Read Kalanga Mako 7 Bible Online

Mako 7 - Kalanga bible

Mako 7

¹Bafarasi ne bamwe Badiyi be nlayo bakabe badwa ku Jerusalema bakakubungana pana Jesu.

²Ngono bakabona badiyiwa babe bamwe beja nge maboko asimabuyanana, asakangugwa.

³Bafarasi ne Bajuta bose, abatoja basangula maboko abo nge tjilenje tjabo. Oku banokuthama belondolodza tjilenje tje bawola.

⁴Ha bedwa ku matengeselo abatoja basangula. Banolondolodza zwilenje zwimwe zwinjinji, zwinonga kusuka mikombe ne hali ne zwija zwe phangula.

⁵Ndizo Bafarasi ne Badiyi be nlayo bakabhuzwa Jesu bakati, “Ini badiyiwa babo basingalondolodze zwilenje zwe bawola, beja zojiwa zwabo nge maboko asi mabuyanana?”

⁶Kadabila kati, “Isaya wakabe elebesa paakalebela mbeli nge kwenyu batjengedzi ndimwi eti, kwakakwagwa kuyi, “ ‘Bathu ibaba banondilumbidza nge milomo yabo koga, koga mimoyo yabo ikule nami.

⁷Banondithigamilila suli, ngobe banodiya milayo ye bathu se banodiya nlayo wangu.’

⁸“Moletjedza milayo ye Ndzimu, ngono mubhata zwilenje zwe bathu.”

⁹Ngono kati ku bali, “Muna zila mbuya seni ye kubigila ntome milayo ye Ndzimu, kuti ndizo mulondolodze zwilenje zwenyu!

¹⁰Mushe wakati, ‘Kudza tate babo na mmeyabo.’ Kakale wakati ‘Iye unoleba bubi ngekwa tate babe kene mmeyabe, nge malebeswa ngaafe.’

¹¹Koga moti nthu ha eti kuna tate babe kene mmeyabe, ‘Tjamakabe makafanila tjidziwa ndimi nditjo tjabe Korobhani, kodwa kuti tjapiwa Ndzimu,’

¹²ngono kudwapo amuton'dumila kuthamila tjimwe tate babe kene mmeyabe.

¹³Ndiko muthama kuti dama le Ndzimu lisishinge, nge tjilenje tjenyu tjamunopitshila ku bana benyu. Mothama zwithu zwinjinji zwakajalo.”

¹⁴Kakale Jesu kadana mbunga we bathu, ngono kati, “Mundibhulutaneni mose, ngono muhwisise.

¹⁵Akuna tjikuzhe kwe mbili we nthu tjinganthama kuti asibe mbuyanana. Koga tjithu tjinodwa mu nthu nditjo tjinonthama kuti asibe mbuyanana.

¹⁶[Una zebe dze kuhwa ngaahwe.]”[3]

¹⁷Kukati asiya mbunga we bathu angina mu ng'umba, badiyiwa babe bakambhuzwa ngekwe tjifaniso itjetji.

¹⁸Kati ku bali, “Apa namwibo amutohwisisa kene? Amutobona kene kuti akuna tjinongina mu nthu tjidwa kuzhe tjinganlonga shambgwa?

¹⁹Atjitongina mu moyo uwe, koga tjongina mu ntumbu uwe kudwapo tjibhuda mu mbili uwe.” Nge kujalo Jesu wakabe edwa kuti zojiwa zose zwibuyanana.

²⁰Kadwilila kati, “Tjinobhuda mu nthu nditjo tjinonthama kuti asibe mbuyanana.

²¹Ngoti tjinodwa mukati kwe nthu, mu moyo uwe, mikumbulo mibi, kuwalilana kuzhe kwe ndobolo ne bubava ne kubulaya ne bupombwe,

²²ne tjiba ne bubi ne kutjebela ne butjakwani ne bugovu ne ndandala ne tjinya bamwe mazina ne kuzwida ne bulengwe.

²³Zwithu zose izwezwi zwakabipa zodwa mukati kwe nthu, ngono zothama nthu kuti asibe mbuyanana.”

²⁴Jesu wakabhuda ipapo kayenda ku ntuthu we Tire ne we Sidoni, kangina mu ng'umba, ngono kaside kuti kube ne unoziba, koga kasitubule kubgwata.

²⁵Mmwe nkadzi wakabe ana mwana we tjianadana wakasungwa nge meya mbi, kazha kawila pa makumbo awe.

²⁶Nkadzi iwoyo wakabe ali N'giriki, akazwagwa mu Siriya mu ntuthu we Fenishiya. Wakakumbila Jesu kuti aduse meya mbi mu nkololokadzi uwe.

²⁷Jesu kati kunli, “Letja bana baje kutanga, ngobe akuzolulwama kuti zojiwa zwe bana zwitogwe zwiposegwe mbgwa.”

²⁸Nkadzi iwoyo kadabila eti, “Kwakajalo She, koga na idzo mbgwa dzikusi kwe tafuli, dzoja mamburumburu anowila pasi edwa mu ndilo dze bana.”

²⁹Ipapo kan'dwa kati, “Wadabila zubuyanana, ndizo ungayenda, meya mbi yabhuda mu nkololokadzi uwo.”

³⁰Kayenda kanyi, ngono kawana mwanadana uwe ali lele mu bulalo meya mbi yabhuda munli.

³¹Ipapo Jesu kashanduka edwa ku ntuthu we Tire, kapalama Sidoni edelukila ku gungwa gwe Galili nge zila ye ntuthu we Dekapoli.[4]

³²Bamwe bathu bakazhisa mmwe nlume wakabe ali bhubuzebe, kakale asingatubule kulebeleka zubuyanana. Ndizo bakakumbila Jesu kumbiga maboko.

³³Jesu kati antolela ntome, edwa naye pa mbunga we bathu, kalonga zwinyala zwizwe mu zebe dze nlume iwoyo. Ipapo kathwa mate, ngono kabhata lulimi gwe nlume iwoyo.

³⁴Kalinga zhuzhugwi kudzimu, kafemela pezhugwi, kati kunli, “Efata” kunodwa kuti, “Zhulika.”

³⁵Zebe dze nlume iwoyo dzikazhulika ne lulimi gugwe gukasununguka, ndizo katangisa kulebeleka zubuyanana.

³⁶Jesu kabalaya kati kushaye wababudza. Koga kati ajalo ibo bakakuandamisa kwazo.

³⁷Bakatjenama kwazo bakati, “Unothama zwithu zose kubuyanana seni? Unothama ne mabhubuzebe akahwa ne mbebebe dzikalebeleka.”