Read Kalanga Mako 10 Bible Online

Mako 10 - Kalanga bible

Mako 10

¹Jesu kadwa ipapo kayenda ku ntuthu we Judiya na seli kwe Jorodani. Mibunga ye bathu ikankubunganila kakale, ndizo nge wolobela kukwe, kabadiya.

²Ipapo kukazha kunli Bafarasi beshaka kuti banlike, bakambhuzwa bakati, “Apa kumu nlayo kuti nlume alambe nkadzi uwe kene?”

³Jesu kabashandula nge bhuzo eti, “Mushe wakamulaya eyitini?”

⁴Bakanshandula beti, “Mushe wakatidumila eti, ha nlume elamba nkadzi uwe, ampe lukwalo gwe kuthubukana mu ndobolo, anlambe.”

⁵Ndizo Jesu kabadwa kati, “Mushe wakamukwalila nlayo iwoyu eyikhwa nge mimoyo yenyu mikukutu.

⁶Koga kudwila pa kubumbiwa kwe shango, ‘Ndzimu wakababumba we tjilume ne we tjikadzi.’

⁷‘Ndizo wali nlume unowosiya mmeyabe na tate babe kabhatana ne nkadzi uwe,

⁸ngono ibaba babili banowobe mbili nng'ompela.’ Ndizo abatji bathu babili, koga babe mbili nng'ompela.

⁹Ndizo Ndzimu tjawabhatshanya, kushaye nthu watjithubukanya.”

¹⁰Kukati bali mu ng'umba badiyiwa babe bakambhuzwa kakale ngekwe matama iyawa.

¹¹Ngono kati ku bali, “Iye unolamba nkadzi uwe elobola mmwe nkadzi, unothamila nkadzi uwe bupombgwe.

¹²Na iyebo nkadzi unolamba nlume uwe kalobogwa nge mmwe nlume, unobe ethama bupombgwe.”

¹³Bathu bakabe bezhisa bana kunli, kuti ndizo ababhate; ngono badiyiwa bakabatjemela.

¹⁴Jesu kati ebona ikoku kagwadzamoyo, kadwa badiyiwa babe kati, “Letjani bana bazhe kundili, musibadzibile, ngobe bushe gwe Ndzimu nge gwe bakajali.

¹⁵Ndolebesa ndoti kumuli, iye usingaamutjile bushe gwe Ndzimu se mwana, aatowongina muguli.”

¹⁶Ndizo kabatola nge maboko awe, kabakombolela nge kubabiga maboko.

¹⁷Kwakati Jesu etangisa gwendo gugwe, mmwe nlume kanlabukila kathigama mbeli kukwe, kankumbila kati, “N'diyi wakalulwama, ndithameni kuti ndiamutjile butjilo gusingapele?”

¹⁸Jesu kanshandula eti, “Ini undidana uti ndakalulwama? Akuna wakalulwama kuzhe kwe Ndzimu woga.

¹⁹Unoziba milayo inoti, ‘Usibulaye, usithame bupombgwe, usikwibe, usipe butendeki gwe manyepkhwa, usitjebele, kudza tate babo na mmeyabo.’ ”

²⁰Ngono kati kunli, “N'diyi, kose ikoku ndakakulondolodza, kudwila mu butjetjana gwangu.”

²¹Jesu kanlinga nge ludo, kati kunli, “Kuna tjithu tjing'ompela tjaunosheta. Yenda unotengesa kose kwaunako, ukobele bashayi, ngono unowobe ne fumwa kudzimu. Kudwa ipapo uzhe unditobele.”

²²Ngekwa ikoku tjiso tjitje tjikafubala, ngono kayenda ana buyendasi, ngobe wakabe akafuma kwazo.

²³Jesu kalinga kupoteleka, kati ku badiyiwa babe, “Kwakasima seni kuna ibabo bana fumwa, kuti bangine mu bushe gwe Ndzimu.”

²⁴Matama iyawa kakaabadza badiyiwa ba Jesu. Koga Jesu kati ku bali kakale, “Bana, kwakasima seni kungina mu bushe gwe Ndzimu.

²⁵Kulelu mu kamela kuti ingine mu buli le lunji, pakuti nfumi angine mu bushe gwe Ndzimu.”

²⁶Bakakaabala kwazo, ndizo bakati kunli, “Ndiani ngono ungatjidziwa?”

²⁷Jesu kabalinga, ngono kati, “Mu nthu akutotubuka, koga akuzojalo mu Ndzimu, ngobe zwithu zose zotubuka mu Ndzimu.”

²⁸Pita katangisa kati kunli, “Bonani, takasiya zose tikamutobela.”

²⁹Jesu kati, “Ndolebesa ndoti, akuna wakasiya nzi uwe, kene bana ba tate babe kene mme kene tate kene bana kene minda ngekwe zina langu ne Ndebo mbuya,

³⁰usingawoamutjila kwaakasiya ka zana mu misi iyeyi, ng'umba ne bana ba tate babe na bomme ne bana ne minda kose ne tshiyilo, ngono mu misi inozha kawana butjilo gusingapele.

³¹Koga banji be kutanga banowobe be bupelo ne be bupelo banowobe be kutanga.”

³²Bakabe ngwenu babe mu zila betathila ku Jerusalema. Jesu wakabe eyenda ali mbeli kwabo, ngono bakatjenama, ibabo bakabe bakantobela bakatja. Katola bali gumi lina babili kakale, katangisa kubabudza tjinowonshingikalila.

³³Eti, “Bonani, totathila ku Jerusalema, ngono Nkololo we Nthu unowolongwa mu maboko e bapirisiti bakulu ne badiyi be nlayo, banowontilika nlandu kuti abulawe, banowonlonga mu maboko e Bezwitjaba.

³⁴Banowon'dadila benthwila mate benloba nge rwabha, bakambulaya, koga shule kwe mazhuba matatu unowomuka.”

³⁵Ipapo Jakubo na Johani, bakololo ba Zebhedi, bakayenda mbeli kuna Jesu bakankumbila beti, “N'diyi, toshaka kuti utithamile tjimwe ne tjimwe tjatinokukumbila.”

³⁶Jesu kababhuzwa kati, “Ini tjamunoshaka kuti ndimuyitile?”

³⁷Bakanshandula bakati, “Utipe fanilo ye kuti tigale mmwe ku luboko gugo gwe luji, mmwe kuna gwe lumeshwe, mu bushe gugo.”

³⁸Koga Jesu kabadabila eti, “Amutoziba tjamunokumbila. Apa mungatubula kung'wa nkombe wandinong'wa, nenge kudubikiwa nge kudubikwa kwandinondubikiwa ndiko kene?”

³⁹Bakanshandula beti, “Tingakutubula.” Jesu kabadwa kati, “Nkombe iwoyu wandinong'wa, mowoung'wa ne kudubikwa ikoku kwandinodubikwa ndiko, mowodubikwabo ndiko.

⁴⁰Koga kugala ku luboko gwangu gwe luji kene ku luboko gwangu gwe lumeshwe akutopiwa ndimi, koga ngekwa ibabo bakwakabigigwa.”

⁴¹Ngono kukati bamwe badiyiwa bali gumi behwa matama iyawa, bakagwadzilamoyo Jakubo na Johani.

⁴²Ipapo Jesu kabadanila kunli, ngono kabadwa kati, “Moziba kuti ibaba banoyi ndibo babusi be zwitjaba, banobabusa nge kubadziyidza, ngono balauli ibabo banobalaula nge masimba.

⁴³Koga ngakusijalo mu muli. Ha kuli kuti kuna mmwe unoshaka kube nkulu pa bamwe mu muli, ngaabe nshingili wenyu,

⁴⁴na iyebo unoshaka kube mbeli, ngaabe nlanda wa bose.

⁴⁵Nkololo we Nthu naiye aazozha kuwoshingigwa, koga wakazha kuwoshingila ne kufa efila kusungunugwa kwe bathu bali banji.”

⁴⁶Ndizo bakaswika ku Jerikho. Jesu kati ebhuda mu Jerikho ana badiyiwa babe ne mbunga we bathu nkulu, Bhatimeo, nkumbili we bhofu, ali nkololo wa Timeo, kabe ali gele pa hwunde ye zila.

⁴⁷Ngono kati ehwa kuyi ndi Jesu we Nazareta, katangisa kumilidza hwi edana eti, “Jesu Nkololo wa Dafite! Undihwile ngoni!”

⁴⁸Koga banji bakantjemela beti, anyalale, koga kamilidzila hwi pezhugwi kadana eti, “Nkololo wa Dafite undihwile ngoni!”

⁴⁹Jesu kama kati, “Mun'dane.” Ndizo bakadana nlume we bhofu bakati kunli, “Simisamoyo, umilike, unokudana.”

⁵⁰Kalasha ngubo yaakabe akafuka, kamilika kayenda kuna Jesu.

⁵¹Jesu kambhuzwa kati, “Unoshaka kuti ndikuyitileni?” Bhofu likanshandula likati, “N'diyi, ndoshaka kuti ndipofunuke.”

⁵²Jesu kati kunli, “Yenda, ngobe kugalamoyo kuko kwakupodza.” Tjinyolotjo kapofunuka, ngono kasala Jesu shule.