu tjowoboneka zhuzhugwi, ndizo njudzi dzose dze shango dzowolila. Dzowobona Nkololo we Nthu ezha ali mu makole ana simba ne gudzo gulu.

³¹Unowotuma batumwa babe be kudzimu kuti badane ne nsindo nkulu we lunyanga, ngono banowokubunganya bashalugwa babe kudwa mu mbizho nna dze shango ne kudwa ku bupelo gwe kudzimu kunoti mu gumwe bupelo.

³²“Muzwidiye tjidiyo tje mpaya, tjinyolotjo ha thabi dzawo dzibe nyolo dzidusa mazhani, moziba kuti tjilimo tji pejo.

³³Ndizo sa ikoko, ha mubona zwithu zose izwezwi muzibe kuti wabe pejo, pa nkoba.[14]

³⁴Ndolebesa ndoti kumuli, zwithu izwezwi zowoshingikala imwi bathu bangwenu musathu mapinda.

³⁵Zhuzhugwi ne pasi zowopinda koga matama angu anowosala.

³⁶“Akuna unoziba ngekwe zhuba ilelo kene tjibaka itjetjo, kene bali ibo batumwa be kudzimu, kene iye Nkololo[15] kuzhe kwa Tate boga.

³⁷Sekwa kwakabe kuli iko mu misi ya Nuwa, kowobe sa ikoko pa kuzha kwe Nkololo we Nthu.

³⁸Ngobe mu misi iyeyo, nkubila usathu ukabe yapo bathu bakabe beja, beng'wa, belobola, belobodza, kunoti mu zhuba Nuwa laakangina mu n'goro.

³⁹Bakabe basingazibe tjimwe kudzina nkubila uzha ubatola bose. Ndiko sekwa kunowobe iko pa kuzha kwe Nkololo we Nthu.

⁴⁰Balume babili banowobe bali mu nnda, nng'ompela unowotogwa mmwe kasiyiwa.

⁴¹Bakadzi babili banowobe bekwiya pa gwiyo, nng'ompela unowotogwa mmwe kasiyiwa.

⁴²“Ndizo galani makalindila, ngobe amutoziba kuti She wenyu unowozha mu zhuba lipi.

⁴³Ngono hwisisani woku, ha mweni we ng'umba akabe aziba kuti mbava inowozha nge tjibaka tjipi tje busiku, unobe akalinda kasiletje ng'umba iye ipkhwanyiwa.

⁴⁴Ndizo namwibo galani makazwilulwamisa, ngobe Nkololo we Nthu unowozha nge tjibaka tjamusakakumbula.

⁴⁵“Ndiupi ngono nlanda unogagwabgwe, wakatjenjela unowoti tetshi kambiga kabe nlingilili we balanda mu nsha uwe kuti abape zojiwa zwabo nge tjibaka tjakalingisana?

⁴⁶Wakakombolegwa nlanda iwoyo ungati tetshi uwe ebuya kawana eshinga sa ikoko.

⁴⁷Ndolebesa ndoti kumuli, unowompa masimba mu zwithu zose zwaanazo.

⁴⁸Koga ha nlanda iwoyu ali mbi ebe ezwidwa eti, ‘Tetshi wangu wanonoka,’

⁴⁹ebe etangisa kuloba balanda bamwe, eja eng'wa ne zwidakwa,

⁵⁰tetshi wa iwoyo nlanda unowobuya mu zhuba laasakankumbula nenge tjibaka tjaasingazibe.

⁵¹Unowonloba kunogwadza kan'gadza ne batjengedzi. Ikoko kowobe yapo kulila ne kulobanya meno nge kugwadziwa kukulu.