Read Kalanga Matewu 5 Bible Online

Matewu 5 - Kalanga bible

Matewu 5

¹Jesu wakati ebona mibunga ye bathu katatha dombo kagala pasi. Badiyiwa babe bakazha kunli,

²ngono katangisa kubadiya sahwoku:

³“Bakakombolegwa bashayi mu meya, ngobe bushe gwe kudzimu nge gwabo.

⁴Bakakombolegwa banolila, ngobe banowonyaladziwa.

⁵Bakakombolegwa bana mimoyo minyolo, ngobe banowothuwa shango.

⁶Bakakombolegwa bana zhala ne nyota ye ndulamo, ngobe Ndzimu unowobagutsha.

⁷Bakakombolegwa bana ngoni, ngobe banowohwigwa ngoni.

⁸Bakakombolegwa bana mimoyo mitjena, ngobe banowobona Ndzimu.

⁹Bakakombolegwa bagadzanyi, ngobe banowodang'wa bana be Ndzimu.

¹⁰Bakakombolegwa banodziyidzigwa ndulamo, ngobe bushe gwe kudzimu nge gwabo.

¹¹“Makakombolegwa imwi ha bathu bemutuka kakale bemudziyidza kakale bemulebela bubi gose gwe manyepkhwa nge kwangu,

¹²shathani mu pululudze, ngobe mbhayilo wenyu nkulu u kudzimu, ngobe banomudziyidza sekwa bakadziyidza balebesambeli bakazha mbeli kwenyu.

¹³“Ndimwi munyu we shango, koga ha munyu washuluka, ungabgwilizigwa njo wawo tjini wali? Ha utjina tjawakalulwamila ha kusi kulashigwa kuzhe koga kuti utshambiwe nge bathu.

¹⁴“Ndimwi tjedza tje shango. Nzi nkulu wakabakwa pezhugwi kwe dombo aungasumbikike.

¹⁵Bathu naibo abangavoneke bakabe betshibikila lovone nge itundu. Banogubiga patjena gukavonekela mmwe ne mmwe umu ng'umba.

¹⁶Ndizoke tjedza tjenyu ngatjipenye sa ikoko mbeli kwe bathu kuti ndizo babone mishingo yenyu mibuya bakudze Tate benyu ba kudzimu.

¹⁷“Musikumbule kuti ndakazha kuwokolomodza nlayo kene matama e balebesambeli, andizozha kuwozwikolomodza koga ndakazhila kuti matama iyawo ashingikale.

¹⁸Ndolebesa nditi, kudzina kupinda kudzimu ne shango, akuna na iyo shanga tukununu padzili dzose, kene bala dukununu lakakwagwa mu nlayo linowobhuda kudzina kose kushingikala.

¹⁹Iye unotjuluka mmwe ntukununu we milayo iyeyi kadiya bathu kuti bathamebo sa ikoko unowodang'wa ntukunu tjose mu bushe gwe kudzimu, koga iye unowothama kakale kadiya milayo iyeyi unowodang'wa nkulu mu bushe gwe kudzimu.

²⁰Ndomudwa tjose nditi, ha kululwama kwenyu kusingapinde kwe Bafarasi ne badiyi be nlayo, nge malebeswa amungangine mu bushe gwe kudzimu.

²¹“Makahwa kuti kwakadwiwa bathu ba ntolo kuyi, ‘Usibulaye, ngono iye unobulaya unowosumikilisiwa.’

²²Koga ndomubudza kuti iye wagwadzilamoyo ikamu tjitje unowosumikilisiwa. Kakale iye unotuka ikamu tjitje unowodabidzana ne Gulukota, na iye unoti ‘Tjilengwe ndiwe,’ wakalingisana ne moto usingadzime.

²³Ndizo, ha udusa tjipo tjitjo tjinopisiwa pa tjibeso ukakumbula kuti ikamu tjitjo tjong'ong'ola nge kuko,

²⁴siya tjipo itjetjo mbeli kwe tjibeso, uyende. Tje kutanga gadzana ne ikamu tjitjo, ndizo ukoshanduka uwopa tjipo tjitjo.

²⁵“Tjimbidza ugadzane ne una nlandu nawe, mutji mu zila muyenda ku nlayo kuti ndizo iwoyo wakutilika nlandu asidwe ekuyisa ku nsumikilisi, ngono nsumikilisi ekokuyisa ku nlindi, ukoyisiwa ku ng'umba ye busungwa,

²⁶ndokubudza malebeswa nditi, autowobhuda mukati kudzina ulipa nge mari e bupelo.

²⁷“Makahwa kuti kukayi, ‘Musiyite bupombgwe.’

²⁸Koga ndomudwa nditi, iye unolinga nkadzi nge kun'yemula wayita bupombgwe kale naye mu moyo uwe.

²⁹Ha zhisho lilo le luji likuthama kuti uyite jinyo ulikonyombole ulilashe. Koyita, kuti ulashikigwe nge ndungululo ye mbili uwo ing'ompela pana kuti mbili uwo wose ulashigwe mu moto usingadzimike.

³⁰Ne luboko gugo gwe luji ha gukuthama kuti uyite jinyo uguthubule ugulashe. Koyita, kuti ulashikigwe nge ndungululo ye mbili uwo ing'ompela pana kuti mbili uwo wose uyende ku moto usingadzimike.

³¹“Kakale kwakayi, ‘Iye unolamba nkadzi uwe ngaampe lukwalo gwe kunlamba.’

³²Koga ndomudwa nditi, iye unolamba nkadzi uwe kuzhe kwe nlandu we bupombgwe, unonthama kuti abe phombgwe, koga iye unolobola nkadzi wakalambiwa unothama bupombgwe.

³³“Kakale makahwa kuti kwakayi ku bathu ba ntolo, ‘Usitune manyepkhwa, koga wakafanila shingila She tjawatuna nge kwatjo.’

³⁴Koga ndomudwa nditi, musigale matuna, kene nge kudzimu, ngobe tjigalo tje bushe gwe Ndzimu,

³⁵kene nge shango, ngobe tjigalo tje makumbo e Ndzimu, kene nge Jerusalema, ngobe nzi nkulu wa mambo.

³⁶Usitune nge nsholo uwo, ngobe aungashandule vudzi likabe jena kene likabe dema.

³⁷Tjaunoleba ngatjibe ‘Ee’ kene ‘Aa’ koga, ngobe tjimwe ne tjimwe tjinopaphiwa pezhugwi kwa ikoku tjodwa mu bubi.

³⁸“Makahwa kuyi, ‘Zhisho ngalilipiwe nge zhisho kakale zhino nge zhino.’

³⁹Koga ndomudwa nditi, musinyanyayidzane ne nthu mbi. Ha nthu ekuloba mu lushaya gwe luji, umpe gumwe lushaya.

⁴⁰Ngono ha mmwe ekusekesa ekulipisa ekutolela hempe iyo, unletje atole kose ne baki tjitjo.

⁴¹Kakale ha mmwe ekukombeledza kuyenda khilomitha ing'ompela, yenda naye khilomitha mbili.

⁴²Unokukumbila umpe, kakale usinyime unoadzima mukuli.

⁴³“Makahwa kuyi, ‘Ida wawakabakidzana naye, ngono ushime tjita tjitjo!’

⁴⁴Koga ndomudwa nditi, idani zwita zwenyu kakale mutembezelele banomudziyidza,

⁴⁵kuti ndizo mube bana ba Tate benyu ba kudzimu banobhudisila zhuba babi ne balulwami, bakanisila vula balulwami ne basi balulwami.

⁴⁶Ha muda banomuda mowowana mbhayilo weni? Apa bakhethisi abatothama sa ikoko kene?

⁴⁷Kakale ha mudumilisa zwikamu zwenyu zoga mopinda bamwe ngeni kene? Apa bathu basibagalimoyo abatokuyitabo ikoku kene?

⁴⁸Ibeni balulwami bakapelela sa Tate benyu be kudzimu bakalulwama kwakapelela.