Read Kalanga Mako 6 Bible Online

Mako 6 - Kalanga bible

Mako 6

¹Jesu kamilika ipapo kayenda ku shango ya kanyi kwabo, ngono badiyiwa babe bakayenda naye.

²Kukati nge nsi we Sabata, katangisa kudiya mu Ng'umba ye Ntembezelo, ngono banjinji bakanhwa bakakaabala. Bakabhuzwana beti, “Iwoyu nlume wakawana poni kose ikoku? Butjenjedu gupi igogu gwaakapiwa? Unoshinga mishingo inolakidza simba.

³Apa ate iye mbezhi iwoyu kene, mwana wa Mariya kakale ali nkulu wa Jakubo na Josefa na Judasi na Simoni? Apa hazwadzi dzidze ate dzili muno naswi kene?” Bakan'gwadzilamoyo.

⁴Jesu kati ku bali, “Nlebesambeli aatoshaya tjilumbi ha kusi mu shango ya kanyi kwabo koga ne pakati kwe makamu awe ne be nsha wa kanyi kwabo.”

⁵Aazotubula kushinga mishingo inolakidza simba ipapo, kuzhe kwe kubiga maboko awe pezhugwi kwe bathu banogwala bashomanana, ebapodza.

⁶Ngono wakakaabadziwa nge kusheta kugalamoyo kwabo. Ipapo Jesu kayenda mu mizi ediya.

⁷Wakadanila kunli bali gumi lina babili, kabatuma bubili nge bubili, ngono kabapa simba pezhugwi kwe meya mibi.

⁸Kabalaya eti, “Musitongo senga tjimwe mu gwendo gwenyu, kuzhe kwe ludozo. Musitole tjiwunga kene gobhodo kene mari mu mwandabula wenyu.

⁹Muambale khwebana koga, muyende ne tjiambalo tjamakaambala koga.

¹⁰Ha muswika mu nzi mugale ipapo, kudzina mubhuda mu magalo iyawo.

¹¹Magalo asingamuamutjile, belamba kumuhwa, muti mubhudapo, mushashamule hwuluba mu makumbo enyu, kube tjilakidzo mu bali kuti nlandu nge wabo.”

¹²Bakabhuda bakanosumikila kuti bathu bashanduke.

¹³Bakadusa meya mibi minjinji, ngono bakazhodza bagwele banjinji mafuta bakabapodza.

¹⁴Mambo Herode kahwa ngekwa ikoku, ngobe zina la Jesu lakabe lalumba. Bamwe bakabe beti, “Johani we N'dubiki wakamusiwa mu bafi, ndizo masimba iyawa eshinga munli.”

¹⁵Bamwe bakati, “Ndi Elija.” Koga bamwe bakati, “Nlebesambeli unonga balebesambeli ba ntolo.”

¹⁶Koga Herode wakati ehwa ikoku kati, “Johani iye wandakathubula nsholo wakamusiwa mu bafi!”

¹⁷Herode nge kukwe wakabe alaula kuti Johani abhakhwe, ngono kati asungwe, alongwe mu ng'umba ye busungwa. Wakathama ikoku ngekwa Herodiyasi, nkadzi wa Filipo nnung'una uwe, waakabe atjilobola.

¹⁸Johani wakabe ati kuna Herode, “Ate kuli mu nlayo kuti ulobole nkadzi we nnung'una uwo.”

¹⁹Ndiko Herodiyasi kabhata Johani nge moyo, kayemula kumbulaya. Koga aazotubula kumbulaya.

²⁰Herode wakabe etja Johani, eziba ali nthu wakalulwama, kakale wakayengemala, ndizo kantjengeta. Herode wakabe eti ehwa matama a Johani kashangana nsholo, koga eda kunhwilila.

²¹Gwe bupelo nkoba ukazhuka. Herode wakati mu zhuba le kuzwikumbuludza mazwago awe kathamila hadzasha dzidze ne balauli be babhayani ne batungamili be Galili nzano we zojiwa.

²²Nkololokadzi wa Herodiyasi kangina kazana, kashathisa Herode ne bezi baanoja nabo. Mambo kati ku mwanadi iwoyo, “Undikumbile tjimwe ne tjimwe tjaunoda, ngono ndowokupa itjo.”

²³Kabuya katuna kati, “Tjimwe ne tjimwe tjaunokumbila ndowokupa itjo kene kuli gwamu le shango yangu.”

²⁴Nkololokadzi kabhudila kuzhe kanobhuzwa mmeyabe kati, “Apa ndi kumbileni kene mme?” Herodiyasi kan'dabila kati, “Kumbila nsholo wa Johani we N'dubiki.”

²⁵Tjinyolotjo nkololokadzi kayenda kuna mambo elibilidza kakumbila eti, “Ndokumbila nsholo wa Johani we N'dubiki uli mu ndilo.”

²⁶Ngono mambo kapuna moyo kwazokwazo, koga nge kutuna kukwe nenge bezi baakabe eja nabo, aazoda kuti unganlambila.

²⁷Ipapo katuma mmwe we babhayani banolinda, enlaya kuti azhise nsholo wa Johani. Iwoyo nlume kayenda, kanothubula nsholo wa Johani mu ng'umba ye busungwa,

²⁸ngono kauzhisa uli mu ndilo, kaupa mwanadi iwoyo, mwanadi kaupa mmeyabe.

²⁹Badiyiwa ba Johani bakati behwa ikoku, bakazha bakatola itumbu tjitje, bakanotjibiganya.

³⁰Batumwa bakabgwilila kuna Jesu bakambikila kose kwabakathama ne tjabakadiya.

³¹Bathu banjinji bakabe bezha, bamwe beyenda, ndizo bakasheta tjibaka tjekuti baje. Kabe edwa badiyiwa babe eti, “Izhani tiyende pakanyalala, munonyaluluka kushomanana.”

³²Ndizo bakayenda bali boga nge n'goro pathu pakanyalala.

³³Koga banji bakababona bemilika bakabaziba, ndizo bakalabuka kudwa mu mizi yose bakanobatangila.

³⁴Jesu wakati edeluka mu n'goro ebona mbunga nkulu we bathu, kabahwila ngoni ngobe bakabe benga pkhwizi dzisina nlisi. Ndizo wakatangisa ku badiya zwithu zwinjinji.

³⁵Kwakati zhuba lomila, badiyiwa babe bakazha kunli bakati, “Pano timu shango koga ne zhuba lashwa.

³⁶Paladzani bathu, bayende ku mizi ipejo banozwitengela tjabangaja.”

³⁷Kadabila eti, “Mubape tjinojiwa imwi.” Bakati kunli, “Oku kungatola mari e siliva ali mazana mabili (200)! Apa tishingise mari mangapo mu tjiwunga tibape baje kene?”

³⁸Kabhuzwa kati, “Muna zwiwunga zwingana? Kasholeni.” Bakati bashola bakashandula beti, “Tina zwiwunga zwishanu ne hwobe mbili.”

³⁹Jesu kagadza bathu pasi nge mibungana mu bushwa butshwa.

⁴⁰Ndizo bakagala pasi nge mibungana ye bathu bali zana (100) ne bali makumi mashanu (50).

⁴¹Wakatola zwiwunga zwishanu ne hwobe mbili, kalinga kudzimu kaboka, ngono kapemula zwiwunga. Kudwapo kazwipa badiyiwa babe kuti bazwipe bathu, kabe ebakobanya hwobe mbili bose.

⁴²Bose bakaja, ngono bakaguta.

⁴³Badiyiwa bakanunga mamburumburu e tjiwunga ne hwobe bakazhadza seme dzili gumi lina mbili.

⁴⁴Balume bakaja zwiwunga izwezo bakabe bali zwiwulu zwishanu (5 000).

⁴⁵Kudwa ipapo Jesu kadwa badiyiwa babe kati bangine mu n'goro bayende ku Bhetisaida, iye atjasala epaladza bathu.

⁴⁶Kati edwa pabali kanotatha dombo kunotembezela.

⁴⁷Kwakati kube madekwana, n'goro ukabe uli pakati kwe gungwa, iye ali ega mu shango.

⁴⁸Kabona badiyiwa babe begwisana ne migoti inoyendisa n'goro, ngobe phepo yakabe yakalingisana nabo. Kukati mazhokuyedza kayenda ku bali enangayila pezhugwi kwe vula. Ngono kayedza se unobapinda.

⁴⁹Bakati bembona eyenda nge makumbo pezhugwi kwe vula bakakumbula kuti ipuku, ndizo bakamimila,

⁵⁰ngobe bakambona bose, ngono bakapalukamoyo. Tjinyolotjo kalebeleka nabo kati, “Simisani mimoyo! Ndimi, musitje.”

⁵¹Ipapo katatha n'goro nabo ngono dutu likama. Bakakaabala kwazo,

⁵²nge kuti bakabe basahwisisa ngekwe zwiwunga. Mimoyo yabo yakabe yakakukutala.

⁵³Bakati batjulukila seli, bakaswika mu ntuthu we Genezareta, ngono bakayisa n'goro wabo ku phili.

⁵⁴Bakati bebhuda mu n'goro, bathu bakaziba Jesu.

⁵⁵Bakalabuka ntuthu wose, bakasenga bagwele mitengate bebayisa kumwe ne kumwe kwabanohwa kuyi uyako.

⁵⁶Kumwe ne kumwe kwaakabe eyenda mu mizana ne mu mizi mikulu, kene mu shango bakabe bebiga bagwele mu matengeselo, benkumbila kuti abadumilile kubhata nenguba guli lupeto gwe tjiambalo tjitje, ngono bose bakagubhata bakapola.