Read Kalanga Mako 9 Bible Online

Mako 9 - Kalanga bible

Mako 9

¹Ipapo Jesu kabadwa kati, “Ndolebesa ndoti, bayapo bamile ipapa banowobona bushe gwe Ndzimu gozha nge masimba, basathu bakafa.”

²Shule kwe mazhuba ali matathatu, Jesu kadana Pita na Jakubo na Johani, katatha nabo dombo lefu lefu pasina nthu, ngono kashanduka mbumbiko mbeli kwabo.

³Zwiambalo zwizwe zwikangadzima, zwili zwitjena kwazo, kusina nsuki ungazwitjenesa sa ikoko mu shango.

⁴Elija na Mushe bakazha bakalebeleka na Jesu.

⁵Pita kati kuna Jesu, “N'diyi, kwaka naka kwazo kuti tibe tilipano. Dzene tingabaka mishasha mitatu, mmwe uli wenyu, mmwe uli wa Mushe, mmwe uli wa Elija.”

⁶Wakabe eleba ikoku, ngobe wakabe asingazibe kuti ungalebani, ngoti bakabe bapalukamoyo kwazo.

⁷Kukati ipapo gole likabafukidza, ngono hwi likalebeleka lidwa mu gole liti, “Oyu ndiye Nkololo wangu unodika, munhwilile.”

⁸Tjinyolotjo bakati belinganya, bakasitjabone mmwe anabo, kuzhe kwa Jesu ega.

⁹Kukati bedeluka mu dombo, Jesu kabalaya akasimisa kuti kushete wababudza tjababona, kudzina iye Nkololo we Nthu emusiwa mu bafi.

¹⁰Ndizo kukasibe ne wababudza, koga bebhuzwana beti, “Kumuka mu bafi kolebani.”

¹¹Bakambhuzwa bakati, “Ini Badiyi be nlayo beti Elija wakafanilo zha kutanga?”

¹²Ngono kati ku bali, “Elija unozha kutanga kuwolulwamisa zwithu zose, ngono ini kwakakwagwa ngekwe Nkololo we Nthu kuyi unowodziyidzika kalengudziwa?

¹³Koga ndomudwa nditi, Elija wakazha, ngono bakathama tjimwe ne tjimwe tjabada munli sekwa kwakakwagwa.”

¹⁴Bakati beswika ku bamwe badiyiwa, bakawana kuna mbunga we bathu ne Badiyi be nlayo benyanyayidzana ne badiyiwa ba Jesu.

¹⁵Ipapo mbunga wose ukati ubona Jesu ukatjenama kwazo, ndizo ukantizhilila ukan'dumilisa.

¹⁶Jesu kabhuzwa badiyiwa babe kati, “Molebani nabo?”

¹⁷Mmwe nthu mu mbunga kanshandula eti, “N'diyi, ndazhisa nkololo wangu kumuli, ngobe una meya inonkonedza lebeleka.

¹⁸Ha yammukila inonlashila pasi esiza mafulo etafuna meno ne mbili uwe uwomelela wose. Ngono ndakumbila badiyiwa benyu kuti baiduse, koga bakong'wa.”

¹⁹Jesu kabadwa kati, “Tjizekugwana tjisina kugalamoyo ndimwi, ndowobe namwi tjibaka tjingapani kene? Ndowobe ne moyonlefu namwi kuswikila lini kene? Munzhise kundili.”

²⁰Bakayisa mbisana kuna Jesu, ngono meya ikati ibona Jesu ikadzipikanya mbisana iwoyo ikanligila pasi, kabumbuluka esiza mafulo.

²¹Jesu kabhuzwa tate be mbisana kati, “Gwala ikoku kwakantangisa lini?” Bakanshandula beti, “Kudwila mu butukununu.

²²Ndikanjinji inligila mu moto nenge mu vula ishaka kumbulaya, koga ha mutubula kuthama tjimwe, mutihwile ngoni mutibhatshe.”

²³Jesu kati kunli, “Ukati, ha mutubula? Zwithu zose zotubuka mu nthu unogalamoyo.”

²⁴Ipapo tate be mbisana bakalebeleka bakati, “Ndogalamoyo, ngono bhatshani kusagalamoyo kwangu.”

²⁵Jesu kati ebona bathu bezha bakalabuka bose katjemela meya mbi kati, “Meya we mbebebe ne bhubuzebe ndiwe, bhuda munli, usitongo buya ukabgwilila munli kakale.”

²⁶Meya ikatjema ikazunguza mbisana iwoyo kwazo, ikabhuda munli, kasala enga itumbu, bunji gwabo gukati, “Wafa.”

²⁷Koga Jesu kambhata nge luboko kammilidza, kamuka kama nge makumbo.

²⁸Jesu kangina mu ng'umba, ngono badiyiwa babe bakambhuzwa bali boga beti, “Ini iswi takong'wa kudusa meya iyeyi?”

²⁹Ngono kati, “Inonga iyeyi inodusiwa koga nge ntembezelo.”[5]

³⁰Kudwa ipapo bakayendila mbeli bakapalama Galili. Jesu wakabe asingashake kuti kuzibgwe kwaayako.

³¹Ngoti wakabe ediya badiyiwa babe eti ku bali, “Iye Nkololo we Nthu unowobhakhwa kalongwa mu maboko e bathu, ngono banowombulaya, koga unowoti abulawa, shule kwe mazhuba matatu unowomuka.”

³²Koga bakabe basingahwisise ndebo iyeyi, ngono bakatja kumbhuzwisisa.

³³Bakaswika ku Kapenaume, ngono kati ali mu ng'umba kababhuzwa kati, “Mabe mulebeleka ngekweni mu zila?”

³⁴Koga bakanyalala, ngoti bakabe bati mu zila bakalebeleka ngekwe kuti, nkulu tjose ndiani?

³⁵Ndizo Jesu kagala pasi, kabadana bali gumi lina babili kabadwa kati, “Ha kuli kuti kuna unowobe nkulu, ngaabe iye ntukununu muna bose, kakale abe nlanda wa bose.”

³⁶Katola mwana ntukununu kambiga pakati kwabo, ngono kati entola engumbatila nge maboko kabadwa kati,

³⁷“Iye unoamutjila mwana unonga iwoyu nge zina langu, unoamutjila imi, ngono na iye unoamutjila imi, aatoamutjila imi koga, ngono unoamutjila iye wakandituma.”

³⁸Johani kan'dwa kati, “N'diyi, takabona mmwe nlume edusa meya mibi nge zina lenyu, tikan'dzibila, ngobe wakabe asi mmwe wedu.”

³⁹Koga Jesu kati, “Musin'dzibile, ngoti akuna unoshinga nshingo unolakidza simba nge zina langu ungati tjinyolotjo kudwapo kaleba bubi nge kwangu.

⁴⁰Iye usingalambane naswi nge wedu.

⁴¹Ndolebesa ndoti kumuli, iye unomupa nkombe we vula kuti mung'we, ngobe mudang'wa nge zina la Kirisiti, aangalashikigwe nge mbhayilo uwe.

⁴²“Koga iye unothama mmwe wa ibaba batukununu banogalamoyo mundili kuti bathame tjibi, koyita ha angasungiligwa gwiyo gulu mu ntshibha kalashigwa mu gungwa.

⁴³Ndizo ha luboko gugo gukuyita kuti utjinye, uguthubule. Koyita ha ungangina mu butjilo gusingapele uli tjilema, pana kuti ube ne maboko wose koga ube ulashigwa mu moto unongunguma.[6]

⁴⁴

⁴⁵Gumbo lilo ha likuyita kuti utjinye, ulithubule. Koyita ha ungangina mu butjilo uli tjilema, pana kuti ube una makumbo mabili, ngono uposegwe mu moto usingadzime.[7]

⁴⁶

⁴⁷Kakale ha zhisho lilo likuyita kuti utjinye, ulikonyombole uliduse, ngobe koyita ha ungangina mu bushe gwe Ndzimu una zhisho ling'ompela, pana kuti ube ne mesho mabili ulashigwe mu moto usingadzime.

⁴⁸‘Iko kuna hwonyana dzisingafe ne moto usingadzimwe.’

⁴⁹“Mmwe ne mmwe unowotjenesiwa nge moto, se mwenyu utjenesa tjibhayilo.

⁵⁰“Mwenyu wakalulwama, koga ha washuluka, ungathamwa tjini kuti ube ne njo kakale kene? “Ibeni ne mwenyu, mube ne mbakiso pakati kwenyu.”