Read Kalanga Luke 1 Bible Online

Luke 1 - Kalanga bible

Luke 1

¹Banji bakazwipa kukwala mbiko ye zwithu zwakashingikala[1] pakati kwedu,

²koga sekwa takazwibudziwa ndi ibabo bakabe balipo kutanga, bali batendeki kakale bali bashingili be dama le Ndzimu.

³Ndizo se imi ndakashakisisa nge njele tjimwe ne tjimwe kudwa mukutangisa, ndawana kwakandilulwamila kuti ndimukukwalile ndebo yakatambunuka, imwi tate Teofilo,

⁴kuti ndizo muzibe malebeswa ngekwe zwithu zwamakadiyiwa.

⁵Mu misi ya Herode mambo we Judiya, kwakabe kuna mpirisiti edang'wa kuyi Zakhariya, ali mmwe we goko la Abhiya, ngono wakabe ana nkadzi zina lile lili Elizabeta ali mmwe we zwizekugwana zwa Aroni.

⁶Bubili gwabo, bakabe bali balulwami mu mesho e Ndzimu, basina nlandu belondolodza milayo ya She yose, ne ndaulo dzidze.

⁷Koga bakabe basina bana ngobe Elizabeta wakabe asingathame bana, kakale bakabe bakwegula bose bubili.

⁸Ndizo kukati kuli zolo le goko la Zakhariya kubhata nshingo we bupirisiti se kwaakabe ali mpirisiti we Ndzimu,

⁹kashalugwa nge hakata kuyendidzana ne tjilenje tje bupirisiti kungina mu Ng'umba ye Ndzimu She ne kupisa motsha.

¹⁰Mu tjibaka itjetjo tje kupisa motsha, gubungano le bathu lakabe litembezela kuzhe.

¹¹Ipapo ntumwa wa She kazwilakidza kunli, ali mile ku luji gwe tjibeso tje motsha.

¹²Kukati Zakhariya embona, kadziyidzika kakale katja kwazo.

¹³Koga ntumwa we kudzimu kati kunli, “Usitje Zakhariya, ntembezelo uwo wahwika. Nkadzi uwo Elizabeta unowokuwanila mwana we tjilisana, ngono unowon'dana uti Johani.

¹⁴Unowobe ne kushatha ukapululudza, ne banji banowoshatha mu kuzwagwa kukwe,

¹⁵ngobe Johani unowobe nkulu mu mesho a She. Aatowong'wa nkumbi we zhambi, kene tjimwe tjing'o tjakabila. Ngobe unowozhadziwa nge Meya yakayengemala kudwila tjose atji mu tjibumbilo tja mmeyabe.

¹⁶Unowoshandusila bana banji be Iziraela kuna She, Ndzimu wabo.

¹⁷Kakale unowoyenda mbeli kwa She mu meya ne mu masimba a Elija, eshandusila mimoyo ya botate ku bana babo, ne basingahwe kathama kuti bahwilile Ndzimu bayende mu butjejendu gwe balulwami, elulwamisila bathu kuzha kwa She.”

¹⁸Ngono Zakhariya kabhuzwa ntumwa kati, “Ndingabe ne malebeswa tjini ngekwa ikoku? Ndi nthuntana ne nkadzi wangu wakwegula.”

¹⁹Ntumwa we kudzimu kan'dabila kati, “Ndimi Gabhariyele, imi ndinoma mbeli kwe Ndzimu misi yose. Ndatumwa kulebeleka nawe ne kukubudza ndebo mbuya iyeyi.

²⁰Bona! Unowobe mbebebe ukasilebeleke kuswikila zhuba linowoshingikala zwithu izwezwi, ngobe auzogalamoyo matama angu anowozhadzisika nge tjibaka tjawo.”

²¹Ipapo bathu bakabe bakalindila Zakhariya, ngono bakatjenamisiwa nge kunonoka kukwe mu Ng'umba ye Ndzimu.

²²Ngono kukati ebhuda, kasitubule kulebeleka nabo. Bakaziba ha abona mbono mu Ng'umba ye Ndzimu. Wakalebeleka nabo nge maboko koga asingatubule kulebeleka nge nlomo.

²³Kukati zolo lile lawila le kushinga lapela kabgwilila kanyi.

²⁴Shule kwe mazhuba iyawo nkadzi uwe Elizabeta kazwisenga ngono kazwisumbika mwedzi ili mishanu,

²⁵eti “She wandishingila ikoku mu mazhuba iyawa, wandilinga nge ngoni dzidze kandidusa shoni pakati kwe bathu.”

²⁶Shule kwe mimwedzi ili mitathatu Elizabeta akazwisenga, Ndzimu wakatuma ntumwa wawo Gabhariyele ku Nazareta nzi u mu ntuthu we Galili

²⁷ku mwanadi wakabe akabiganyidzigwa ndobolo ne nlume wakabe eyi Josefa, we nsha wa Dafite. Zina le mwanadi iwoyo lakabe lili Mariya.

²⁸Ntumwa we kudzimu kayenda kunli kati, “Dumila iwe unodika kwazo, She banawe!”

²⁹Mariya kadziyidzika kwazo nge matama awe, ngono katjenama kuti hwudumilisa kwakatini ikoku.

³⁰Koga ntumwa we kudzimu kati kunli, “Usitje, Mariya, Ndzimu wakuda.

³¹Unowozwisenga, ngono ukawana mwana we tjilisana, unowontumila zina uti Jesu.

³²Unowobe nkulu, kakale unowodang'wa Nkololo we Ndzimu Upezhugwi zhugwi. She Ndzimu banowompa tjigalo tje bushe gwa batategulu babe Dafite,

³³ngono unowobusa nge kusingapele mu ng'umba ya Jakubo, bushe gugwe agutowopela.”

³⁴Mariya kabhuzwa ntumwa we kudzimu eti, “Ikoku kowoshingikala tjini, se ndili mwanadi ndisathu aziba nlume kene?”

³⁵Ntumwa we kudzimu kashandula eti, “Meya yakayengemala inowozha mukuli ne masimba e Ndzimu Upezhugwi zhugwi anowobe mukuli. Ndizo mwana iwoyo waunowozwala, unowobe N'yengemali, kadang'wa kuyi Nkololo we Ndzimu.

³⁶Na Elizabeta gamu lilo, unowobe ne mwana nenguba akakwegula, iye wakabe ali balumbila umu mwedzi uwe we butathatu.

³⁷Akuna tjisingatubuke ku Ndzimu.”

³⁸Mariya kashandula eti, “Imi ndi nlanda wa She, ngakushingikale kundili sekwa waleba.” Ipapo ntumwa we kudzimu kansiya.

³⁹Kukati mu mazhuba iyawo Mariya kazwilulwamisa, kalibilidza kayenda ku nzi umu ntuthu we matombo, e Judiya,

⁴⁰ngono kaswika kangina mu nzi wa Zakhariya, kadumilisa Elizabeta.

⁴¹Ndizo kukati Elizabeta ehwa dumiliso ya Mariya, mwana katjuluka mu ntumbu uwe, Elizabeta kazhala Meya yakayengemala.

⁴²Kalebelekela pezhugwi kati, “Wakakombolegwa mu bakadzi bose, ndizo wakakombolegwa mwana waunowowana!

⁴³Koga ini kwashingikala kuti mme ba She wangu, bazhe kundili?

⁴⁴Ndati koga ndihwa udumilisa, mwana umu ntumbu wangu katjuluka nge kushatha.

⁴⁵Wakakombolegwa ngobe wakagalamoyo kuti matama awakabudziwa ndi She anoshingakala!”

⁴⁶Mariya kati, “Meya yangu inokudza She.

⁴⁷Meya yangu inoshatha ngekwe Ndzimu Ntjidzi wangu,

⁴⁸ngobe wayitila hanya butukununu gwe nlandakadzi uwe. Kudwa nasi zwizekugwana zose zondidana wakakombolegwa,

⁴⁹ngobe Ndzimu Masimbawose wandishingila zwikulu. Zina lawo lakayengemala.

⁵⁰Unohwila zogwadza ibabo banoutja, banouteta kudwa mu tjizekugwana kunoti mu tjizekugwana.

⁵¹Wakathama zwikulu nge luboko gwawo; Ukapaladza ibabo banozwikudza, mumimoyo yabo.

⁵²Wakadelusa boshe mu zwigalo zwabo zwe bushe. Koga ukamilidzila pezhugwi ibabo batukununu.

⁵³Wakagutsha bana zhala nge zwithu zwakanaka, koga bafumi kabashandusa bakalembedza maboko.

⁵⁴Wakabhatsha nlanda uwe Iziraela, ukumbulukigwa mahwilo zogwadza,

⁵⁵ sekwa wakalebeleka na botate bedu, bo Abhurahama ne zwizekugwana zwabo nge kusingapele kose.”

⁵⁶Mariya kagala na Elizabeta kungabe mimwedzi mitatu, kudwapo kabgwilila kanyi.

⁵⁷Kwakati tjibaka tjatjizha tje kuti Elizabeta awane mwana, katshibama mwana we tjilisana.

⁵⁸Ngono babakidzani naye ne makamu awe bakahwa kuti She wakanhwila ngoni kukulu, bakashatha naye.

⁵⁹Ndizo mu zhuba le buzhanakadzi (8) bakazha kuwothumbila[2] mwana, bakabe bewontumila beti Zakhariya, zina la tate babe.

⁶⁰Koga mmeyabe bakalebeleka beti, “Akutowojalo, unowodang'wa kuyi Johani.”

⁶¹Bakati kunli, “Akuna mmwe pakati kwe makamu awo una zina ilelo.”

⁶²Ndizo bakalebeleka nge maboko na tate babe, beshako ziba kuti ibo tate be mwana banoda kuntumila beti ani.

⁶³Zakhariya kakumbila bgwe linokwaligwa, ngono kakaabadza mmwe ne mmwe ngokwala eti, “Zina lile ndi Johani.”

⁶⁴Tjinyolotjo kazhula nlomo ne lulimi gugwe gukasununguka, katangisa kulebeleka, elumbidza Ndzimu.

⁶⁵Babakidzani naye bakatjenama kwazo ne mu ntuthu wose we matombo we Judiya, bathu bakabe belebeleka ngekwe zwithu izwezwi zose.

⁶⁶Mmwe ne mmwe wakahwa ikoku ezwibhuzwisisa eti, “Mwana iwoyu ini tjaanowobe itjo ngono?” Ngobe simba la She lakabe lilimunli.

⁶⁷Tate ba Johani, Zakhariya bakazhala Meya yakayengemala, ngono bakalebelambeli beti,

⁶⁸“Gudzo ngalibe muna She, Ndzimu we Iziraela, ngobe wazha ku bathu bawo ukabadzutunula.

⁶⁹Watizhisila Ntjidzi una masimba unodwa mu ng'umba ye nlanda uwe Dafite.

⁷⁰Sekwa wakaleba nge balebesambeli bawo bakayengemala kudwa ntolo,

⁷¹kuti takafanila tjidziwa mu zwita zwedu, ne mu maboko abose bakatibenga.

⁷²Wakathama ikoku kulakidza mahwilo zogwadza akagadziwabgwe bobatategulu bedu, ne kukumbula tjidumano tjawo tjakayengemala,

⁷³ne kutuna kwawakatuna kuna tate bedu Abhurahama,

⁷⁴kutisunungula mu maboko e zwita zwedu, kuti titubule kushingila She tisingatje tjimwe

⁷⁵mu kuyengemala ne kululwama mbeli kukwe, mu butjilo gwedu gose.

⁷⁶Nawe mwanangu, unowodang'wa nlebesambeli we Ndzimu Upezhugwi zhugwi, ngobe unowoyenda mbeli kwa She kunlulwamisila zila

⁷⁷kupa bathu ba She zibo ye kuti jidzo lozha nge kuzwiibhatigwa kwe zwibi zwabo,

⁷⁸nge mahwilo zogwadza e Ndzimu kowopenya tjedza mutili tjidwa zhuzhugwi.

⁷⁹Kupa tjedza ibabo bagele mu zhalima ne bamu ntutshi we lufu, kutitungamilila mu zila ye kunyalala.”

⁸⁰Ngono mwana kakula kasima mu meya, ndizo kagala mu tjilambanyika kudzina eboneka patjena ku Iziraela.