Read Kalanga Matewu 28 Bible Online

Matewu 28 - Kalanga bible

Matewu 28

¹Shule kwe Sabata, mu mazhokuyedza e zhuba le kutanga mu tshipi, Mariya we Magadala na Mariya mmwe bakayenda kunobona ikumbu.

²Kukabe ne kutengenyeka kwe shango kukulu, ngobe ntumwa wa She wakadeluka kudwa kudzimu, kayenda ku ikumbu kakunguludza bgwe kagala pezhugwi kwalo.

³Wakabe elingika se lupenyo gwe vula ne zwiambalo zwizwe zwili zwitjena se kapuku.

⁴Balindi bakantja kwazo bakatetema bakasala benga bathu bafa.

⁵Ntumwa we kudzimu kati ku bakadzi ibabo, “Musitje, ngobe ndoziba kuti moshaka Jesu wakabambugwa.

⁶Aapo ipapa, wamuka sekwa akaleba. Izhani mubone paakabe ali lele.

⁷Kudwapo muyende tjinyolotjo munobudza badiyiwa babe muti, ‘Wamuka mu bafi,’ ngono unowoyenda mbeli kwenyu ku Galili, ikoko mowombona. Bonani ndamubudza.”

⁸Ndizo bakadzi ibabo bakadwa pa ikumbu tjinyolotjo betja, koga bakashatha kwazo, ngono bakalabuka bakanobudza badiyiwa babe.

⁹Ngono Jesu kabashangamidza kati, “Dumilani.” Bakazha kunli bakabhata makumbo awe bakan'namata.

¹⁰Ipapo Jesu kati ku bali, “Musitje, yendani mubudze zwikamu zwangu bayende ku Galili, banowondibona ikoko.”

¹¹Kukati bakadzi batji mu zila, bamwe be balindi bakangina mu nzi nkulu, ngono bakabudza bapirisiti bakulu tjimwe ne tjimwe tjakashingikala.

¹²Kukati bapirisiti bakulu bashangana ne bakulu be Bajuta, balangana, bakapa babhayani mari manjinji ali tjizwimba nlomo,

¹³beti ku bali, “Muti, ‘Badiyiwa babe bakazha pakati kwe busiku bakankwiba iswi titjakayizela.’

¹⁴Ikoku akungazha mu zebe dze nlauli, towon'gutsha kuti timuduse mu mbatsha.”

¹⁵Ndizo babhayani bakatola mari, bakashinga sekwa badwiwa. Ndizo lungano igogu gwakadwilidzwa pakati kwe Bajuta kuswikila ngwenu.

¹⁶Ipapo badiyiwa bali gumi lina ng'ompela bakayenda ku Galili ku dombo Jesu laakabadwa kuti bayende kulili.

¹⁷Bakati bembona bakan'namata, koga bamwe babo bakabe bedudumwa.

¹⁸Ipapo Jesu kazha ku bali kabadwa kati, “Simba lose kudzimu ne mu shango lakapiwa imi.

¹⁹Ndizo yendani muyite badiyiwa mu zwitjaba zose mubadubike nge zina la Tate ne le Nkololo ne le Meya yakayengemala,

²⁰mubadiya kulondolodza tjimwe ne tjimwe tjandakamulaya nge kwatjo. Ngono nge malebeswa ndinamwi misi yose kunoti ku bupelo gwe shango.”