Read Kalanga Mako 11 Bible Online

Mako 11 - Kalanga bible

Mako 11

¹Bakati babe pejo ne Jerusalema, beswika mu Bhetifage ne Bhetani pa Dombo le Mitoba, Jesu katuma badiyiwa babe bali babili.

²Kabadwa kati, “Yendani mungine mu nzi iwoyu wamakalingisana nawo, mowoti tjinyolotjo mungina muuli mukawana donkana isina wakatongo itatha, muisunungule muizhise.

³Ha kuli kuti kuna ungamudwa eti, ‘Ini muthama muijali?’ mun'dwe muti, ‘She banoyishaka, banowoibuza tjinyolotjo.’ ”

⁴Bakayenda bakanowana donkana yakasungigwa pa nkoba pejo ne zila. Bakasunungula donkana iyeyo.

⁵Koga ibabo bakabe bali mile ipapo bakabadwa bakati, “Moyitani, mosunungulilani donkana iyeyi kene?”

⁶Bakababudza sekwa leba Jesu. Ndizo bakabaletja bakayenda.

⁷Bakazhisa donkana kuna Jesu. Bakawala hazu dzabo pezhugwi kwe donkana, ngono Jesu kaitatha.

⁸Koga banji bakawala hazu dzabo mu zila, bamwe bakawala thabi dzina mazhani manjinji dzabakakwaula ku shango.

⁹Kukati bose bakabe bali mbeli kene shule kwa Jesu bakapululudza beti, “Hosana! Wakakombolegwa unozha nge zina la She.

¹⁰Kwakakombolegwa bushe gwa tate bedu Dafite, gunozha! Hosana, Ndzimu Upezhugwi zhugwi.”

¹¹Jesu kangina mu Jerusalema, ndizo kanongina mu Ng'umba ye Ndzimu, ngono kati alinga tjimwe ne tjimwe, se tjibaka tjakabe tjayenda, kabhuda kayenda ne bali gumi lina babili ku Bhetani.

¹²Kwakati tjimuka bedwa ku Bhetani, Jesu kabhakhwa nge zhala.

¹³Kabona mpaya uli thambgwana wakathinila, kayenda kunobona kuti kene ungawana tjimwe muuli. Kati eswika pauli kasiwane tjimwe, ha kusi mazhani koga, nge kuti kwakabe kusathu kukabe tjibaka tje makuyu.

¹⁴Ngono kaudwa kati, “Kushaye unowoja mitjelo inodwa mukuli kakale.” Badiyiwa babe bakahwa.

¹⁵Ndizo bakaswika mu Jerusalema, Jesu kangina mu Ng'umba ye Ndzimu, katata bakabe betengesa ne bakabe betenga mu Ng'umba ye Ndzimu. Kapitula tafuli dze bakabe betenganya mari ne bakabe betengesa ngurukuku.

¹⁶Kukasibe ne waanodumila kupalama Ng'umba ye Ndzimu akasenga thundu.

¹⁷Ngono kadiya, ebadwa eti, “Apa akuzokwagwa kuyi, ‘Ng'umba yangu inowodang'wa Ng'umba ye Ntembezelo ye njudzi dzose kene?’ Koga imwi makaithama guwu le mbava.”

¹⁸Bapirisiti bakulu ne badiyi be nlayo bakahwa, ngono bakashaka zila yabanganlobesa ndiyo, ngobe bakabe bentja, nge kuti bathu bose bakabe betjenamisiwa nge zwidiyo zwizwe.

¹⁹Kukati kwabe madekwana, bakabhuda mu nzi nkulu.

²⁰Bakati bepinda mangwanana, bakabona mpaya wakalongwa bhiso ndi Jesu wakawoma kunoti ku midzi.

²¹Pita kaalakana, ngono kadwa Jesu kati, “N'diyi, bonani, mpaya wamakalonga bhiso wakawoma.”

²²Jesu kabadabila eti, “Galanimoyo mu Ndzimu.

²³Ndolebesa ndoti kumuli, iye unowodwa dombo ileli eti, ‘Simuka uwile mu gungwa,’ asingadudumwe mu moyo uwe, egalamoyo kuti tjaanoleba tjowoshingikala, unowotjithamigwa.

²⁴Ndizo wali ndomubudza nditi, tjimwe ne tjimwe tjaunokumbila nge ntembezelo, ugalemoyo kuti watjiamutjila, ngono tjowobe tjitjo.

²⁵Kakale uti ha uma utembezela, uzwiibhatigwe bana milandu nawe, ndizo tate babo ba kudzimu banowokuzwiibhatigwabo milandu iyo.” [

²⁶Koga ha usingazwiibhatigwe bamwe, tate babo ba kudzimu abatowokuzwiibhatigwa milandu iyo.][8]

²⁷Bakazha kakale ku Jerusalema, Jesu kati atjayenda mu Ng'umba ye Ndzimu, bapirisiti bakulu ne badiyi be nlayo ne bakulu be Bajuta bakazha kunli,

²⁸bakan'dwa bakati, “Unoshinga zwithu izwezwi nge simba lipi? Ndiani wakakudumila kuti uzwishinge?”

²⁹Jesu kabadwa kati, “Ndowomubhuzwa bhuzo ing'ompela, mundidabile, ngono ndowomubudza kuti i simba lipi landinothama zwithu izwezwi ndilo.

³⁰Kudubika kwa Johani kwakabe kudwa kudzimu kene ku bathu? Mundidabile.”

³¹Ngono bakakangazhana tje kwabo, “Ha tingati, ‘Kwakadwa kudzimu,’ unowoti ‘Ini ngono musakan'galamoyo?’

³²Koga ha tingati, ‘Kwakadwa mu bathu…’ ” Bakabe betja bathu, nge kuti mmwe ne mmwe wakabe eziba kuti Johani nlebesambeli we malebeswa.

³³Ndizo bakashandula Jesu beti, “Atitoziba.” Jesu kabadwa kati, “Namibo andingamubudze kuti ndoshinga zwithu izwezwi nge ndaulo ipi.”