Read Kalanga Mako 14 Bible Online

Mako 14 - Kalanga bible

Mako 14

¹Nzano we Kupinda pezhugwi* ne Nzano we Tjiwunga tjisina Mbidzo, wakabe wasaligwa nge mazhuba mabili koga. Ngono bapirisiti bakulu ne badiyi be nlayo bakabe beshaka zila ya bangabhata Jesu ngekwa kasumbikala, kuti bambulaye.

²Koga bakati, “Kusi nge tjibaka tje nzano, ngobe kungabe ne zhoba pakati kwe bathu.”

³Kati ali mu Bhetani, ali gele eja mu ng'umba ya Simoni wakatongobe ne mapele, kukazha nkadzi akasenga iteme tje alabhasita tje mafuta anonuhwa zwinozipa, e nadi* mbuyanana, ana ntengo upezhugwi kwazo, kazwinunula iteme, kadila mafuta mu nsholo wa Jesu.

⁴Koga bamwe ipapo bakabe belebesana nge bushongola beti, “Apa mafuta iyawa anozanisigwani kene?

⁵Abe angatengesiwa, kukawanika mari anopinda mari e siliva ali mazana matatu (300), kapiwa bashayi.” Ndizo bakantjemela.

⁶Koga Jesu kabadwa kati, “Thubukanani naye. Apa mon'dziyidzilani kene? Kana wandiyitila tjithu tjikulu kulu kwazo.

⁷Bashayi munabo misi yose, mungabayitila bubuya pamada, koga imi amutowobe nami misi yose.

⁸Ihwoyu nkadzi wayita tjaangatubula, wadila mbili wangu mafuta, eululwamisila kubiganyiwa.

⁹Ndolebesa ndoti kumuli, kumwe ne kumwe kunowosumikigwa Ndebo mbuya iyeyi mu shango yose, tjashingwa nge nkadzi ihwoyu tjowolebgwabo, kuti libe gumbuludzo nge kukwe.”

¹⁰Ipapo Judasi Isikariyoti, mmwe we bali gumi lina babili, kayenda ku bapirisiti bakulu kuti abawongele Jesu.

¹¹Ngono bakati behwa ikoku bakashatha, bakan'gadzabgwe kuti banowompa mari. Kudwa ipapo wakatangisa kushaka tjibaka tjakalulwama tje kutengesa Jesu.

¹²Mu zhuba le kutanga le Nzano we Tjiwunga Tjisina Mbidzo, be bhaya pkhwizana ye tjibhayilo tje kupinda pezhugwi, badiyiwa babe bakati kunli, “Ndi ngayi kwamunoshaka kuti tinomululwamisila kujila Nzano we Kupinda pezhugwi?”

¹³Ngono Jesu katuma badiyiwa babe bali babili kati, “Nginani mu nzi nkulu, ngono mowoshangana ne nlume akasenga shabana ye vula, muntobele.

¹⁴Mudwe mweni we ng'umba yaanowongina muti, ‘N'diyi bakati ng'umba yangu ye bezi yandinowojila Nzano we Kupinda pezhugwi ne badiyiwa bangu ndi ipi?’

¹⁵Unowomulakidza ng'umba hwulu itjapezhugwi kwe imwe, yakalongwa zwigalo ikalulwamisiwa, mutilulwamisile ipapo.”

¹⁶Badiyiwa ibabo bakamilika bakayenda ku nzi nkulu, bakanowana tjimwe ne tjimwe tjili sekwa aleba, ndizo bakalulwamisa.

¹⁷Kwakati madekwana Jesu kaswika ne bali gumi lina babili.

¹⁸Bakati bali pa tafuli beja, Jesu kati ku bali, “Ndolebesa ndoti, mmwe wenyu unowondiwonga, iye unoja nami.”

¹⁹Bakatangisa kungina buyendasi, ngono nge kutobedzana bakati, “Apa ndimi kene?”

²⁰Jesu kabadwa kati, “Mmwe we bali gumi lina babili, iye unoseba tjiwunga tjitje mu ndilo nami.

²¹Iye Nkololo we Nthu unowofa sekwa kwakakwagwa nge kukwe, koga wapalala iwoyo nlume unowonga Nkololo we Nthu! Kwabe kungayita ha nlume iwoyo akabe asagala azwagwa.”

²²Bakati beja, Jesu katola tjiwunga, kaboka Ndzimu, katjipemula kabapa, kati ku bali, “Tolani, mbili wangu ihwoyu.”

²³Katola bhepe le nkumbi we zhambi kati aboka kabapa iwo, bakaung'wa bose.

²⁴Kati ku bali, “Awa malopa angu anothama tjidumano tjitshwa, iwo anotebuligwa banji.

²⁵Ndolebesa ndoti kumuli, anditowong'wa kakale nkumbi we ntjelo iwoyu we nzhambi kuswikila zhuba landinowoung'wa uli ntshwa mu bushe gwe Ndzimu.”

²⁶Bakati bamba lumbo gunokudza Ndzimu, bakabhuda bakayenda ku Dombo le Mitoba.

²⁷Jesu kabadwa kati, “Mowondipalala mose, ngobe kwakakwagwa kukayi, “ ‘Ndowoloba nlisi, ngono pkhwizi dzowopalala.’

²⁸“Koga ha ndisinobe ndamusiwa mu bafi, ndowomutungamilila ku Galili.”

²⁹Pita kan'dwa kati, “Nenguba bangapalala bose, imi andingamusiye.”

³⁰Ngono Jesu kan'dwa kati, “Ndolebesa ndoti, busiku igogu, gukurume lowoti lisathu likalila kabili, unowobe wandizwilandula katatu.”

³¹Pita kan'dabila akasimisa eti, “Imi andingamuzwilandule, bukulu ndingafa namwi.” Bose bakaleba sa ikoko.

³²Bakayenda pathu panodang'wa Getsemane, kati ku badiyiwa, “Galani ipapa nditjatembezela.”

³³Katola Pita na Jakubo na Johani, kayenda nabo, kangina buyendasi, kadziyidzika kwazo mu meya,

³⁴kati ku bali, “Meya yangu izhele buyendasi kukulu kwandingafa. Salani pano makalinda.”

³⁵Kayenda thambgwana, kawila pasi katembezela ekumbila kuti, ha kutubuka dzene itjetji tjibaka tjingampinda.

³⁶Kati, “Tate bangu, akuna tjinomukona, dusani bhepe ileli le kudziyidzika pandili, nenguba kwakajalo, musiyite kuda kwangu, itani kuda kwenyu.”

³⁷Kati ebuya kawana bakayizela, kati kuna Pita, “Simoni, apa wakayizela kene? Nokong'wa kulinda awara ing'ompela koga kene?

³⁸Lindani mutembezele kuti ndizo musingine mu kulikiwa. Meya inoda tjose, koga nyama inokong'wa.”

³⁹Kabgwilila kanotembezela kakale eleba matama iwo zwawo.

⁴⁰Kabuya kakale ewana bakayizela, ngobe mesho abo akabe elema nge hwope. Ngono bakasizibe kuti bangan'dabila beyitini.

⁴¹Kabuya gwe butatu, ngono kabadwa kati, “Apa mutjakayizela, munyaluluka zwenyu kene? Kwagala, tjabe tjibaka, Nkololo we Nthu unowongegwa mu maboko e batjinyi.

⁴²Mukani, ngatiyendeni, ngobe n'wongi wangu wabe pejo.”

⁴³Ipapo koga atjalebeleka, Judasi, iye mmwe we bali gumi lina babili, kazha ana mbunga we bathu bakasenga makanu ne swimbo, bedwa ku bapirisiti ne badiyi be nlayo ne bakulu.

⁴⁴Ntengesi wakabe abapa tjilakidzo eti, “Iye wandinowoputa, ndiye, munsunge, muyende naye akalisiwa.”

⁴⁵Kati ezha kayenda kunli tjinyolotjo, kati eswika pana Jesu kan'dwa kati, “N'diyi wangu,” kabe emputa.

⁴⁶Bakambhata bakansunga.

⁴⁷Mmwe we bakabe bali ipapo kashomola bukanu gugwe, katema mmwe nlanda we Ntungamili we bapirisiti, kanthubula zebe.

⁴⁸Ngono Jesu kababhuzwa kati, “Apa mazha kuwogwisa tjigebeng'a kene, kwamunozha makabhata makanu ne swimbo kuwonditola?

⁴⁹Zhuba ne zhuba ndakabe ndi namwi mu Ng'umba ye Ndzimu ndidiya, ngono amuzotongo ndibhata. Koga matama e hwalo dze Ndzimu ngaazhadzisike.”

⁵⁰Badiyiwa babe bose bakanfupatila bakatizha.

⁵¹Ngono mmwe nzhuzha kantobela akafuka ngubo yoga, na iye bakambhata,

⁵²kasiya ngubo iye katizha ali mbujo.

⁵³Bakatola Jesu bakayenda naye ku Ntungamili we bapirisiti. Bapirisiti bakulu bose ne bakulu ne badiyi be nlayo bakabe bakakubungana.

⁵⁴Pita wakabe akantobela ali thambgwana naye kunoti mu nsha we Ntungamili we bapirisiti, ngono kagala ne balindi edziya moto.

⁵⁵Nge tjibaka itjetjo, bapirisiti ne makulukota wose bakashaka butendeki gungasungisa Jesu, kuti abulawe, koga bakasiguwane.

⁵⁶Banji bakadusa butendeki gwe manyepkhwa nge kukwe, koga gwakabe gusingayendidzane.

⁵⁷Bamwe bakamilika bepa butendeki gwe manyepkhwa nge kukwe beti,

⁵⁸“Takahwa eti, ‘Ndowokolomodza ng'umba iyeyi ye Ndzimu yakabumbiwa nge maboko, koga mu mazhuba matatu ndowobaka imwe isakathamiwa nge maboko.’ ”

⁵⁹Nenguba kwakajalo, butendeki gwabo gwakabe gusingawililane.

⁶⁰Ntungamili we bapirisiti kama pakati kwe bathu, kabhuzwa Jesu eti, “Apa autodabila batendeki ibaba tjabanoleba ngekuko kene?”

⁶¹Jesu kanyalala, kasidabile tjimwe. Ntungamili we bapirisiti kambhuzwa kakale kati, “Apa ndiwe Mesiya, Nkololo we Ndzimu unokudziwa kene?”

⁶²Jesu kati, “Ndimi. Ngono Nkololo we Nthu mowombona ali gele ku luboko gwe luji gwe Ndzimu Masimbawose, ezha nge makole e kudzimu.”

⁶³Ntungamili we bapirisiti kapalula zwiambalo zwizwe kati, “Titjashakilani batendeki kene?

⁶⁴Mazwihwigwa iye etuka Ndzimu. Moipedza tjini?” Ngono bose bakantilika nlandu we kuti wakafanigwa nge lufu.

⁶⁵Bamwe bakatangisa kunthwila mate bakanzwimba mesho benloba, ben'dwa beti, “Leba kuti ndiani wakuloba.” Balindi bakantibulanya.

⁶⁶Pita kati atjigele pasi mu nsha, kukabe kuzha mmwe we balandakadzi be Ntungamili we bapirisiti;

⁶⁷ngono kati ebona Pita edziya moto, kanlinga kan'dwa kati, “Nawebo wabe una Nnazareta[10] iwoyu, iye Jesu.”

⁶⁸Pita kalandula kati, “Anditoziba naiko anditohwisisa kuti unoleba ngekweni.” Kamilika kayenda ku nkoba.

⁶⁹Nlandakadzi kambona kakale, kadwa bathu bakabe bali pejo naye kati, “Iwoyu nlume mmwe wabo.”

⁷⁰Pita kalandula kakale. Kukati shule kwe tjibaka tjifutshwanana, bathu bakabe bali mile ipapo bakati kuna Pita, “Malebeswa, u mmwe wabo, ngobe u N'galili.”

⁷¹Pita katangisa kutuna ne kuzwilonga bhiso kati, “Iwoyu nlume wamunoleba nge kukwe anditonziba.”

⁷²Ipapo gukurume likalila gwe bubili, Pita kakumbula matama akabe alebgwa ndi Jesu eti, “Gukurume lowoti lisathu likalila kabili, unowobe wandizwilandula katatu.” Pita kadila guwo.