Read Kalanga Mako 2 Bible Online

Mako 2 - Kalanga bible

Mako 2

¹Kukati shule kwe mazhuba mashomanana, Jesu abgwilila ku Kapenaume, bathu bakahwa kuti wabuya umu nzi.

²Bunjinji gukakubungana, kukadza kukasheteka bugalo ne pa nkoba dumbu, ngono kabasumikilila dama le Ndzimu.

³Bamwe balume bakazhisa nlume wakalobgwa nge gulukadzi kunli akasengwa nge balume banna.

⁴Se bakabe basingatubule kunswikisa pana Jesu nge bunji gwe bathu, bakapubula denga le ng'umba kulingisana na Jesu, bakakodelusa n'gwele ali mu thobo.

⁵Jesu kati ebona kugalamoyo kwabo kati ku nlume unogwala, “Nkololo wangu, wazwiibhatigwa matjinyo awo.”

⁶Ngono kwakabe kuna badiyi be nlayo bali gele ipapo bezwibhuzwa mu mimoyo yabo beti,

⁷“Ini iwoyu nlume elebeleka eijali kene? Unotuka Ndzimu. Ndiani ungazwiibhatigwa matjinyo kuzhe kwe Ndzimu woga?”

⁸Ipapo Jesu kaziba mu meya iye kuti banokumbula sa ikoko mu mimoyo yabo, ndizo kabadwa kati, “Apa mokumbulilani zwithu izwezwi mu mimoyo yenyu kene?

⁹Ndikupi kulelu pa kumwe, ha kuli kudwa n'gwele iwoyu nditi ‘Wazwiibhatigwa matjinyo awo,’ ne kun'dwa nditi, ‘Milika utole thobo iyo uyende?’

¹⁰Koga kuti muzibe ha Nkololo we Nthu ana simba mu shango le kuzwiibhatigwa matjinyo.” Ndizo kati kuna wakalobgwa nge gulukadzi,

¹¹“Ndokudwa nditi, milika utole thobo iyo uyende ku nzi uwo!”

¹²Kamilika, tjinyolotjo katola thobo iye, kabhuda kayenda bakanlinga bose. Oku kukatjenamisa mmwe ne mmwe, ndizo bakakudza Ndzimu beti, “Atithu tikabona kwakajali!”

¹³Jesu kayenda kakale pa hwunde ye gungwa. Mbunga nkulu we bathu ukazha kunli, ngono katangisa kubadiya.

¹⁴Kati eyenda akasupha nge gungwa, kabona nkhethisi Levi nkololo wa Alifeo ali gele pa bushingilo gwe nkhethisi. Jesu kati kunli, “Unditobele.” Levi kamilika kantobela.

¹⁵Kwakati Jesu eja zojiwa mu ng'umba ya Levi, bakhethisi banjinji ne batjinyi* bakabe beja naye ne badiyiwa babe, ngobe wakabe atobegwa nge bathu banjinji.

¹⁶Badiyi be nlayo be Bafarasi bakati bembona eja ne batjinyi ne bakhethisi, bakabhuzwa badiyiwa babe beti, “Ini eja ne bakhethisi ne batjinyi?”

¹⁷Jesu kati ehwa ikoku kabadwa kati, “Ate bathu banomuka zubuyanana banoshaka ng'anga, koga bagwele ndibo banoshaka ng'anga. Andizozha kuwodana balulwami, koga ndakazha kuwodana batjinyi.”

¹⁸Badiyiwa ba Johani ne Bafarasi bakabe bezwinyima zojiwa. Bathu bakazha bakabhuzwa Jesu beti, “Ini badiyiwa ba Johani ne be Bafarasi bezwinyima zojiwa, babo basingazwinyime izo?”

¹⁹Jesu kabadabila kati, “Apa bakokiwa ku nzano we ndobolo bangazwinyima zojiwa pa bukwe nkwasha atjinabo kene? Abangazwinyime zojiwa batjinaye.

²⁰Koga misi inowozha yabanowotolegwa nkwasha, ipapo ndiko kwabanowozwinyima zojiwa.

²¹“Akuna unotongo thumila nguli tshwa mu tjiambalo tjikulukugwi, ngobe nguli tshwa inowobuya, ikamwaula tjiambalo tjikapalukila mbeli.

²²Kakale akuna unodila nkumbi ntshwa mu makukhwa makulukugwi, ngobe angaphutuka nkumbi ukatebuka, kube kwatjinyika kose nkumbi ne makukhwa. Nkumbi ntshwa unodigwa mu makukhwa matshwa.”

²³Zhuba limwe le Sabata Jesu wakabe eyenda akapalama nnda we mathunde ana badiyiwa babe, ngono badiyiwa babe bakatangisa kumwaula zwiyako zwe mathunde.

²⁴Bafarasi bakati kuna Jesu, “Ini badiyiwa babo bethama tjisi mu nlayo nge nsi we Sabata kene?”

²⁵Kabadabila eti, “Apa amuthu mukatongo bala tjakathamiwa ndi Dafite ne baakabe anabo bana zhala, beshaka zojiwa kene?

²⁶Nge tjibaka itjetjo, Abhiyata wakabe ali Ntungamili we bapirisiti. Dafite wakangina mu Ng'umba ye Ndzimu, ngono katola zwiwunga zwakapiwa Ndzimu kaja ne bathu baakabe anabo, koga nge nlayo zwakabe zwili zwiwunga zwe bapirisiti koga.”

²⁷Jesu kadwilila kati ku bali, “Nsi we Sabata wakathamigwa nthu, nthu aazothamigwa nsi we Sabata.

²⁸Ndizo Nkololo we Nthu ndi She wa kose nenge Sabata.”