Read Kalanga Matewu 6 Bible Online

Matewu 6 - Kalanga bible

Matewu 6

¹“Yelani njele kuti musiyite zwiyito zwe ndulamo mbeli kwe bathu muyita mashungwa ndibong'we. Ha muyita ikoku amutowobe ne mbhayilo unodwa kuna Tate benyu ba kudzimu.

²“Ndizo ha upa bashayi, usizibise nge kulidza lunyanga se kunoyita batjengedzi mu ng'umba dze mitembezelo ne mu zila kuti balumbidziwe nge bathu. Ndolebesa ndoti kumuli, bakauamutjila mbhayilo wabo kale.

³Ha upa bashayi usiyite kuti luboko gugo gwe lumeshwe guzibe tjinoshingwa nge luboko gugo gwe luji,

⁴kuyita kuti kupa kuko bashayi kube kwakasumbikala. Ipapo Tate babo ibo banobona zwakasumbikika, banowokupa mbhayilo.

⁵“Ha mutembezela, musifanane ne batjengedzi, ngobe banoda kutembezela bali mile mu ng'umba dze mitembezelo ne mu mashanganilo e zila kuti babong'we nge bathu. Ndolebesa ndoti kumuli, baamutjila mbhayilo wabo.

⁶Koga ha utembezela, ngina mu ng'umba iyo uzhalile nkoba utembezele kuna Tate babo basingaboneke. Ipapo Tate babo banobona pakasumbikika, banowokupa mbhayilo.

⁷“Kakale ha mutembezela musilombolodze matama asina nshingo se bathu basibagalimoyo, ngobe banokumbula kuti banowohwika nge matama manji.

⁸Musifanane nabo, ngobe Tate benyu banoziba tjamunosheta musathu mukakumbila.

⁹Tembezelani sahwoku, “ ‘Tate bedu ba kudzimu, zina lenyu ngaliyengamadziwe.

¹⁰Bushe gwenyu ngaguzhe kuda kwenyu ngakuyitiwe mu shango sekwa kunoyitiwa kudzimu.

¹¹Mutipeni nasi zojiwa zwedu zwe misi nge misi.

¹²Mutizwiibhatigwe milandu yedu, sekwa tinozwiibhatigwa banotithamila milandu.

¹³Musitilonge mu kulikwa, koga mutisunungule mu bubi.’

¹⁴“Ngobe ha muzwiibhatigwa bathu milandu yabo, Tate benyu be kudzimu banowomuzwiibhatigwabo.

¹⁵Koga ha musingazwiibhatigwe bathu milandu yabo, Tate benyu abatowomuzwiibhatigwa milandu yenyu.

¹⁶“Ha muzwinyima zojiwa musifubale se batjengedzi banoshobesa njiso dzabo kuti kuzwinyima zojiwa kwabo kubong'we nge bathu. Ndolebesa ndoti kumuli, baamutjila mbhayilo wabo kale.

¹⁷Koga ha uzwinyima zojiwa, zhodza nsholo uwo mafuta ungule buso gugo,

¹⁸kuti ndizo kuzwinyima zojiwa kuko kusibong'we nge bathu, koga kubong'we ndi Tate babo bakasumbikala, ndizo Tate babo banobona kwakasumbikala banowokupa mbhayilo.

¹⁹“Musizwikubunganyile fumwa mu shango panotjinya sole ne bulala ne mbava padzinoti dzikapkhwanya dzikakwiba.

²⁰Koga muzwikubunganyile fumwa kudzimu pasingatjinye sole ne bulala ne mbava padzisinga pkhwanye dzikakwiba.

²¹Ngobe ipapo pana fumwa iyo ndipo panowobe ne moyo uwo.

²²“Zhisho ndilo luvone gwe mbili. Ndizo ha zhisho lilo lipitsha, mbili uwo wose uzhele tjedza.

²³Koga ha zhisho lilo lisingapitshe, mbili uwo wose uzhele zhalima. Ha tjedza tjimukuli tjili zhalima, ligulu kungapani zhalima ilelo kene!

²⁴“Akuna iye ungashingila botetshi babili, ngobe ungabenga mmwe wabo kada mmwe, kene unowokudza mmwe kadeelela mmwe. Aungashingile Ndzimu kose ne fumwa.

²⁵“Ndizo ndomudwa nditi, musidziyidzike ngekwe butjilo gwenyu, ngekwe tjamunowoja kene tjamunowong'wa, kene ngekwe mibili yenyu kuti mowombalani. Apa butjilo agutopinda zojiwa kene ne mbili autopinda zwiambalo kene?

²⁶Bonani nyuni dzinowuluka, adzitolima kakale adzitovuna kene kuli kubiganya mu matula, koga Tate benyu be kudzimu banodzijisa dzose. Apa amutodzipinda kunjinji kwazo kene?

²⁷Ndiani wenyu ungati ngodziyidzika nge moyo kapaphidza kuli kutukununu bulefu gwe butjilo gugwe kene?

²⁸“Apa modziyidzikilani ngekwe zwiambalo? Bonani kuti maluba e shango anokula tjini. Aatoshinga kakale aatoluka.

²⁹Koga ndomubudza kuti na iye Solomoni mu bukulu gugwe gose aazobe akaambala se ling'ompela lawo.

³⁰Ikoko ha kuli iko Ndzimu sekwa unombadza maluba e shango iyawa ayapo nasi koga mangwana eposegwa mu tjibeso, apa autowomumbadza kupinda ikoku kwazo kene, imwi bathu be kugalamoyo kutukununu kene?

³¹“Ndizo musidziyidzike muti, ‘Towojani kene towong'wani kene towombalani?’

³²Ngobe bathu basibagalimoyo banotizhilila zwithu izwezwi zose. Tate benyu ba kudzimu banoziba zose zwamunotjila ndizo.

³³Koga shakani bushe gwabo ne ndulamo yabo kutanga, ngono zwithu izwezwi zose mowozwipiwa na izobo.

³⁴Ndizo musidziyidzike ngekwa mangwana, ngobe mangwana kowozwidziyidzikila nge kwako. Limwe ne limwe zhuba lina tshiyilo yakalilizana.