Read Kalanga Mako 3 Bible Online

Mako 3 - Kalanga bible

Mako 3

¹Mu tjimwe tjibaka Jesu kangina mu Ng'umba ye Ntembezelo, ngono kukabe kuna nlume una luboko gwakashweshwana mukati.

²Bamwe be bathu bakabe bali imomo bakabe beshaka tjimwe tjabangabona Jesu nlandu nditjo, bakanlinga nge njele kubona kene unowompodza nge nsi we Sabata.

³Jesu kadwa nlume una luboko gwakashweshwana kati, “Izha ngeno.”

⁴Ipapo kabhuzwa gubungano kati, “Apa kumu nlayo nge nsi we Sabata kushinga ndulamo kene kushinga mbipo, kutjengeta butjilo kene kubulaya?” Ngono bakanyalala koga.

⁵Kabalinga kupoteleka akagwadzamoyo, ehwisiwa zogwadza nge mimoyo yabo mikukutu, ngono kadwa nlume iwoyo kati, “Tambunudza luboko gugo.” Katambunudza luboko gugwe, ngono gukapola.

⁶Ipapo Bafarasi bakabhudila kuzhe, bakatangisa kulangana ne Batobeli ba Herode kuti bangambulaya tjini.

⁷Jesu kayenda ku gungwa ne badiyiwa babe, ngono mbunga nkulu we bathu unodwa ku Galili ukantobela.

⁸Bathu banjinji bakati behwa kose kwaakabe ethama, bakazha kunli bedwa ku Judiya ne ku Jerusalema ne ku Idumeya ne ku ntuthu useli kwe Jorodani na pejo ne mizi mikulu ye Tire ne Sidoni.

⁹Jesu kadwa badiyiwa babe kati banzhisile n'goro, ngobe bathu bakabe bali banjinji kwabakabe bangantshamba.

¹⁰Wakabe apodza bali banjinji, ndizo bose bakabe begwalabo, bakabe besundila mbeli kuti bambhate.

¹¹Meya mibi yakabe iti koga imbona, iwila pasi mbeli kukwe imimila iti, “U Nkololo we Ndzimu.”

¹²Koga wakabe eitjemela akasimisa, kuti isilebe kuti ndiye ani.

¹³Jesu kabe etatha dombo, ngono kadana baanoshaka, ndizo bakayenda kunli.

¹⁴Kashalula bali gumi lina babili kabadana kati “Batumwa” kuti babe naye nenge kuti abatume kunosumikila

¹⁵nenge kube ne ndaulo ye kudusa meya mibi.

¹⁶Aba ndibo bali gumi lina babili baakashalula, Simoni, iye waakatumila zina kati Pita.

¹⁷Jakubo nkololo wa Zebhedi ne nnung'una uwe we tjilume Johani ibo baakatumila zina eti Bhoanegesi, kunodwa kuti “Bakololo be dadamula kwe vula,”

¹⁸na Enduru na Filipo na Bhatolomeo na Matewu na Tomasi na Jakubo nkololo wa Alifeo na Tadeo na Simoni Nzeloti[2]

¹⁹na Judasi Isikariyoti iye wakawonga Jesu.

²⁰Ipapo Jesu kangina mu ng'umba, ngono kakale mbunga we bathu ukakubungana kukadza kukati iye ne badiyiwa babe bakasitubule kuja.

²¹Be nsha uwe bakati behwa ikoku bakayenda beti banonontola, ngobe kwakabe kuyi, “Unopenga!”

²² Badiyi be nlayo bakabe bedwa ku Jerusalema bakati, “Wakasungwa ndi Bheelizebhuli, Unoshingisa she we meya mibi kudusa meya mibi.”

²³Ndizo Jesu kabadana, ngono kalebeleka nabo nge zwifaniso eti, “Satani ungadusa Satani tjini wali?

²⁴Ha bushe gwakathubukana kakale gugwa tjekwago, bushe igogo agungadwilile.

²⁵Ha nsha wakathubukana nge kwawo, ugwa, nsha iwoyo aungadwilile.

²⁶Satani ha ezwipandukila, akathubukana, aangadwilile. Loba kukwe kobe kwatjiswika.

²⁷“Dumbu akuna nthu ungangina mu ng'umba ye nlume wakasima katola thundu iye asasunga mweni we ng'umba kutanga, kuti ndizo ekotapa thundu iye.

²⁸“Ndomubudza tjose ati, Ndzimu unowobazwiibhatigwa matjinyo abo wose ne masapa abanotuka Ndzimu ndiwo.

²⁹Koga iye unotuka Meya yakayengemala, Ndzimu autowonzwiibhatigwa, koga una jinyo lisingapele.”

³⁰Wakabe elebeswa ikoku nge matama abo abakabe beti, “Una meya mbi.”

³¹Ipapo kukaswika mmeyabe ne banung'una babe. Bakama kuzhe bakatuma mmwe kunodana Jesu mukati.

³²Mbunga we bathu wakabe uli gele pasi wakampoteleka, wakati kunli, “Mmeyabo ne banung'una babo bakuzhe banokushaka.”

³³Kabadabila eti, “Mmeyangu ne banung'una bangu ndiboani kene?”

³⁴Kati eijalo, kalinga bathu bakabe bali gele kumpoteleka, kabe eti, “Bonani! Bomme yangu ne banung'una bangu ababa!

³⁵Iye unoshinga kuda kwe Ndzimu ndiye nnung'una ne hazwadzi na mmeyangu.”