Read Kalanga Mako 1 Bible Online

Mako 1 - Kalanga bible

Mako 1

¹Oku ndiko kutangisa kwe ndebo mbuya ya Jesu Kirisiti Nkololo we Ndzimu,

²sekwa kwakakwagwa ndi Isaya nlebesambeli mu lukwalo gugwe eti, “Ndotuma ntumwa wangu mbeli kuko, iye unowolulwamisa zila iyo.”

³“Hwi le unodanilila mu tjilambanyika eti, ‘Lulwamisani zila ya She, tambunudzani zijana dzidze.’ ”

⁴Johani we N'dubiki kaswika mu tjilambanyika, esumikila kuti bathu bashandukile matjinyo abo badubikwe ili tjilakidzo tje kuti bazwiibhatigwa matjinyo abo.

⁵Shango yose ye Judiya ne bathu bose be Jerusalema bakabhuda bakayenda kunli. Bakazwileba matjinyo abo, ngono kabadubika mu gwizi gwe Jorodani.

⁶Johani wakabe eambala zwiambalo zwakathamiwa nge bukuse gwe kamela, ne mwandabula we ganda mu thunji dzidze. Wakabe eja phashu ne butji gwe nyutji.

⁷Kasumikila eti, “Shule kwangu kowozha una masimba kundipinda, iye wandisakalizana kukotama ndisunungula mitjili ye khwebana dzidze.

⁸Ndomudubika nge vula, koga iye unowomudubika nge Meya yakayengemala.”

⁹Mu mazhuba iyawo Jesu kazha edwa ku nzi we Nazareta mu ntuthu we Galili, ngono kadubikiwa ndi Johani mu gwizi gwe Jorodani.

¹⁰Kwakati Jesu ebhuda mu vula, kabona kudzimu kuzhuka, ngono Meya yakayengemala ikadelukila munli se njiba.

¹¹Hwi likadwa kudzimu liti, “Iwe u Nkololo wangu, iye wandinoda, unondishathisa kwazo.”

¹²Tjinyolotjo Meya ikantakulila ku tjilambanyika.

¹³Wakabe mu tjilambanyika mazhuba ali makumi manna, elikiwa ndi Satani. Wakabe ana phuka dze shango, ngono batumwa be kudzimu bakambhatsha.

¹⁴Kukati Johani alongwa mu ng'umba ye busungwa, Jesu kazha mu Galili esumikila ndebo mbuya ye Ndzimu.

¹⁵Wakabe eti, “Tjibaka tjazha. Bushe gwe Ndzimu[1] gwasedzela. Shandukilani matjinyo enyu, mugalemoyo mu ndebo mbuya.”

¹⁶Jesu wakati eyenda ali mu hwunde ye gungwa gwe Galili, kabona Simoni ne nnung'una uwe Enduru, beposela gwanga mu gungwa, ngobe bakabe bali babhati be hwobe.

¹⁷Jesu kati ku bali, “Izhani munditobele, ndowomuthama babhati be bathu.”

¹⁸Tjinyolotjo bakasiya njanga dzabo, bakantobela.

¹⁹Wakati ayenda thambgwana kabona Jakubo nkololo wa Zebhedi na Johani nnung'una uwe, bali mu n'goro belulwamisa njanga dzabo.

²⁰Tjinyolotjo kabadana, ndizo bakantobela besiya tate babo Zebhedi mu n'goro bana bashingi.

²¹Bakayenda ku nzi we Kapenaume, ngono kukati nge nsi we Sabata, Jesu kangina mu ng'umba ye Bajuta ye mitembezelo katangisa kudiya.

²²Bathu bakatjenamila kudiya kukwe, ngobe wakabe ediya se nthu una ndaulo, asingange badiyi be nlayo.

²³Imomo mu ng'umba yabo ye mitembezelo kwakabe kuna nlume wakabe ana meya mbi,

²⁴ngono kamilidza hwi kalebeleka eti, “Unoshakani mutili iwe Jesu we Nazareta? Wazha kuwotilobesa kene? Ndoziba kuti uani, u N'yengemali we Ndzimu!”

²⁵Koga Jesu kantjemela kati, “Nyalala ubhude munli!”

²⁶Meya mbi ukazunguza nlume ihwoyo kwazo, ukabhuda munli utjema.

²⁷Bathu bose bakatjenama kwazo, bakabhuzwana bakati, “Ikoku kunoshingikala ini kene? Hwudiya kutshwa! Unotjemela na iyo meya mibi dumbu nge ndaulo, ngono inonhwa.”

²⁸Tjinyolotjo tjilumbi tjitje tjikaandama mu ntuthu wose we Galili.

²⁹Kati ebhuda mu ng'umba ye mitembezelo bakayenda tjinyolotjo ku nzi wa Simoni na Enduru, bana Jakubo na Johani.

³⁰Mmezwale ba Simoni bakabe bali lele bana luzhazhamo, ndizo bakabudza Jesu nge kwabo.

³¹Kayenda ku bali kababhata nge luboko kabaazha kumilika, ngono luzhazhamo gukabhuda mu bali ndizo bakatangisa kupa bezi zojiwa.

³²Madekwana iyawo, zhuba langina bathu bakazhisa bagwele bose ne bathu bana meya mibi kuna Jesu.

³³Nzi wose ukakubungana pa nkoba we ng'umba.

³⁴Ngono Jesu kapodza banjinji bakabe bana magwele akasiyana. Kakale kadusa meya mibi minjinji, koga asingaidumile kuti ilebeleke ngobe yakabe inziba.

³⁵Kukati kutji likundawudze, Jesu kamuka, kabhuda mu ng'umba kayenda ku shango kwaakaswika katembezela.

³⁶Simoni ne baakabe anabo bakanlonda,

³⁷bakati ben'wana bakan'dwa bakati, “Mmwe ne mmwe unomushaka.”

³⁸Koga Jesu kati ku bali, “Ngatiyendeni ku mizi ipejo, kuti ndizo ndinosumikila ikokobo, ngoti nditjo tjandakazhila.”

³⁹Kayenda mu Galili yose esumikila mu ng'umba dzabo dze mitembezelo, kakale edusa meya mibi mu bathu.

⁴⁰Nlume wakabe egwala mapele kazha kunli, kankumbila akathigama eti, “Ha muda, mungandipodza.”

⁴¹Jesu kanhwila ngoni, katambunudza luboko gugwe, ngono kambhata kati kunli, “Ndoda kuti upole; pola.”

⁴²Tjinyolotjo mapele kapola, kasala ali mbuyanana.

⁴³Jesu kanlaya akasimisa ngono kandwa kati ayende,

⁴⁴eti, “Kushaye wawabudza ikoku, koga uyende unozwilakidza ku mpirisiti, uduse tjibhayilo tje kupodziwa kuko sekwakaleba Mushe, kuti tjibe tjilakidzilo mu bathu.”

⁴⁵Koga kabhuda, ngono katangisa kuleba akashaladuka eandamisa tjanshingikalila. Ikoku kukatjikonedza Jesu kungina mu nzi akasununguka, kagala mu shango, ngono bathu bakazha kunli bedwa mu magalo mamwe ne mamwe akasiyana.