Read Kalanga Mako 5 Bible Online

Mako 5 - Kalanga bible

Mako 5

¹Jesu ne badiyiwa babe bakatjulukila seli kwe gungwa ku shango ye Bagerasa.

²Kati ebhuda mu n'goro, kashangamidziwa nge nlume wakabe ana meya mbi, edwa ku zwikumbu.

³Nlume iwoyo wakabe egala ku zwikumbu, ngono kwakabe kusitjina na iye ungansunga kene nge ketani dumbu.

⁴Nlume iwoyo wakabe kanjinji esungwa makumbo ne maboko, koga ethubula ketani, evuna tshipi dzakansunga makumbo. Akuna wakabe akasima kwaangankulila nge masimba.

⁵Misi yose siku ne sikati wakabe egala mu zwikumbu na pezhugwi kwe matombo, emimila tjibaka tjose ezwitjekanya nge mabgwe.

⁶Wakati ebona Jesu ali thambo kalabuka kanthigamila.

⁷Kamilidzila hwi pezhugwi kati, “Unoshakashingani ndimi Jesu, Nkololo we Ndzimu Upezhugwi zhugwi? Ndokumbila nge zina le Ndzimu kuti usindihwise zogwadza.”

⁸Jesu wakabe ati kunli, “Bhuda mu nlume iwoyu, meya mbi ndiwe!”

⁹Jesu kabhuzwa meya mbi kati, “Zina lilo ndiani?” Kadabila eti, “Zina langu ndi Mphatho, ngobe tibanjinji.”

¹⁰Ukakumbila Jesu utshambilidza uti, asiyitatile kuzhe kwe ntuthu iwoyo.

¹¹Kwakabe kuna ngubi ye hwotji yakabe ifula pejo ne duthu.

¹²Meya mibi ikakumbila Jesu iti, “Utitatile mu hwotji idzedzi, utidumilile kungina mudzili.”

¹³Kaidumila, ngono meya mibi ikabhuda ikangina mu ngubi ye hwotji dzili zwiwulu zwibili (2 000). Dzikatizha nge phili ye gungwa yakakunguluka, dzikawila mu gungwa dzikafa.

¹⁴Ibabo bakabe bakadzilisa bakatizha, bakanoleba ku nzi nkulu ne mu shango, ngono bathu bakabhuda bakayenda kunobona kuti ini tjashingikala.

¹⁵Ngono bakazha kuna Jesu, bakawana nlume wakabe abe ana meya mibi ali gele ipapo, akasungila ali mpezha, ndizo bakatja.

¹⁶Ibabo bakabe babona bakabudza bathu tjashingikalila nlume wakabe abe ana meya mibi ne tjashingikalila hwotji.

¹⁷Ngono ipapo bakakumbila Jesu kuti abhude mu ntuthu wabo.

¹⁸Kukati Jesu engina mu n'goro, nlume wakabe abe ana meya mibi kankumbila kuti ayende naye.

¹⁹Jesu kalamba kati, “Yenda kanyi kuna be nsha uwo unobabudza kuti She wakushingila tjikulu kungapani nenge kuti wakuhwila ngoni kungapani.”

²⁰Ndizo nlume iwoyo kayenda, katangisa kuleba kuti Jesu wanshingila kungapani mu mizi ili gumi inoyi Dekapoli. Bathu bose bakakaabala.

²¹Jesu wakati atjuluka gungwa kakale nge n'goro ali seli, mbunga nkulu we bathu ukakubungana panli pa wunde ye gungwa.

²²Ipapo kukazha mmwe we balauli be Ng'umba ye Ntembezelo unodang'wa Jairo. Kati ebona Jesu kawila pa makumbo awe,

²³ngono kankumbila kwazo eti, “Nkololokadzi wangu unofa. Izha umbige maboko kuti ndizo apole, atjile.”

²⁴Ndizo Jesu kayenda naye. Mbunga nkulu kulu we bathu ukantobela ukammanikanya.

²⁵Kwakabe kuna nkadzi wakabe ana makole ali gumi lina mabili egwala bugwele gwe kubhizha malopa.

²⁶Wakabe adziyila kwazo alapiwa nge ng'anga njinji, ashingisa kose kwaakabe anako, ngono bugwele gugwe gukulila mbeli.

²⁷Kati ehwa ngekwa Jesu kazha ali shule kukwe mu mbunga, ngono kabhata hazu ya Jesu.

²⁸Wakazwidwa mu nkumbulo uwe kati, “Ha ndingabhata nenguba zwili izo zwiambalo zwizwe koga, ndowopola!”

²⁹Ngono kubhizha malopa kukwe kukama tjinyolotjo, kahwa mu mbili uwe kuti wapodziwa bugwele gugwe.

³⁰Jesu kahwa kuti simba lile labhuda munli, ipapo katendebuka pakati kwe mbunga, ngono kabhuzwa kati, “Ndiani wabhata zwiambalo zwangu?”

³¹Badiyiwa babe bakanshandula beti, “Se mubona bathu bakamumanikanya saikoku mungabhuzwa wali muti, ‘Ndiani wandibhata kene?’ ”

³²Koga Jesu kadwilila elinga kumpoteleka kubona kuti ndiani wakabe ambhata.

³³Nkadzi iwoyo wakabe eziba tjanshingikalila, ndizo kawila pa makumbo a Jesu etetema ngotja, ngono kambudza malebeswa wose.

³⁴Jesu kan'dwa kati, “Nkadzi, kugalamoyo kuko kwakupodza. Yenda nge kunyalala, upole kugwala kuko.”

³⁵Jesu wakati atjalebeleka, kukazha bathu bedwa ku ng'umba ya Jairo, nlauli we ng'umba ye ntembezelo beti, “Nkololokadzi uwo aatjipo. Utjadziyidzilani N'diyi kene?”

³⁶Jesu wakati ehwa tjabaleba, kadwa nlauli we ng'umba ye ntembezelo kati, “Usitje, galamoyo koga.”

³⁷Ngono kasitongo dumila mmwe nthu kuntobela kuzhe kwa Pita na Jakubo na Johani nkulu wa Jakubo.

³⁸Bakati baswika ku nzi we nlauli we ng'umba ye mitembezelo, Jesu kawana bathu be poyongana belila bekuwa.

³⁹Kangina, ngono kati ku bali, “Kupoyongana ikoku ne kulila ngekweni? Mwana wakayizela aazofa.”

⁴⁰Koga bakanseka mahanya. Kabadusila kuzhe bose, katola tate be mwana na mmeyabe ne baakabe anabo, ngono kangina kwakabe kuna mwana.

⁴¹Kambhata nge luboko kati, “Talitha, kumi,” kunodwa kuti, “Mwanadana, ndoti ku kuli, milika.”

⁴²Tjinyolotjo mwanadana kamilika kayenda yenda. Wakabe ana makole ali gumi lina mabili. Bathu bakakaabala kwazo.

⁴³Ngono kabalaya esimisa eti kusiyite nthu waziba ngekwa ikoku, ipapo kabadwa kati bape mwanadana tjimwe tjaangaja.