Read Kalanga Matewu 27 Bible Online

Matewu 27 - Kalanga bible

Matewu 27

¹Kukati mangwanana bapirisiti bose bakulu ne bakulu be Bajuta bakalangana kubulaya Jesu.

²Bakansunga nge mitjili, bakayenda naye bakansa kuna Pilato nlauli.

³Kukati Judasi, we n'wongi wa Jesu ebona kuti Jesu wabong'wa nlandu, kazwibona nlandu kabgwiliza mari e siliva ali makumi matatu ku bapirisiti bakulu ne bakulu be Bajuta

⁴eti, “Ndatjinya nge kuti ndawonga lopa lisina nlandu.” Koga bakan'dabila beti, “Oko kodwani mutili kene. Nlandu uwo.”

⁵Ndizo Judasi kaposela mari mu Ng'umba ye Ndzimu, ngono kabhuda, kayenda kanozwisungilila.

⁶Bapirisiti bakulu bakanunga mari iyawo, ngono bakati, “Ate kuli mu nlayo kulonga mari iyawa mu dula, ngobe mari e malopa.”

⁷Ndizo bakakumbuludzana, bakatenga nnda we mbumbi we majegwa beuyita pathu pe zwikumbu zwe bazhi.

⁸Ndizo nnda iwoyo udang'wa Nnda we Malopa na nasi.

⁹Ipapo matama e nlebesambeli Jeremiya akasiwile pasi anoti, “Bakatola makumi matatu e mari e siliva ali themba yakabigigwa iye nge bathu bamwe be Iziraela,

¹⁰ngono bakaashingisa kutenga nnda we mbumbi we majegwa sekwa ndakalayiwa ndi She.”

¹¹Jesu kama mbeli kwe nlauli, ngono nlauli kambhuzwa kati, “Ndiwe Mambo we Bajuta kene?” Jesu kati kunli, “Waleba.”

¹²Kukati etilikwa nlandu nge bapirisiti bakulu ne bakulu be Bajuta kasidabile.

¹³Ipapo Pilato kambhuzwa kati, “Apa unohwa butendeki gwabanopa nge kuko kene?”

¹⁴Koga Jesu kasitongo shandula, kene kuli dama ling'ompela; kukatjenamisa nlauli kwazo.

¹⁵Kwakabe kuli wolobela kwe nlauli kuti nge tjibaka tje Nzano we Kupinda pezhugwi, asunungulile bathu mmwe nsungwa wabada.

¹⁶Nge tjibaka itjetjo bakabe bana nsungwa wakabe ezibgwa kwazo edang'wa Bharabhasi.

¹⁷Ndizo kukati mbunga we bathu wakubungana, Pilato kababhuzwa eti, “Moshaka ndimusunungulila ani, Bharabhasi kene Jesu unodang'wa Mesiya?”

¹⁸Wakabe eziba kuti bazhisa Jesu kunli nge ndandala koga.

¹⁹Kukati Pilato ali gele mu tjigalo tje nsumikilisi, nkadzi uwe kantumila dama linoti, “Usitongobe ne tjimwe tjaunoyita ngekwe nlume iwoyu usina nlandu, ngobe ndadziyidzika kwazo nasi mu hwope nge kukwe.”

²⁰Koga bapirisiti bakulu ne bakulu be Bajuta bakakulumbidza mbunga we bathu kukumbila Bharabhasi nenge kuti Jesu abulawe.

²¹Nlauli kababhuzwa eti, “Ndiupi we babili wamunoshaka kuti ndimusunungulile iye?” Bakashandula beti, “Bharabhasi.”

²²Pilato kabhuzwa eti, “Ndishingeni ngono ndi Jesu unodang'wa Mesiya?” Bakashandula bose beti, “Ngaabambugwe!”

²³Pilato kabhuzwa eti, “Ngekutini? Watjinyani?” Koga bakamimilila pezhugwi beti, “Ngaabambugwe!”

²⁴Kukati Pilato ebona kuti akuna tjaangatubula, kakale kuti zhoba inowobe hwulu, katola vula kangula maboko awe mbeli kwe mbunga we bathu. Kati, “Imi andina nlandu mu malopa e nlume iwoyu, bonani imwi!”

²⁵Bathu bose bakadabila beti, “Malopa awe ngaabe pezhugwi kwedu ne bana bedu!”

²⁶Ipapo kabasunungulila Bharabhasi, koga kayita kuti Jesu alobgwe ekompa ibo kunobambugwa.

²⁷Ipapo babhayani be nlauli bakalonga Jesu mu ng'umba ye nlauli ngono bakankubunganyila mphatho wose.

²⁸Bakambula bakanfukidza hazu ye mbala nshaba wakabondelela,

²⁹ipapo bakaluka tjiala tje mihwa bakammbadza itjo mu nsholo. Bakambhatisa lushanga mu luboko gwe luji, ngono bakathigama mbeli kukwe bakan'dadila beti, “Dumilani Mambo we Bajuta!”

³⁰Bakanthwila mate, ngono bakatola lukuni bakanloba ndigo mu nsholo.

³¹Bakati ban'dadila, bakammbula hazu bakambadza zwiambalo zwizwe. Ipapo bakayenda naye kunommbambula.

³²Bakati beyenda, bakashangana ne mmwe nlume edwa ku Sirene unodang'wa Simoni ngono bakankombeledza kusenga tjileyanyo.

³³Bakati beswika pathu panodang'wa Gologota, kodwiwa kuti Pathu pe ipepe tje nsholo.

³⁴Bakapa Jesu nkumbi wakashanganyiwa ne ndulu kuti aung'we, koga kati alabila kalamba kuung'wa.

³⁵Bakati bambambula, bakakobana zwiambalo zwizwe nge kukandila.

³⁶Bakagala pasi bakanlinda ipapo.

³⁷Tjapezhugwana kwe nsholo uwe bakakwala nlandu uwe beti, “OYU NDI JESU, MAMBO WE BAJUTA.”

³⁸Batoleli babili bakabambugwa naye, mmwe ku luboko gwe luji mmwe kuna gwe lumeshwe.

³⁹Bapindi bakansapula, bezunguza misholo yabo

⁴⁰beti, “Iwe wakati ungakolomola ng'umba ye Ndzimu ukaibaka mu mazhuba matatu, uzwitjidze! Deluka mu tjileyanyo, ha uli Nkololo we Ndzimu!”

⁴¹Bapirisiti bakulu ne badiyi be nlayo ne bakulu be Bajuta ben'dadilabo beti;

⁴²“Wakatjidza bamwe, koga aatotubula kuzwitjidza! Ndiye mambo we Baiziraela, ngaadeluke ngwenu mu tjileyanyo, ndizo towogalamoyo munli.

⁴³Unogalabgwe mu Ndzimu. Ndzimu ngaunsunungule ngwenu ha unshaka, ngobe wakati, ‘Ndi Nkololo we Ndzimu.’ ”

⁴⁴Sa ikokobo batoleli bakabe babambugwa naye bakansapulabo.

⁴⁵Kwakabe kuli tjibaka tje masikati makulu, ngono kukabe zhalima mu shango yose kuswikila tjibaka tje butatu matewuko.

⁴⁶Nge tjibaka tje butatu mu matewuko iyawo Jesu kamimila eti, “Eli, Eli, lama sabakatani?” Kunodwa kuti, “Ndzimu wangu, Ndzimu wangu, apa mandilashilani kene?”

⁴⁷Kukati bamwe bamile ipapo behwa ikoko bakati, “Nlume iwoyu unodana Elija.”

⁴⁸Tjinyolotjo mmwe wabo kalabuka katola lungudze kagudubika mu nkumbi wakatyorowa kagubhayila mu lushanga kapa Jesu kuti ang'we.

⁴⁹Koga bamwe bakati, “Tongoma, ngatiboneni kuti kene Elija unowozha kantjidza.”

⁵⁰Ngono kukati Jesu amimila kakale nge hwi lipezhugwi, kapela.

⁵¹Nge tjibaka itjetjo, tjisitilo tje Ng'umba ye Ndzimu tjikapaluka na pakati, kudwa pezhugwi kunoti pasi. Shango ikatengenyeka ne shongwe dzikaphatuka.

⁵²Zwikumbu zwikazhuka, ngono mibili ye bathu banji bakayengemala bakabe bafa ikamusiwa.

⁵³Bakabhuda mu zwikumbu shule kwe kumuka kwa Jesu, bakangina mu nzi wakayengemala bakabong'wa nge bathu banjinji.

⁵⁴Kukati nlauli we babhayani bali zana (100) ne baakabe anabo bakabe bakalinda Jesu bebona kutengenyeka kwe shango na kose ikoko kwakashingikala bakatja, ngono bakati, “Tjoselele wabe ali Nkololo we Ndzimu iwoyu!”

⁵⁵Bakadzi banjinji bakabe bakalingilila bali thambgwana kudwa ipapo. Bakabe batobela Jesu kudwa ku Galili kumbhatsha.

⁵⁶Pakati kwabo kwakabe kuna Mariya we Magadala na Mariya mme ba Jakubo na Josefa, na mme be bakololo ba Zebhedi.

⁵⁷Kukati madekwana kukazha nlume wakafuma unodang'wa kuyi Josefa edwa ku Arimateya, wakabe na iye ali n'diyiwa wa Jesu.

⁵⁸Wakayenda kuna Pilato kakumbila itumbu tja Jesu. Pilato kalaula kuti atjipiwe.

⁵⁹Josefa katola itumbu katjipetela nge jila buyanana,

⁶⁰ngono katjibiganya mu ikumbu tjitje tjaakabe akopola mu shongwe. Kakunguludzila bgwe pa nkoba we ikumbu ngono kayenda.

⁶¹Mariya we Magadala ne mmwe Mariya bakabe bali gele ipapo kulingisana nge ikumbu.

⁶²Kukati tjimuka, kuli zhuba linotobeledza le kululwamisila Sabata, bapirisiti bakulu ne Bafarasi bakakubungana pana Pilato bakan'dwa bakati,

⁶³“She, tokumbula kuti wakati atjatjila ntjebeli iwouje kati, ‘Shule kwe mazhuba matatu, ndowomuka.’

⁶⁴Ndizo dusani ndaulo kuti kulindiwe ikumbu tjitje kudzina kube zhuba le butatu. Kungati pamwe badiyiwa babe bakayenda bakakwiba itumbu bekodwa bathu beti ‘Wamuka mu bafi,’ ngobe ha kungashingikala, butjebeli gwa shule gowobe gungapinda gwe kutanga.”

⁶⁵Pilato kadabila eti, “Tolani babhayani banolinda, muyende munotjilinda sekwa mungatubula.”

⁶⁶Ndizo bakayenda bakanolulwamisa ikumbu nge kubuwa bgwe nenge kulindisa balindi.