Read Kalanga Mako 15 Bible Online

Mako 15 - Kalanga bible

Mako 15

¹Kwakati zhuba liyedza, bapirisiti bakulu ne bakulu ne badiyi be nlayo bakashangana ne makulukota wose, bakalebesana, ngono bakasunga Jesu nge mitjili bakayenda naye kuna Pilato.

²Pilato kaswika kambhuzwa kati, “Ndiwe Mambo we Bajuta?” Jesu kanshandula kati, “Waleba.”

³Bapirisiti bakatangisa kuntilika milandu minjinji.

⁴Pilato kambhuzwa kakale kati, “Apa auna tjaungaleba kene? Autohwa kuti banokutilika milandu mingapani?”

⁵Koga Jesu kasitongo dwilila nge kubadabila, Pilato katjenama.

⁶Ngwenu bathu bakabe bakawolobela kuti nge Nzano we Kupinda pezhugwi Pilato abasunungulile nthu ng'ompela, wabanobe bakumbila.

⁷Ngono nge tjibaka itjetjo, kwakabe kuna mmwe nlume wakabe edang'wa Bharabhasi ali pakati kwe basungwa mu ng'umba ye basungwa nge nlandu we kubulaya mu nsi we kupanduka.

⁸Mbunga we bathu ukazha kuna Pilato kuwonkumbila kuti abathamile sekwa agala ebathamila.

⁹Kabashandula eti, “Moshaka kuti ndimusunungulile Mambo we Bajuta kene?”

¹⁰Wakabe abona kuti bapirisiti bakulu bazhisa Jesu kunli ngobe bana fupa.

¹¹Koga bapirisiti bakulu bakabe bafulila bathu kale kuti, bakumbile Bharabhasi mu bumo gwa Jesu.

¹²Pilato kababhuzwa kakale kati, “Ngono ndithameni ngekwe nlume iwoyu, wamunoti, ‘Ndi Mambo we Bajuta?’ ”

¹³Bathu bakamimila beti, “Mumbambule.”

¹⁴Pilato kapapha kabhuzwa eti, “Nge kutini, wathama bubi gupi?” Koga bunji gukadwilila guti, “Mumbambule.”

¹⁵Ndizo Pilato kasunungula Bharabhasi, ngobe wakabe eshaka shathisa bathu. Kudwapo kati Jesu alobgwe, shule kwa ikoko kampitshila ku Bajuta kuti bambambule mu tjileyanyo.

¹⁶Kudwapo Jesu wakatogwa nge babhayani bakangina naye mu ng'umba ye nlauli, bakadanana bose.

¹⁷Bakatola hazu ye mbala nshaba wakabondelela, bakanfukidza, bakanlukila tjiala tje mihwa, bakambadza itjo.

¹⁸Bakatangisa kun'dumilisa beti, “Ngakukudziwe Mambo we Bajuta.”

¹⁹Bakanloba mu nsholo nge lushanga, benthwila mate. Bakathigama mbeli kukwe se banonteta.

²⁰Bakati bepedza kun'dadila, bakambula hazu shaba bakambadza zwiambalo zwizwe. Bakabe bentungamilila kwabanonombambulila.

²¹Bakati bali mu zila benombambula, bakashangana ne mmwe nlume wakabe edang'wa Simoni we ku shango inoyi Sirene, eswika edwa kwaakabe edwa bakankombeledza kusenga tjileyanyo tja Jesu. Wakabe ali tate ba Alekizanda na Rufu.

²²Bakayenda bakanoswikisa Jesu pathu panodang'wa Gologota, kunodwa kuti pathu pe ipepe tje nsholo.

²³Ngono bakampa nkumbi wakashanganyiwa ne nti unodang'wa mira, koga Jesu kaulamba.

²⁴Bakambambula mu tjileyanyo, bekobana zwiambalo zwizwe, bekandila kubona kuti ndiani unotola tjipi.

²⁵Bakambambula nge tjibaka tje zhanalume mangwanana.

²⁶Nlandu wa Jesu wakabe wakakwagwa kuyi, “MAMBO WE BAJUTA.”

²⁷Zwigebeng'a zwibili zwakabambugwa naye, mmwe ku luboko gwe luji, mmwe kuna gwe lumeshwe. [

²⁸Hwalo dzikazhadzisika dzinoti, “Wakabaligwanyiwa ne batjinyi.”][11]

²⁹Kwakati ne bakabe bepinda napo bakan'gongobola, bedzungudza misholo bentuka beti, “Iwe unokolomodza ng'umba ye Ndzimu ukabuya ukayibaka kakale mu mazhuba ali matatu,

³⁰tjizwitjidza ngono, udeluke mu tjileyanyo!”

³¹Bapirisiti ne badiyi be nlayo bakan'dadilabo beti, “Wakatjidza bamwe, aatotubula kuzwitjidza.

³²Mesiya, Mambo we Iziraela ngaadeluke mu tjileyanyo, kuti ndizo tibone, tigalemoyo.” Ngono na ibabo bakabe bakabambugwa naye bakankayikanya.

³³Kwakati nge tjibaka tje masikati makulu, kukabe ne zhalima gulu mu shango yose, kukadzina kukanoti nge tjibaka tje butatu mu matewuko.

³⁴Ipapo Jesu kamilidza hwi kadana eti, “Eloi, Eloi lama sabakatani?” Kunodwa kuti, “Ndzimu wangu, Ndzimu wangu, mandisiyilani kene?”

³⁵Bamwe bathu bakabe bakalingilila bakati behwa eijalo bakati, “Hwililani, unodana Elija.”

³⁶Mmwe wabo kalabuka kadubika lungudze mu nkumbi wakatyorowa, kagubhayila mu lukombo kayisa ku nlomo wa Jesu, kati ku bamwe, “Imani tibone kene Elija unowozha kuwontulula.”

³⁷Ipapo Jesu kalilila pezhugwi kabe epela.

³⁸Nge tjibaka itjetjo tjisitili tje ng'umba ye Ndzimu tjikapaluka pakati, kudwa pezhugwi kunoti pasi.

³⁹Nlauli we babhayani bali zana wakabe ali mile akalingisana na Jesu, ebona Jesu epela kati, “Tjoselele iwoyu nlume wabe ali Nkololo we Ndzimu.”

⁴⁰Kwakabe kuna bamwe bakadzi bali mile thambgwana bakalingilila kose ikoku. Bamwe babo bakabe bali Mariya we Magadala na Mariya, mme ba Jakubo ntjetjana na Josefa, bana Salome.

⁴¹Bakabe bazha na Jesu kudwa ku ntuthu we Galili, bembhatsha. Kwakabe kuna bamwe bakadzi banjinji bakabe bazha na Jesu ku Jerusalema.

⁴²Kwakati madekwana eswika, iko kuli Zhuba le Kululwamisila le Sabata, lili zhuba linotobela le Sabata,

⁴³Josefa we ku Arimateya ali mmwe bathu bakabe bana mamo mu makulukota wakabe agala abe akalindila bushe gwe Ndzimu, kasimisamoyo kayenda kuna Pilato kunokumbila itumbu tja Jesu.

⁴⁴Ngono Pilato katjenama kuti Jesu wafa kale, kadana nlauli we babhayani bali zana kuti ambhuzwe kene Jesu ungabe afa kale.

⁴⁵Wakati ehwa nge nlauli we babhayani kuti Jesu wafa, kasunungulila itumbu Josefa kuti atjitole.

⁴⁶Josefa kamilika kayenda kanotenga jila, kazha katulula itumbu tja Jesu, katjipetela kanotjibiganya mu ikumbu tjakatshiwa mu shongwe. Kakunguludzila shongwe pa nkoba we ikumbu kuti azhalile.

⁴⁷Mariya we Magadala na Mariya mme ba Josefa bakabona pabiganyiwa Jesu.