Read Kalanga Mako 12 Bible Online

Mako 12 - Kalanga bible

Mako 12

¹Jesu katangisa kulebeleka nabo nge zwifaniso eti, “Mmwe nlume wakati kathama nnda we mizhambi, kaushoshela, katsha gomba linokobolegwa zhambi pakati kwawo, kabaka thungamakole[9] muuli, kawusayidza bamwe balimi, ngono iye kayenda ku imwe shango.

²Kwakati tjabe tjibaka tje zhambi, katuma nlanda uwe kuti anontolela dzimwe zhambi dzadwa mu nnda we mizhambi.

³Bakatola nlanda bakanloba, bakanshandusa akalembedza maboko.

⁴Mweni we nnda kapapha katuma mmwe nlanda, ngono na iyebo bakaswika bakamphobola mu nsholo, bakanthama zwithu zwinobhatisa shoni.

⁵Kabuya katumila mmwe nlanda kakale, bakaswika bembulaya, bakathama beijalo mu bamwe banjinji bakatumwa shule kukwe bakabaloba, bamwe bakababulaya.

⁶Ngono wakabe atjisaligwa nge nkololo uwe waakabe eda kwazo. Gwe bupelo katuma iye, ezwidwa eti, ‘Banowoteta nkololo wangu.’

⁷Koga balimi ibabo be nnda bakalebeleka tje kwabo bakati, ‘Oyu ndiye n'gali we thaka, ngatimbulayeni, kuti ndizo thaka ibe yedu.’

⁸Bakambhata, bakambulaya, bakanlashila kuzhe kwe nnda we mizhambi.

⁹“Mweni we nnda unowothama eyitini kene? Unowobuya kawolobesa balimi ibabo, ngono unowosayidza nnda iwoyo we mizhambi kuna bapoga.

¹⁰Amuzobala matama amu hwalo dze Ndzimu anoti, “ ‘Bgwe lakalambiwa nge babaki, ndilo lakabe bgwe linotambunudza mbako;

¹¹ikoku kwakayitiwa ndi She, ngono kotjenamisa mu mesho edu?’ ”

¹²Batungamili be Bajuta bakashaka zila yabangansunga ndiyo, ngobe bakabe babona kuti unodwa ibo, koga bakatja mbunga we bathu. Ndizo bakansiya bakayenda.

¹³Batungamili be Bajuta bakantumila Bafarasi bamwe ne batobeli* ba Herode kuti bambhatshile mu ndebo dzidze.

¹⁴Bakazha bakan'dwa bakati, “N'diyi, toziba kuti muna malebeswa, amuna hanya kuti nthu ndiani, nge kuti amutolinga mamo e bathu, koga nge malebeswa modiya zila ye Ndzimu. Apa kwakafanila kuti tilipe lukhetho kuna Kaisara kene tisilipe?”

¹⁵Tigulipe kene tisigulipe? Koga Jesu kaziba butjengedzi gwabo, ngono kabadwa kati, “Apa ini mundilika kene? Zhisani ngeno loso ling'ompela ndibone.”

¹⁶Ngono bakalizhisa. Kabadwa kati, “Ifano tjaani itjetji ne zina nge laani?” Bakanshandula bakati, “Nge zwa Kaisara.”

¹⁷Jesu kabadwa kati, “Ipani Kaisara zwithu zwa Kaisara, mupe Ndzimu zwithu zwe Ndzimu.” Bakankaabalila.

¹⁸Basadusi, ibo bathu bakabe beti akutomukiwa mu bafi, bakazha kuna Jesu. Ngono bakambhuzwa bakati,

¹⁹“N'diyi, Mushe wakatikwalila eti, ‘Ha nlume angafa esiya nkadzi asina bana, nnung'una we nfi wakafanila n'galathaka, kuti anthamile bana.’

²⁰Kwakabe kuna bamwe balume bakazwagwa bali kutendeka, bali bana be nthu. Hwola katola nkadzi, ngono kafa ensiya asina mwana.

²¹Nnung'una uwe kan'galathaka, ngono na iyebo kafa asina mwana naye ne we butatubo katobela.

²²Bose bali kutendeka bakasheta mwana wabasiya. Bhelelo nkadzi kafabo.

²³Mu kumuka kwe bafi, unowobe nkadzi waupi? Nge kuti bose bali kutendeka bakabe bakanlobola.”

²⁴Jesu kati ku bali, “Apa kusaziba hwalo kene simba le Ndzimu kwenyu ate iko kunomulasha kene?

²⁵Nge kuti ha bemuka mu bafi abatolobola, kakale abatolobogwa, koga banowobe benga batumwa be kudzimu.

²⁶Koga ngekwe kumuka kwe bafi, apa amuzobala kene mu lukwalo gwa Mushe panolebgwa ngekwe denje, kuti Ndzimu wakadwa Mushe ukati, ‘Ndimi Ndzimu wa Abhurahama, ndimi Ndzimu wa Isaki, ndimi Ndzimu wa Jakubo kene?’

²⁷Ate Ndzimu we bafi, koga Ndzimu we batjili. Mose moleyanya.”

²⁸Mmwe we Badiyi be nlayo kati esedzela pejo, kabahwa benyanyayidzana, ngono kati ehwa kuti Jesu wadabila zubuyanana, kambhuzwa kati, “Ndiupi nlayo nkulu pa mimwe?”

²⁹Jesu kadabila kati, “Nlayo nkulu pa mimwe ndi hwoyu, ‘Hwililani imwi Baiziraela, She Ndzimu wedu, She bang'ompela.

³⁰Ida She Ndzimu uwo nge moyo uwo wose nenge meya iyo yose nenge nkumbulo uwo wose nenge masimba awo wose.’

³¹Nlayo nkulu kutobeledza ndihwoyu, ‘Ida mmwe nthu sekwa unozwida.’ Akuna mmwe nlayo unopinda iyeyi.”

³²N'diyi we nlayo kadwa Jesu kati, “Molebesa tjose, N'diyi. Malebesa kuti Ndzimu nng'ompela, ngono akuna mmwe Ndzimu kuzhe kwa iwo woga.

³³Ngono kuti tiwude nge moyo wose nenge njalakang'wa dzose nenge masimba wose nenge kuda mmwe nthu sekwa unozwida, ikoku kopinda zwipo zose zwinopisiwa ne zwimwe zwibhayilo.”

³⁴Jesu kati ehwa N'diyi we nlayo an'dabila nge butjenjedu, kan'dwa kati, “Aute uli kule kule ne bushe gwe Ndzimu.” Kudwa ipapo akuna mmwe wakatongo shaka kumbhuzwa bhuzo kene ili yakatini.

³⁵Jesu kati ediya mu Ng'umba ye Ndzimu kati, “Ini badiyi be nlayo beti Mesiya nkololo wa Dafite kene?

³⁶Dafite nge kukwe wakati elaugwa nge Meya yakayengemala, kalebeleka kati, “ ‘She bakati kuna She wangu, gala ku luboko gwangu gwe luji kudzina ndibiga zwita zwizo pasi kwe makumbo awo.’

³⁷“Apa Dafite ungati en'dana eti ‘She,’ ungabe nkololo uwe tjini kene?” Bunjinji gwe bathu bakabe bakanhwilila gukashathisiwa nge ndebo iye.

³⁸Mu zwidiyo zwizwe wakalebeleka eti, “Muzwitjengete mu badiyi be nlayo, banoda kuambala hazu ndefu ndefu ne kulezwiwa ku matengeselo.

³⁹Banoda magalo mabuyanana mu ng'umba ye ntembezelo ne kuda bugalo gwe mamo ha kuli mu mizano ye zojiwa.

⁴⁰Banotjebela tjilikadzi, bezwiyedza bathu bakalulwama nge mitembezelo yabo milefu. Shamu yabo inowobe hwulu.”

⁴¹Jesu kagala kulingisana ne panodusigwa zwipo zwe mari, kalingilila bathu banjinji belonga mari abo panolongwa zwipo mu Ng'umba ye Ndzimu. Bafumi banjinji bakalonga mari manjinji.

⁴²Kukazha nshayi we tjilikadzi kalonga mari mabili e themba tukununu tjose.

⁴³Ipapo Jesu kadana badiyiwa babe kabadwa kati, “Ndolebesa nditi, iyeyi tjilikadzi isina tjayo, yadusa kupinda bose.

⁴⁴Bamwe bawungunula mu fumwa yabo, koga iye nenguba ali nshayi, wadusa kose kwaanako mu butjilo gugwe.”