Read Kalanga Mako 8 Bible Online

Mako 8 - Kalanga bible

Mako 8

¹Mu mazhuba iyawo, kwakati mbunga nkulu we bathu wakubungana kakale, koga basina tjabangaja, Jesu kadana badiyiwa babe kati ku bali,

²“Ndohwila bathu ibaba zogwadza, ngobe babe ne mazhuba matatu banami, koga basina tjabanoja.

³Ha ndibapaladza kuti bayende ku mizi yabo bana zhala, banowokonegwa mu zila, ngobe bamwe babo bakadwa kule kule.”

⁴Badiyiwa babe bakadabila beti, “Apa ndiponi mu tjilambanyika itjetji, kungati nthu kawana tjiwunga tjingalizana kubajisa?”

⁵Jesu kababhuzwa kati, “Muna zwiwunga zwingana?” Bakadabila beti, “Zwili kutendeka.”

⁶Kadwa mbunga we bathu kati ugale pasi. Katola zwiwunga zwili kutendeka, kati aboka kazwipemula, kazwipa badiyiwa babe kuti bazwikobele bathu, ngono bakathama sa ikoko.

⁷Bakabe bana hwobe tukununu shomanana. Ngono wakati adzibokela, kadwa badiyiwa babe kati bakobele bathu.

⁸Bathu bakaja bakaguta. Kudwapo badiyiwa bakanunga mamburumburu, bakazhadza seme dzili kutendeka.

⁹Kwakabe kuna bathu bali zwiwulu zwinna. Kati abapaladza,

¹⁰kangina mu n'goro ne badiyiwa babe kayenda ku ntuthu we Dalimanuta.

¹¹Bafarasi bakatangisa kukangazhana na Jesu, bakanteya nge kunkumbila kuti athame tjilakidzo tjinodwa kudzimu.

¹²Kafemela pezhugwi kwazo kati, “Ini tjizekugwana itjetji tjishaka tjilakidzo kene? Ndolebesa ndoti kumuli, akuna tjilakidzo tjinowopiwa tjizekugwana itjetji.”

¹³Ipapo kabasiya kangina mu n'goro kakale, ngono katjulukila seli.

¹⁴Badiyiwa bakabe bakangang'wa kusenga zwiwunga kuzhe kwe tjing'ompela tjabakabe banatjo mu n'goro.

¹⁵Jesu kabatjenjedza kati, “Lingani mube ne njele ngekwe mbidzo ye Bafarasi ne ya Herode.”

¹⁶Bakalebeleka tje kwabo beti, “Unolebesiwa ngoti atina tjiwunga.”

¹⁷Jesu kaziba tjabanoalakana, ndizo kababhuzwa kati, “Ini mulebeleka ngekwe kuti amuna tjiwunga? Apa amuthu mukabonesesa, kakale mukahwisisa zwenyu kene? Mimoyo yenyu yakakukutala kene?

¹⁸Apa muna mesho koga mokong'wa bona, ne zebe munadzo koga mokong'wa hwa kene? Makangang'wa kene?

¹⁹Ndakati ndipemulila bathu bali zwiwulu zwishanu (5 000) zwiwunga zwishanu, makanunga mamburumburu mukazhadza seme ngana?” Bakadabila beti, “Gumi lina mbili.”

²⁰“Eke ndipemulila bali zwiwulu zwinna (4 000) zwiwunga zwili kutendeka, makanunga mamburumburu mukazhadza seme ngana?” Bakadabila beti, “Dzili kutendeka.”

²¹Kati ku bali, “Amuthu mukahwisisa zwenyu kene?”

²²Bakayenda ku Bhetisaida, bamwe bathu bakazhisa bhofu kuna Jesu, bakakumbila kuti alibhate.

²³Wakabhata bhofu nge luboko, ngono kalikwebela kuzhe kwe nzi, kati athwila bhofu ilelo mate mu mesho, kakale alibiga maboko kalibhuzwa kati, “Kuna tjaunobona kene?”

²⁴Nlume we bhofu kamilidza mesho, ngono kati, “Ndobona bathu, banonga miti inoyenda.”

²⁵Jesu kabiga maboko awe kakale mu mesho e bhofu. Ipapo nlume we bhofu kalinga zubuyanana apodziwa, ngono kabona tjimwe ne tjimwe kwakatjena.

²⁶Jesu kati ayende ku ng'umba iye, kapapha kati kunli, “Usitongo ngina mu mizi.”

²⁷Jesu ne badiyiwa babe bakapindila ku mizi imu ntuthu we Sizariya Filipi, kukati mu zila Jesu kababhuzwa kati, “Bathu banoti ndimi ani?”

²⁸Bakan'dabila beti, “Bamwe banoti ndimwi Johani we N'dubiki, koga bamwe bakati ndimwi Elija, bamwe banoti mu mmwe we balebesambeli.”

²⁹Jesu kati ku bali, “Koga imwi moti ndimi ani?” Pita kadabila kati, “Ndimwi Mesiya.”

³⁰Jesu kabadwa kati bashete wabanobudza nge kukwe.

³¹Wakatangisa kubadiya eti, “Iye Nkololo we Nthu wakafanila kudziyidziwa nge zwithu zwinjinji alambiwe nge bakulu* nenge bapirisiti ne badiyi be nlayo ne kuti wakafanilo bulawa, ngono shule kwe mazhuba matatu, amuke kakale.”

³²Wakalebeleka akatambunuka ngekwa ikoku. Ndizo Pita kankwebela ntome, ngono kantjemela.

³³Koga Jesu kati eshanduka elinga ku badiyiwa babe katjemela Pita kati, “Idwa pandili Satani, ngobe aute uli ku lubizho gwe Ndzimu, koga ukuna gwe bathu.”

³⁴Ipapo kadana mbunga we bathu kose ne badiyiwa babe, ngono kati ku bali, “Iye ungazha kundili ngaazwilandule, asenge tjileyanyo tjitje anditobele.

³⁵Iye unoshaka kuzwitjidza, butjilo gugwe gowonlashikila, koga iye unolashikigwa nge butjilo gugwe nge kwangu nenge Ndebo mbuya, unowogutjengeta.

³⁶Kobuzilani kuti nthu athuwe shango yose, koga ebe elashikigwa nge butjilo gugwe kene?

³⁷Ini nthu tjaangatenganya nge butjilo gugwe kene?

³⁸Iye unobhakhwa nge shoni nge kwangu nenge matama angu mu bathu bangwenu basingagagwebgwe, kakale bali batjinyi, Nkololo we Nthu na iye unowombhatigwa nge shoni, ha ezha nge gudzo la Tate babe, ana batumwa be kudzimu bakayengemala.”