Read Kalanga Luke 12 Bible Online

Luke 12 - Kalanga bible

Luke 12

¹Kukati kutjakajalo zwiwulu zwinjinji zwe bathu, zwatjikubungana zotshambana, Jesu katangisa kulebeleka ne badiyiwa babe kutanga eti, “Muyele njele mbidzo* ye Bafarasi butjengedzi.

²Akuna tjakazwimbiwa tjisingawozumbunugwa, kene tjakasumbikika tjisingawozibgwa.

³Ndizo tjamaleba mu zhalima tjowohwika mu tjedza ne tjamunoleba munyebezela mu ng'umba, tjowoandamisiwa.”

⁴“Ndomubudza bazwalani bangu nditi, musitje ibabo banobulaya mbili, koga shule kwa ipapo kusina tjabangadwilila bakatjithama.

⁵Koga ndowomutjenjedza kuti wamakafanilo tja ndiupi. Itjani iye unoti shule kwe kubulaya kabe ne simba lekuposela mu moto usingadzime. Ee, ndomubudza, muntje.

⁶“Apa zhazho shanu adzitotengesiwa nge mapeni mabili kene? Koga akuna ne ing'ompela yadzo inokanganika mbeli kwe Ndzimu.

⁷Nenge mavudzi e misholo yenyu na iwobo akabagwa. Ndizo musitje ngobe themba yenyu inopida themba ye zhazho njinji.”

⁸“Ndomubudza nditi, iye unoleba kuti unami mbeli kwe bathu, Nkololo we Nthu unoleba kuti unaye mbeli kwe batumwa be Ndzimu.

⁹Koga iye unondizwilandula mbeli kwe bathu unowozwilandugwa mbeli kwe batumwa be Ndzimu.

¹⁰“Ngono mmwe ne mmwe unoleba dama lakabipa ngekwe Nkololo we Nthu unowozwiibhatigwa, koga iye unoleba kwakabipa ngekwe Meya yakayengemala aatowozwiibhatigwa.

¹¹“Ha bemuzhisa kumusekesa mbeli kwe ng'umba dze mitembezelo ne mbeli kwe balauli na mbeli kwa boshe, musidziyidzike ngekwe kuti mowodabila muitini kene kuti mowolebani,

¹²ngobe Meya yakayengemala inowomudiya tjamunowoleba nge tjibaka itjetjo.”

¹³Mmwe nlume mu mbunga kati kuna Jesu, “N'diyi, budzani nkulu wangu akobane nami lukata.”

¹⁴Koga Jesu kan'dabila eti, “Nlume ndiwe, ndiani wakandipa fanilo dze kusumikilisa kene kukoba lukata pakati kwenyu!”

¹⁵Ipapo kati ku bali, “Lingani! Muzwilise mu bugovu gose, butjilo gwe nthu ate guli mu bunji gwe thundu iye.”

¹⁶Ngono kababudza tjifaniso kati, “Nnda we mmwe nfumi wakadusa zojiwa zwinjinji.

¹⁷Nfumi iwoyo kakumbula eti, ‘Ndowothamani kene? Andina pathu pandingabiganya zojiwa zwangu.’

¹⁸Ipapo kati, ‘Tjandinowothama ndi etji: Ndowokolomola matula angu, ngono abaka makulu, muali ndowobiganya mathunde angu wose ne thundu yangu yose.

¹⁹Ndizo ndowozwidwa nditi ndina thundu njinji mbuya dzakabigigwa makole manjinji. Anditowodziyidzika, ndowoja ang'wa ashatha.’

²⁰Koga Ndzimu ukati kunli, ‘Tjilengwe ndiwe, busiku gwa nasi butjilo gugo gowotogwa. Thundu iyo inowobe yani kene?’

²¹Oku ndiko sekwa kunowobe iko ku mmwe ne mmwe unozwibiganyila thundu koga asakafuma muna zwe Ndzimu.”

²²Ipapo Jesu kati ku badiyiwa babe, “Ndizo ndomubudza nditi, musidziyidzike ngekwe butjilo gwenyu, kuti mowojani kene ngekwe mibili yenyu, kuti mowoambalani.

²³Butjilo gopinda zojiwa ne mbili unopinda zwiambalo.

²⁴Kumbulani makungubo, aatodzwala kakale aatovuna, aana matula koga Ndzimu unoajisa. Imwi ngono mopinda nyuni kungapani kene!

²⁵Ndiani wenyu ungati ngodziyidzika nge moyo, kapaphidza kuli kutukununu bulefu gwe butjilo gugwe kene?

²⁶Se musingake mukashinga ikoku kuthu kutukununu, modziyidzikilani ngekwa zose zwimwe kene?

²⁷Kumbulani maluba sekwa anokula. Aatoshinga kene kuli luka. Koga ndomubudza kuti, na iye Solomoni mu bubuya gugwe gose, aazobe akaambala se ling'ompela lawo.

²⁸Ha kuli iko Ndzimu sekwa unoambadza bushwa gwe shango, guyapo nasi ngono mangwana gulashigwa mu moto, unowomuambadza kukulu kungapani kene, imwi bathu be kugalamoyo kutukununu!

²⁹“Ndizo musigale muti mowojani kene mowong'wani kene kuli kudziyidzika mu meya mushaka tjamunowoja ne tjamonowong'wa. Musidziyidzike mu mimoyo ndiko.

³⁰Zwitjaba zose zwe shango zotizhilila izwezwi zwakajali, koga Tate benyu banoziba kuti mozwishaka.

³¹Mu bumo gwa ikoku shakani bushe gwabo, ngono zwithu izwezwi zowobe zwenyu naizobo.”

³²“Musitje, imwi ngubi tukununu ngobe hwuda kwa Tate benyu kumupa bushe.

³³Tengesani thundu dzenyu, ngono mukobele bashayi. Muzwishakile zwikwama zwisingawoshakala ne fumwa kudzimu isingawopela, pasingasedzele mbava kakale sola paisingaje.

³⁴Ipapo pana fumwa yenyu, ndipo panowobe ne mimoyo yenyubo.

³⁵“Ambalani mupelele, muzwilulwamisile kushinga ne mavone enyu agale ethuta,

³⁶se balanda bakalindila tetshi wabo kudwa ku nzano we bukwe, kuti ndizo ati ezha ekokodza, banzhulile nkoba tjinyolotjo.

³⁷Bakakombolegwa balanda ibabo banowowang'wa ndi tetshi wabo ha ebuya bakalinga. Ndolebesa ndoti kumuli, unowozwilulwamisa kabapakulila, kabagadza pa tafuli, kabapa zojiwa.

³⁸Bakakombolegwa balanda ibabo banowoti tetshi wabo kabawana bakazwilulwamisa, kene angaswika pakati kwe busiku kene mazhokuyedza.

³⁹Koga zibani woku, ha mweni we ng'umba akabe aziba tjibaka mbava tjainowozha nditjo, unobe asakaletja ng'umba ipkhwanyiwa.

⁴⁰Ndizo namwibo galani makazwilulwamisa, ngobe Nkololo we Nthu unowozha nge tjibaka tjamusakankumbula.”

⁴¹Pita kabhuzwa kati, “She, apa mobudza iswi koga tjifaniso itjetji, kene mmwe ne mmwe?”

⁴²She kashandula eti, “Ndiupi ntjengeti wakatjenjela unogalikabgwe, unoti tetshi kampa simba mu balanda bamwe kupa balanda gobe labo le zojiwa nge tjibaka tjakalingisana?

⁴³Wakakombolegwa nlanda iwoyo unowowang'wa ndi tetshi uwe eshinga sa ikoko.

⁴⁴Ndomubudza malebeswa, nditi, unowompa masimba mu zwithu zose zwaanazo.

⁴⁵Koga ha nlanda iwoyu angazwidwa eti, ‘Tetshi wangu unononoka kuzha,’ ngono ipapo ekowotangisa kuloba balandalume ne balandakadzi, eja eng'wa edakwa,

⁴⁶tetshi we nlanda iwoyo unowozha mu zhuba laasakankumbula nenge tjibaka tjaasingazibe. Unowonloba kunogwadza kan'gadza ne basingagalemoyo.

⁴⁷“Iwoyo nlanda unoziba kuda kwa tetshi uwe koga asingathame tjinoshakwa ndi tetshi uwe, unowolobgwa shamu njinji.

⁴⁸Koga iye usingazibe ngono ethama zwithu zwaakafanila hwisigwa zogwadza, unowolobgwa shamu shomanana. Muna iye wakapiwa kunji, kowoshakwa kunji, kakale muna iye unotjengeteswa kunji, kunji kwazo kowoshakwa munli.”

⁴⁹“Ndakazhisa moto mu shango, ngono ndoyemula seni kuti ungabe wabhatidziwa kale!

⁵⁰Koga ndina kudubikiwa kwe kudziyidzika kwandakafanila dubikiwa, ndizo ndi mu buyendasi gungapani kuswikila kuwila!

⁵¹Apa mokumbula kuti ndazhisa mbakiso mu shango kene? Aa, ndomubudza, ndazhisa kuthubukana.

⁵²Kudwila ngwenu nsha we bathu bashanu unowothubukana, batatu begwisana ne babili ne babili begwisana ne batatu.

⁵³Banowothubukana, tatayi begwisana ne nkololo ne nkololo egwisana na tatayi, mayi begwisana ne nkololokadzi ne nkololokadzi egwisana na mayi, mmezwale begwisana ne nlongo ne nlongo egwisana na mmezwale.”

⁵⁴Kati ku mbunga we bathu, “Moti mubona gole limilika kunomila zhuba, tjinyolotjo mukati, ‘Vula inowona,’ ngono ikana.

⁵⁵Kakale phepo ye Burwa ha ihwuhwudza, moti kowopisa kwazo, ngono kukabe iko.

⁵⁶Batjengedzi ndimwi! Mohwisisa kulingika kwe shango ne nge kwa pezhugwi. Ini musingahwisise kuti misi ino inodwani kene?”

⁵⁷“Ini musingatubule kuzwizibigwa tjakalulwama?

⁵⁸Uti ha ukwebegwa ku nlayo nge wakutilika nlandu, gwisa kwazo kudumana naye mu zila, kuti ungadwa ekukwebela ku nsumikilisi, ngono nsumikilisi kakuyisa ku mbhati, mbhati kakuyisa ku ng'umba ye busungwa.

⁵⁹Ndokubudza malebeswa, autowobhuda mukati kudzina walipa mari wose.”