Read Kalanga Matewu 9 Bible Online

Matewu 9 - Kalanga bible

Matewu 9

¹Jesu wakangina mu n'goro kabgwilila seli ku nzi wa kanyi kwabo.

²Ngono bathu bakazhisa nlume kunli wakalobgwa nge gulukadzi akasengwa nge thobo. Jesu kati ebona kugalamoyo kwabo, kati kuna wakalobgwa nge gulukadzi, “Simamoyo, nkololo wangu, ndakuzwiibhatigwa matjinyo awo.”

³Ipapo bamwe be badiyi be nlayo bakati behwa ikoku bakalebesana beti, “Nlume iwoyu unotuka Ndzimu!”

⁴Nge kuziba mikumbulo yabo, Jesu kati ku bali, “Ini mukumbula mikumbulo yakabipa mu mimoyo yenyu?

⁵Ndikupi kulelu kuti, ‘Matjinyo awo waazwiibhatigwa,’ kene kuti, ‘Milika uyende?’

⁶Ngono kuti ndizo muzibe kuti iye Nkololo we Nthu una ndaulo mu shango ye kuzwiibhatigwa matjinyo.” Ndizo ipapo kati kuna wakalobgwa nge gulukadzi, “Milika, tola thobo iyo uyende kanyi.”

⁷Ndizo kamilika kayenda kanyi kwabo.

⁸Kukati mbunga we bathu ubona ikoku, ukabe ne kutja, ukakudza Ndzimu, iwo wakapa bathu ndaulo yakajali.

⁹Jesu kadwa paakabe alipo kayenda ngono kabona nlume unoyi Matewu ali gele pa bugalo gwe bakhethisi. Jesu kati kunli, “Unditobele.” Ndizo Matewu kamilika kantobela.

¹⁰Jesu kati atjimu ng'umba ya Matewu eja, bakhethisi ne batjinyi* banjinji bakazha bakaja naye ne badiyiwa babe.

¹¹Bafarasi bakati bebona ikoku bakabhuzwa badiyiwa ba Jesu beti, “Ini n'diyi wenyu eja ne bakhethisi ne batjinyi kene?”

¹²Jesu kati ehwa ikoku kati, “Ate bathu banomuka zubuyanana banoshaka ng'anga koga bagwele ndibo banoshaka ng'anga.

¹³Ndizo yendani munozwidiya kuti oku kodwani, ‘Ndoshaka mahwilo ngoni, kusi tjibhayilo.’ Andizozha kuwodana balulwami, koga ndakazha kuwodana batjinyi.”

¹⁴Ipapo badiyiwa ba Johani bakazha kuna Jesu bakambhuzwa bakati, “Ini iswi ne Bafarasi tizwinyima zojiwa, koga badiyiwa babo basingazwinyime izo?”

¹⁵Jesu kabashandula nge bhuzo eti, “Apa bathu bakokiwa ndobolo bangalila nkwasha atji nabo tjini? Koga misi inowozha ye kuti batolegwe nkwasha, ipapo ndiko kwabanowozwinyima zojiwa.”

¹⁶Akuna unolonga nguli tshwa mu tjiambalo tjikulukugwi, ngobe nguli tshwa inowobuya ngono ikashweshwana, ndizo kupaluka kukapindilila.

¹⁷Akuna nthu unodila nkumbi ntshwa mu makukhwa makulukugwi. Ha angadila, makukhwa anowophutuka, nkumbi ukatebuka, ngono makukhwa katjinyika. Nkumbi ntshwa unodigwa mu makukhwa matshwa, ngono kose kukatjengeteka.

¹⁸Kati atjaleba ikoku nabo, kukazha ntungamili we nzi kathigama mbeli kukwe kati, “Nkololokadzi wangu wafa sangwenu. Ngono izha umbige maboko awo ndizo unowotjila.”

¹⁹Jesu kamilika kantobela ne badiyiwa babe.

²⁰Ipapo nkadzi wakabe ana makole ali gumi lina mabili egwala e bhizha malopa, kazha shule kukwe kabhata lupeto gwe tjiambalo tjitje.

²¹Ngono nkadzi kati mu nkumbulo uwe, “Ha ndingakutha tjiambalo tjitje koga, ndowopola.”

²²Jesu katjebuka, kambona ngono kati kunli, “Sima nkololokadzi wangu, kugalamoyo kuko kwakupodza.” Ipapo nkadzi iwoyo kapola.

²³Jesu kati engina mu ng'umba ye nlauli ebona balidzi be nyele ne mbunga we bathu upoyongana,

²⁴kati ku bali, “Idwani ipapa. Mwanadi aazofa ulele.” Koga bakanseka mahanya.

²⁵Mbunga we bathu wakati wadusigwa kuzhe, kangina mukati kambhata nge luboko, ngono mwanadi kamilika.

²⁶Thawu dza ikoku dzikaandama nge ntuthu iwoyo wose.

²⁷Jesu kati edwa ipapo balume babili be mapofu bakantobela bedanilila beti, “Utihwile ngoni Nkololo wa Dafite!”

²⁸Kati engina mu ng'umba, balume ibabo be mapofu bakazha kunli, ngono kababhuzwa kati, “Mogalamoyo kene kuti ndingakuyita ikoku?” Bakadabila beti “Ee, She.”

²⁹Ipapo kabhata mesho abo eti, “Nge kugalamoyo kwenyu ngakuyitikale mu muli.”

³⁰Mesho abo kapofunuka. Jesu kakowomedza eti, “Mubone kuti akuna waziba ngekwa ikoku.”

³¹Koga bakabhuda bakaandamisa tjilumbi tjitje mu ntuthu iwoyo wose.

³²Bakati batjayenda, mmwe nlume we mbebebe wakabe akasungwa nge meya mibi, kazhisiwa kuna Jesu.

³³Ngono kukati meya mbi wadusiwa, nlume iwoyo we mbebebe kalebeleka. Mbunga we bathu ukakaabala ukati, “Akuna tjinonga itjetji tjakatongo bong'wa mu Iziraela.”

³⁴Koga Bafarasi bakati, “Unodusa meya mibi eshingisa she we meya mibi.”

³⁵Jesu kapalama mizi yose ne mizana ediya mu ng'umba dzabo dze mitembezelo esumikila ndebo mbuya ye bushe gwe kudzimu kakale epodza njigwele dzose ne buworoworo gose.

³⁶Kati ebona mibunga ye bathu kabahwila zogwadza, ngobe bakabe bedziyidzika basina bhatsho, benga pkhwizi dzisina nlisi.

³⁷Ipapo kati ku badiyiwa babe, “Kuvuna kukulu kulu koga bavuni bashomanana.

³⁸Ndizo kumbilani kuti She we ndimo atumile bavuni ku nnda uwe.”