Read Kalanga Matewu 4 Bible Online

Matewu 4 - Kalanga bible

Matewu 4

¹Ipapo Meya ikayisa Jesu ku tjilambanyika kulikwa ndi Satani.

²Wakazwinyima zojiwa mazhuba ali makumi manna ne masiku ali makumi manna, ngono shule kabe ne zhala.

³Nliki kazha kunli kati, “Ha uli Nkololo we Ndzimu idwa mabgwe iyawa abe zwiwunga.”

⁴Jesu kanshandula kati, “Kwakakwagwa kuyi, ‘Nthu aangatjile nge tjiwunga koga, koga nge dama limwe ne limwe linodwa mu nlomo we Ndzimu!’ ”

⁵Ipapo Satani kantola kan'yisa ku Jerusalema, nzi nkulu wakayengemala, kammisa pa tjilungwane tje Ng'umba ye Ndzimu

⁶ngono kati kunli, “Ha uli Nkololo we Ndzimu, uzwiposele pasi, ngobe kwakakwagwa kuyi, “ ‘Unowodwa batumwa bawo be kudzimu nge kuko. Ngono banowokugama, kuti usilobe gumbo lilo mu bgwe.’ ”

⁷Jesu kanshandula kati, “Kwakakwagwabo kuyi ‘Usilike She Ndzimu uwo.’ ”

⁸Kakale Satani kantola kantathisa dombo lefu lefu kwazo kanlakidza mibuso yose ye shango ne bubuya gwayo.

⁹Ngono Satani kati kunli, “Kose ikoku ndowokupa ha ungawila pasi ukandinamata.”

¹⁰Jesu kati kunli, “Idwa pandili Satani, ngobe kwakakwagwa kuyi, ‘Namata She Ndzimu uwo ushingile iye ega!’ ”

¹¹Ipapo Satani kansiya, ngono batumwa be kudzimu bakazha bakambhatsha.

¹²Jesu wakati ehwa kuti Johani wasungwa, kabhuda mu ntuthu we Jorodani kayenda ku Galili.

¹³Ngono wakati ebhuda mu Nazareta kayenda kanogala ku Kapenaume pejo ne gungwa mu ntuthu we Zebhuloni ne Nafutali

¹⁴kuti kusiwile pasi matama akalebgwa ndi Isaya nlebesambeli eti,

¹⁵“Shango ye Zebhuloni ne shango ye Nafutali, kuyendila ku gungwa, seli kwe Jorodani, Galili we be zwitjaba!

¹⁶Bathu bakabe begala mu zhalima bakabona tjedza tjikulu. Ibaba bakabe begala mu ntuthu we zhalima le lufu, tjedza tjabepo.”

¹⁷Kudwa mu tjibaka itjetjo Jesu katangisa kusumikila eti, “Shandukilani matjinyo enyu, ngobe bushe gwe kudzimu gwasedzela.”

¹⁸Jesu kati eyenda akasupha nge gungwa gwe Galili, kabona bana be nthu babili, Simoni unoyi Pita na Enduru nnung'una uwe belashila gwanga mu gungwa, ngobe bakabe bali babhati be hwobe.

¹⁹Jesu kati ku bali, “Munditobele ngono ndowomuthama babhati be bathu.”

²⁰Tjinyolotjo bakasiya njanga dzabo bakantobela.

²¹Kati, eyendila mbeli kudwa ipapo, kabona bamwe bana be nthu babili, Jakubo nkololo wa Zebhedi na Johani nnung'una uwe, bali mu n'goro bana tate babo Zebhedi beluka njanga dzabo ngono kabadana.

²²Tjinyolotjo bakasiya n'goro na tate babo bakantobela.

²³Jesu kayenda ntuthu wose we Galili ediya mu ng'umba dzabo dze mitembezelo esumikila ndebo mbuya ye bushe kakale epodza njigwele ne buworoworo gumwe ne gumwe pakati kwe bathu.

²⁴Tjilumbi tjitje tjakahwika Siriya yose, ngono bathu bakazhisa kunli bose banogwala njigwele dzakasiyana siyana ne zwibhayo ne bakasungwa nge meya mibi ne bana zwifafa ne bakalobgwa nge gulukadzi, ngono kabapodza.

²⁵Mibunga mikulu yakantobela idwa ku Galili ne ku Dekapoli ne ku Jerusalema ne ku Judiya ne ntuthu useli kwe Jorodani.