Read Kalanga Mako 4 Bible Online

Mako 4 - Kalanga bible

Mako 4

¹Jesu katangisa kakale kudiya ali pejo ne gungwa. Mbunga usinshoma we bathu ukakubungana panli kwaakati kangina mu n'goro kagala muuli mu gungwa. Bathu bose bakabe bali pa phili ye gungwa.

²Kabadiya zwithu zwinjinji eshingisa zwifaniso, ngono mu kudiya kukwe kati:

³“Hwililani! Ndzwali wakabhuda enodzwala.

⁴Ngono kati edzwala imwe mbewu ikawila mu zila ngono nyuni dzikazha dzikaija.

⁵Imwe mbewu ikawila mu lushale, ikashaya mavu manjinji ngono ikatjimbidza yamela, ngobe kwakabe kusina mavu manjinji akaivukidza.

⁶Kukati zhuba libhuda, mmela ukatshwa ngono ukaswaba, ngobe usina midzi.

⁷Imwe mbewu ikawila pakati kwe matenjana e mihwa ngono matenjana akakula akaimanikanya ndizo ikasiyite zwizwalo.

⁸Imwe mbewu ikawila mu mavu mabuya. Ikamela ikakula, zwizwalo zwikapaphidzika ne kungabe makumi matatu kunoti makumi ali matathatu ne kunoti ku zana.”

⁹Ipapo Jesu kati ku bali, “Iye una zebe dze kuhwa ngaahwe!”

¹⁰Jesu kati aliyega, bamwe bakabe bali panli bana badiyiwa babe bali gumi lina babili, bakambhuzwa ngekwe zwifaniso.

¹¹Kabadwa kati, “Masazibgwe e bushe gwe Ndzimu makaapiwa, koga kuna ibabo bakuzhe tjimwe ne tjimwe tjolebgwa nge zwifaniso,

¹²kuti ndizo, “ ‘Babone koga basibonesese, kakale bahwe koga basihwisise. Nge kuti ha bangahwa bangadwa beshanduka mu matjinyo abo, bakazwiibhatigwa nge Ndzimu.’ ”

¹³Ipapo Jesu kababhuzwa kati, “Apa amutohwisisa tjifaniso itjetji kene? Mowohwisisa zwimwe zose tjini ngono?

¹⁴Ndzwali unodzwala dama.

¹⁵Aba ndibo banonga mbewu yawila mu zila, banoti baamutjila dama bakalihwa; Satani kazha tjinyolotjo kadusa dama labaamutjila.

¹⁶Koga aba bamwe nge zila inofanana, ndibo banonga mbewu yakadzwagwa mu lushale. Banoti ha behwa dama, bakaliamutjila tjinyolotjo nge kushatha.

¹⁷Koga abana midzi, ndizo banobhatilila tjibaka tjifutshwanana koga. Ha kudziyidzika nenge kuhwisiwa zogwadza ngekwe dama kuzha, tjinyolotjo banowa.

¹⁸Kakale bamwe banonga mbewu yakadzwagwa pakati pe mihwa, ndibo banohwa dama,

¹⁹koga kudziyidzika nge zwe shango nenge kutjengeleka ngekwe fumwa nenge kuyemula zwimwe zwithu, kozha kukadzipa dama, likasibe ne zwizwalo.

²⁰Koga ibabo banonga mbewu yakadzwagwa mu mavu mabuya, ndibo banohwa dama bakaliamutjila, bakadusa zwizwalo, makumi ali matatu kene matathatu kene ali zana etjadzwagwa.”

²¹Jesu kabadwa kati, “Apa uyapo ungazhisa luvone kakogutshibikila nge itundu, kene kagubiga kusi kwe bulawo wali? Apa aangagubige patjena kene?

²²Tjimwe ne tjimwe tjakasumbikika tjowodzutunugwa, tjakasitilika tjowodusigwa patjena.

²³Ha kuna mmwe una zebe dze kuhwa ngaahwe.”

²⁴Kadwilila eti, “Yelani njele tjamunohwa! Tjilizanyo tjamunoshingisa mu bamwe nditjo tjinowoshingisiwa mu muli nenge kunopinda ikoko.

²⁵Iye una tjaanatjo unowopaphidzigwa, koga iye usina tjaanatjo, tjitukununu tjaanatjo unowotjitolegwa.”

²⁶Kapapha kati, “Bushe gwe Ndzimu gonga nlume unodzwala mbewu mu mavu.

²⁷Busiku ne masikati ali lele kene amuka, mbewu inomela ikula, koga asingazibe kuti inokula tjini.

²⁸Mavu nge kwawo anokudza zwizwalo. Kotanga mmela, shule kukazha shotje, shule likazhala shanga.

²⁹Ha mathunde ebidwa koga, unovuna, ngobe tjabe tjibaka tje kuvuna.”

³⁰Kakale Jesu kabhuzwa kati, “Towoti bushe gwe Ndzimu gofanana neni kene? Tingauyelesedza nge tjifaniso tjipi wali?

³¹Gofanana ne shanga ye mbewu ye lusaba, iyo tukununu mu mbewu dzose dzinodzwagwa mu shango.

³²Koga ha yadzwagwa, inokula ikabe iyo hwulu mu matenjana wose ne thabi dzalo dzikabe hwuluhwulu kunoti ne nyuni dzikabaka mashaka mu ntutshi walo.”

³³Jesu kasumikila dama nge zwifaniso zwakajali, elizanyidza kuhwisisa kwabo.

³⁴Aana tjaakaleba ku bali asingashingise zwifaniso. Ngono wakabe eti ana badiyiwa babe koga, etjenesa tjimwe ne tjimwe.

³⁵Zhuba ilelo kuli madekwana kati ku badiyiwa babe, “Ngatitjulukileni seli.”

³⁶Bakasiya mbunga we bathu bakayenda naye bali mu n'goro sekwa akabe ali gele. Kwakabe kuna mimwe migoro inoyendabo kwabakabe beyenda.

³⁷Kukamuka dutu gulu, mapundu e vula kangina mu n'goro, ngono n'goro wakabe wozhala vula.

³⁸Jesu wakabe akaizela tjandishule, akasazamila nsazamilo, badiyiwa babe bakammusa bakati kunli, “N'diyi, amuna hanya naswi kene ha tiloba?”

³⁹Kamilika katjemela phepo, kadwa gungwa kati, “Nyalala! Udzikame!” Ndizo phepo ikama kukabe ne kudzikama kukulu.

⁴⁰Kabadwa kati, “Motjisiwa ngeni, amuna kugalamoyo kene?”

⁴¹Bakabe ne kutja kukulu, bakabhuzwana beti, “Ndiani iwoyu unohwiligwa nge phepo nenge gungwa!”