Read Kalanga Matewu 7 Bible Online

Matewu 7 - Kalanga bible

Matewu 7

¹“Musisumikilise, kuti ndizo musisumikilisiwe.

²Ngobe nge zila yamunosumikilisa bamwe ndiyo, namwibo mowosumikilisiwa ndiyo, nge tjilizanyo tjamunolizanya nditjo mowolizanyigwabo nditjo.

³Ini una hanya nge lubatsha gumu zhisho le ikamu tjitjo ngono ushayila hanya guni limu zhisho lilo kene?

⁴Apa ungadwa ikamu tjitjo tjini uti, ‘Ima ndiduse lubatsha mu zhisho lilo,’ koga kuna guni muna lilo zhisho kene?

⁵Ntjengedzi ndiwe! Kutanga dusa guni mu zhisho lilo, kudwapo ndiko kwaunowobona zubuyanana kudusa lubatsha mu zhisho le ikamu tjitjo.

⁶“Musipe mbgwa tjakayengemala dzingadwa dzimushandukila dzimupalulanya. Musilashile ndalama dzenyu dzakanaka mbeli kwe hwotji, dzingadzikanyanga nge makumbo.

⁷“Kumbilani mowopiwa, shakani mowowana, kokodzani mowozhuligwa.

⁸Ngobe mmwe ne mmwe unokumbila unopiwa na iye unoshaka unowana, kakale na iye unokokodza, unowozhuligwa.

⁹Ndiupi wenyu ungati mwana uwe ekumbila tjiwunga kampa bgwe kene?

¹⁰Kene ungati ekumbila hwobe kampa nyoka kene?

¹¹Apa imwi nenguba muli babi muziba kupa bana benyu zwipo zwakanaka, kukulu seni kwa Tate benyu ba kudzimu kwabanowobapa zwipo zwakanaka ibo banobakumbila kene!

¹²“Tjimwe ne tjimwe tjamunoyemula kuti bamwe bamuyitile itjo, mubayitile itjobo, ngobe oyu ndiwo nlayo ne balebesambeli.

¹³“Nginani nge nkoba wakamanikana, ngobe nkoba wakashatha ne zila yakazhuka inoyenda ku golomodzo ngono banongina ndiwo banji.

¹⁴Koga nkoba wakamanikana ne zila inolema inoyenda ku butjilo, ndizo banoiwana bashomanana.

¹⁵“Tjenjelelani balebesambeli be manyepkhwa. Banozha kumuli bakaambala makukuta e pkhwizi, koga mukati bali phele dzina bushongola.

¹⁶Mowobaziba nge zwizwalo zwabo. Apa zhambi dzotjegwa mu mihwa kene, kene phaya mu zwishosho?

¹⁷Sa ikoko nti mmwe ne mmwe wakalulwama unozwala zwizwalo zwakalulwama ne nti wakabipa unozwala mitjelo yakabipa.

¹⁸Nti wakalulwama aungazwale mitjelo yakabipa, kakale nti wakabipa aungazwale zwizwalo zwibuya.

¹⁹Nti mmwe ne mmwe usingazwale zwizwalo zwakalulwama unotemiwa ukalashigwa mu moto.

²⁰Ndizo mowobaziba nge zwizwalo zwabo.

²¹“Ate mmwe ne mmwe unoti kundili, ‘She, She,’ unowongina mu bushe gwe kudzimu, koga kowongina iwoyo unothama kuda kwa Tate bangu ba kudzimu.

²²Muna ilelo zhuba, banji banowoti kundili ‘She, She, apa atizolebelambeli nge zina lenyu, tikadusa meya mibi nge zina lenyu, tikathama matjenamiso makulu nge zina lenyu kene?’

²³Ipapo ndowobadwa ati, ‘Andizotongo muziba. Idwani pandili bashingi be bubi ndimwi!’

²⁴“Ndizo mmwe ne mmwe unohwa matama angu iyawa kaalondolodza unofanana ne nlume wakatjenjela wakabaka ng'umba iye pezhugwi kwe bgwe.

²⁵Vula ikana, kukabe ne mikubila ne phepo dzikatutudza, koga ng'umba iyeyo ikasiwe, ngobe yakabe yakabakwa mu bgwe.

²⁶“Koga mmwe ne mmwe unohwa matama angu iyawa kasialondolodze unofanana ne nlume we tjilengwe wakabaka ng'umba mu nsetje.

²⁷Vula ikana njizi dzikazhala ne phepo dzikatutudza, ng'umba iyeyo ikawa tjose.”

²⁸Jesu kati apedza kuleba izwezwi zwithu, mibunga ye bathu ikakaabadziwa ngodiya kukwe,

²⁹ngobe wakatubula kudiya lebeswa, asingafanane ne badiyi babo be nlayo.