Read Kalanga Matewu 26 Bible Online

Matewu 26 - Kalanga bible

Matewu 26

¹Jesu kati aleba zwithu zose izwezwi, kadwa badiyiwa babe kati,

²“Sekwa munoziba kuti Nzano we Kupinda pezhugwi wasaligwa nge mazhuba mabili, ngono Nkololo we Nthu unowolongwa mu maboko a ibabo banowombambula.”

³Ipapo bapirisiti bakulu ne bakulu be Bajuta bakakubungana mu magalo e Ntungamili we bapirisiti wakabe edang'wa Kaifasi,

⁴ngono bakalangana kusunga Jesu nge kwakasumbikala kuti bambulaye.

⁵Koga bakati, “Kusi pakati kwe nzano, ngobe kungamuka zhoba pakati kwe bathu.”

⁶Jesu kati ali mu Bhetani mu ng'umba ya Simoni wakatongo gwala mapele,

⁷mmwe nkadzi kazha kunli ana tjilongo tjakathamiwa nge bgwe linoyi alabhasita tjina mafuta e themba ipezhugwi kaatebulila mu nsholo wa Jesu ali gele pa tafuli eja.

⁸Badiyiwa bakati bebona ikoko bakagwadzamoyo, ngono bakabhuzwa beti, “Mafuta anozanisigwani iyawa?

⁹Mafuta iyawa abe angatengesiwa nge themba ipezhugwi kwazo, ngono mari kapiwa bashayi.”

¹⁰Jesu kati aziba ikoku, kati ku bali, “Ini mudziyidza nkadzi iwoyu? Washinga tjithu tjakanaka mundili.

¹¹Bashayi munabo misi yose, koga imi amutowobe nami misi yose.

¹²Kudila mafuta iyawa mu mbili wangu, wakushinga kundilulwamisila mbiganyo yangu.

¹³Ndolebesa ndoti kumuli, kumwe ne kumwe kunowosumikigwa Ndebo mbuya iyeyi mu shango yose, tjashingwa nge nkadzi iwoyu tjowolebgwabo, kuti libe gumbuludzo nge kukwe.”

¹⁴Ipapo mmwe we bali gumi lina babili, wakabe edang'wa Judasi Isikariyoti, kayenda ku bapirisiti bakulu ngono

¹⁵kabhuzwa eti, “Mowondipani ha ndingamupa iye?” Ndizo bakanlipa mari e siliva ali makumi matatu.

¹⁶Kudwa ipapo tjose Judasi kashaka tjibaka tjaangabapa Jesu nditjo.

¹⁷Mu zhuba le kutanga le Nzano we Tjiwunga* tjisina mbidzo badiyiwa bakazha kuna Jesu bakambhuzwa beti, “Moshaka kuti timululwamisile ngayi kujila zojiwa zwe Nzano we Kupinda pezhugwi?”

¹⁸Kashandula eti, “Yendani mungine mu nzi nkulu, mowoswika ku mmwe nlume, mumbudze muti, ‘N'diyi bakati, tjibaka tjangu tjasedzela. Ndowojila zojiwa zwe Nzano we Kupinda pezhugwi ne badiyiwa bangu ku ng'umba iyo.’ ”

¹⁹Ndizo badiyiwa bakashinga sekwa balayigwa ndi Jesu, bakalulwamisa zojiwa zwe Kupinda pezhugwi.

²⁰Kukati madekwana, Jesu kagala pa tafuli eja ana badiyiwa bali gumi lina babili.

²¹Bakati beja kati ku bali, “Ndolebesa ndoti, mmwe wenyu unowondiwonga.”

²²Bakazhala buyendasi, ngono mmwe ne mmwe wabo kati kunli, “Apa ndimi kene She?”

²³Jesu kashandula eti, “Iye unoseba nami mu ndilo ndiye unowondiwonga.

²⁴Nkololo we Nthu unowofa sekwa kwakakwagwa nge kukwe. Koga Yee mme wee! Wapalala iwe nlume unowonga Nkololo we Nthu! Kwabe kuyita ha nlume iwoyo akabe asagala azwagwa.”

²⁵Ipapo Judasi iye wakan'wonga kati, “N'diyi, apa ndimi kene?” Jesu kashandula eti, “Waleba.”

²⁶Bakati batjaja, Jesu katola tjiwunga, katjikombolela, katjipemula katjipa badiyiwa babe eti, “Tolani muje, oku mbili wangu.”

²⁷Katola bhepe le nkumbi we zhambi, ngono kaukombolela kabapa ilo eti, “Ing'wani mulili mose.

²⁸Oku malopa angu e tjidumano anotebuligwa banji mu kuzwiibhatigwa matjinyo.

²⁹Ndomubudza nditi, anditowong'wa kakale kwe ntjelo iwoyu we nzhambi kuswikila zhuba landinowoung'wa butshwa namwi mu bushe gwa Tate bangu.”

³⁰Bakati basinomba lumbo gunokudza Ndzimu, bakabhuda bakayenda ku Dombo le Mitoba.

³¹Ipapo Jesu kabadwa kati, “Busiku igogu mowopalala mose nge kwangu, ngobe kwakakwagwa kuyi, ‘Ndowobulaya nlisi, ngono pkhwizi dze danga dzowopalala.’

³²Koga ha ndamusiwa ndowoyenda mbeli kwenyu ku Galili.”

³³Pita kashandula eti, “Kene bose bepalala nge kwenyu, imi andingamusiye.”

³⁴Jesu kashandula eti, “Ndolebesa ndoti, mu busiku igo igogu, gukurume lowoti lisathu likalila, unowondizwilandula katatu.”

³⁵Koga Pita kalebeleka eti, “Imi andingamuzwilandule bukulu ndingafa namwi.” Ngono bose bamwe badiyiwa bakalebabo sa ikoko.

³⁶Ipapo Jesu kayenda ne badiyiwa babe pathu panodang'wa Getsemane, ngono kati ku bali, “Galani ipapa imi nditjayenda apaje kunotembezela.”

³⁷Wakatola Pita ne bakololo babili ba Zebhedi kayenda nabo, ngono kangina buyendasi ne kudziyidzika kukulu.

³⁸Ipapo kati ku bali, “Meya yangu izhele buyendasi kukulu kwandingafa. Salani ipapa mulinde nami.”

³⁹Ngono kapindila mbejana kawila pasi nge buso katembezela eti, “Tate bangu ha kutubuka, bhepe ileli le kudziyidzika ngalindipinde. Nenguba kwakajalo, musiyite kuda kwangu, itani kuda kwenyu.”

⁴⁰Ngono kabgwilila ku badiyiwa babe, ngono kawana bakayizela, ndizo kabhuzwa Pita eti, “Apa mabe musingake mukatubula kulinda nami awara ing'ompela kene?

⁴¹Lindani mutembezele, kuti ndizo musingine mu kulikwa. Meya inoda tjose, koga nyama inokong'wa.”

⁴²Kayenda gwe bubili katembezela eti, “Tate bangu, ha kusingatubuke kuti bhepe ileli lekudziyidzika lindipinde, ndisaling'wa, kuda kwenyu ngakushingikale.”

⁴³Kati ebuya kakale kabawana bakayizela, ngobe mesho abo akabe elema nge hwope.

⁴⁴Ngono kabasiya kayenda kakale kanotembezela gwe butatu eleba matama iwo zwawo.

⁴⁵Kudwapo kazha ku badiyiwa babe kati ku bali, “Apa mutjakayizela munyaluluka kene? Lingani, tjibaka tjasedzela, ngono Nkololo we Nthu unowongegwa mu maboko e batjinyi.

⁴⁶Milikani, ngatiyendeni, ngobe n'wongi wangu wabe pejo.”

⁴⁷Jesu kati atjalebeleka, Judasi, mmwe we bali gumi lina babili, kaswika. Wakabe ana mbunga nkulu we bathu bakasenga mathumo ne dziswimbo, batumwa nge bapirisiti bakulu ne bakulu be Bajuta.

⁴⁸N'wongi wakabe abapa tjilakidzo eti, “Iye wandinowoputa ndiye, mumbhate.”

⁴⁹Judasi kayenda pana Jesu tjinyolotjo kati kunli, “Dumilani N'diyi!” Ngono kamputa.

⁵⁰Jesu kati kunli, “Nzwalani, ini uli ipapa?”[16] Ipapo balume bakasedzela bakabhata Jesu, bakansunga.

⁵¹Mmwe we bakabe bana Jesu kashomola bukanu gugwe nge luboko, katema nlanda we mpirisiti nkulu kanthubula zebe.

⁵²Jesu kati kunli, “Bgwiliza bukanu gugo mu magalo ago, ngobe bose banoshingisa bukanu banowofa nge bukanu.

⁵³Autokumbula kuti ndingakumbila kuna tate bangu, tjinyolotjo bakandipa miphatho ye ngwa dze batumwa be kudzimu inopinda gumi lina mibili kene?

⁵⁴Matama e hwalo dze Ndzimu angakowoshingikala tjini kene anoti, kwakafanila shingikala ndi iyeyo zila.”

⁵⁵Ipapo Jesu kati ku mbunga iwoyu we bathu, “Apa mabhuda se munoyenda ku tjigebeng'a kene, makasenga makanu ne swimbo kuwonditola? Misi yose ndakagala mu Ng'umba ye Ndzimu ndidiya, koga mukasindisunge.

⁵⁶Koga kose ikoku koshingikala kuti ndizo matama akakwagwa nge balebesambeli asiwile pasi.” Ipapo badiyiwa bose bakanfupatila bakatizha.

⁵⁷Ibabo bakabe basunga Jesu bakansa kuna Kaifasi Ntungamili we bapirisiti kwakabe kwakakubunganila badiyi be nlayo ne bakulu be Bajuta.

⁵⁸Ngono Pita kantobela ali thambgwana kunoti mu nsha we Ntungamili we bapirisiti. Kangina kagala pasi ne balindi kubona tjinowoshingikala ku bupelo.

⁵⁹Bapirisiti banolaula ne makulukota wose e Bajuta bakabe beshaka butendeki gwe manyepkhwa gungasungisa Jesu kuti abulawe,

⁶⁰koga bakasiguwane, nenguba batendeki be manyepkhwa banjinji bakazha. Gwe bupelo kukazha balume babili,

⁶¹ngono bakati, “Nlume iwoyu wakati, ‘Ndingakolomola Ng'umba ye Ndzimu abuya agubaka kakale mu mazhuba matatu.’ ”

⁶²Ipapo Ntungamili we bapirisiti kamilika kati kuna Jesu, “Apa auna dabilo kene? Batendeki ibaba bakatini nge kuko?”

⁶³Koga Jesu kanyalala. Ntungamili we bapirisiti kati kunli, “Ndokutunisa nge Ndzimu unotjila nditi, Utibudze kene uli iye Mesiya, iye Nkololo we Ndzimu.”

⁶⁴Jesu kati, “Waleba. Koga ndomubudza nditi, kudwapo mowobona Nkololo we Nthu ali gele ku luboko gwe luji gwe Masimba, ezha mu shango ali mu makole e kudzimu.”

⁶⁵Ipapo Ntungamili we bapirisiti kapalula hazu iye eti, “Watuka Ndzimu! Titjashakilani batendeki bamwe kakale? Bonani, ngwenu mazwihwigwa kutuka Ndzimu kukwe.

⁶⁶Moipedza tjini?” Bakashandula beti, “Wakafanila kufa.”

⁶⁷Ipapo bakanthwila mate mu buso, bakanloba. Bamwe bakampkhwaula

⁶⁸beti, “Utibudze iwe Mesiya. Ndiani wakuloba?”

⁶⁹Pita wakabe ali gele mu nsha, ngono kukazha nlandakadzi kati kunli, “Nawebo wabe una Jesu we Galili.”

⁷⁰Koga kalandula mbeli kwabo eti, “Anditoziba tjaunoleba nge kwatjo.”

⁷¹Kati ebhudila kuzhe ku nkoba kabong'wa nge mmwe nlandakadzi, kakale kadwa bathu ba ipapo kati, “Nlume iwoyu wabe ana Jesu we Nazareta.”

⁷²Kalandula kakale etuna eti, “Anditoziba nlume iwoyu!”

⁷³Shule kwe tjibaka tjifupi, bakabe bali mile ipapo bakayenda kuna Pita ngono bakati kunli, “Malebeswa tjose u mmwe wabo, ngobe lebeleka kuko kolakidza kujalo!”

⁷⁴Ipapo katangisa kuzwilonga bhiso kakale etukana nabo eti, “Anditoziba nlume iwoyu!” Tjinyolotjo gukurume likalila.

⁷⁵Ipapo Pita kakumbula dama lakabe lalebgwa ndi Jesu eti, “Gukurume lowoti lisathu likalila unowobe wandizwilandula katatu.” Ndizo kabhudila kuzhe kalila kwazo.