Read Kalanga Luke 13 Bible Online

Luke 13 - Kalanga bible

Luke 13

¹Kwakabe kulipo bamwe bathu tjibaka itjetjo, bakabudza Jesu ngekwe Bagalili Pilato baakabulaya batjapa Ndzimu zwibhayilo.

²Jesu kabadabila eti, “Mokumbula kuti Bagalili ibabo bakabe bali batjinyi bakulu kupinda Bagalili bamwe bose ngobe bakafa sa ikoko kene?

³Aa, ndomubudza nditi koga kuzhe kwe kuti mushandukile ku Ndzimu, namwibo mowoloba mose saibo.

⁴Kene ibabo bali gumi lina bali zhanakadzi (18) bakafa, bawigwa nge thungamakole mu Siloame, mokumbula kuti bakabe bana nlandu kupinda bamwe bose bakabe begala mu Jerusalema kene?

⁵Aa, ndomubudza nditi koga kuzhe kwe kuti mushandukile ku Ndzimu namwibo mowoloba mose saibo.”

⁶Ipapo kaleba tjifaniso etji kati, “Mmwe nthu wakabe ana mpaya wakadzwagwa mu nnda uwe we mizhambi, ngono kayenda kunoshola mitjelo muuli, koga kasiwane tjimwe.

⁷Ndizo kati ku ntjengeti we nnda we nzhambi, ‘Bona, kwabe makole matatu ndizha kuwoshola mitjelo mu mpaya iwoyu, koga ndisingawane tjimwe. Uuteme uulige! Unozanisilani mavu?’

⁸Ntjengeti we nnda iwoyo kashandula eti, ‘Tetshi wangu, muuletjedze gole ileli ndiulimile ndiulonge nthudze.

⁹Ha ungazwala mitjelo gole linozha, kowobe kwakalulwama! Ha usingazwale, ipapo muuteme muulige.’ ”

¹⁰Jesu wakabe ediya mu imwe ng'umba ye mitembezelo nge zhuba le Sabata ngono kukabe kuliyapo

¹¹mmwe nkadzi wakabe akalemadziwa nge meya mbi makole ali gumi lina makole ali zhanakadzi (18). Wakabe akagongonyala, asingatubule kuzwitambunudza.

¹²Ngono Jesu kati embona kan'dana kan'dwa kati, “Nkadzi, wasunungugwa mu bulema gugo.”

¹³Ipapo kambiga maboko tjinyolotjo nkadzi iwoyo katambunuka, kakudza Ndzimu.

¹⁴Ngono ntungamili we ng'umba ye mitembezelo kazhala bushongola, ngobe Jesu apodza nkadzi nge nsi we Sabata, kati ku bathu, “Kuna mazhuba matathatu e kushinga. Ndizo izhani muwopodziwa mu mazhuba iyawo, kusimu nsi we Sabata.”

¹⁵She kan'dabila eti, “Batjengedzi ndimwi! Apa mmwe ne mmwe wenyu aatoti mu nsi we Sabata kasunungula ng'ombe iye kene donki iye mu danga kaitakulila kuzhe kanoing'wisa kene?

¹⁶Ngono apa nkadzi iwoyu, tjizekugwana tja Abhurahama, wetjinga wakasungwa ndi Satani makole ali gumi lina makole ali zhanakadzi, asisunungugwe mu nsi we Sabata muna tjakabe tjakansunga kene?”

¹⁷Kati eleba ikoku zwita zwizwe zose zwikabhakhwa nge shoni, koga bathu bakashathiswa nge zwithu zose zwinotjenamisa zwaakabe eyita.

¹⁸Ipapo Jesu kabhuzwa kati, “Bushe gwe Ndzimu gongani kene? Ndowogufanidzanya ngeni?

¹⁹Gonga mbewu tukununu ye lusaba, yakati nthu kaitola kaidzwala mu nnda uwe. Ngono ikakula ikabe denje, ngono nyuni dzinowuluka dzikabaka mashaka mu thabi dzalo.”

²⁰Kapapha kati, “Ndowofanidzanya bushe gwe Ndzimu ngeni?

²¹Gonga mbidzo yakatogwa nge nkadzi kaishanganya ne bgwisa bunjinji gwe tjiwunga, bhelelo bgwisa gose gukabila.”

²²Ipapo Jesu kapalama mizi ne mizana ediya ali mu zila iye eyenda ku Jerusalema.

²³Mmwe kambhuzwa kati, “She, apa kowotjidziwa bathu bashomanana koga kene?” Ngono kati ku bali,

²⁴“Gwisani tjose kungina nge nkoba wakamanikana, ngobe ndomubudza nditi, banji banowogwisa kungina, koga abatowotubula.

²⁵Kowoti koga mweni we ng'umba amilika azhalila nkoba, mowoma kuzhe mukokodza muti, ‘She, mutizhulile,’ koga unowodabila eti, ‘Anditoziba kuti modwa ngayi.’

²⁶Ipapo mowoti, ‘Takaja tikang'wa namwi, kakale makadiya mu zila dzedu.’

²⁷Koga unowodabila eti, ‘Ndomubudza, anditoziba kuti modwa ngayi. Idwani pandili, bashingi be mbipo ndimwi.’

²⁸Ipapo mowolila mukalobanya meno nge kugwadziwa kukulu, mubona Abhurahama na Isaki na Jakubo na bose balebesambeli, bali mu bushe gwe Ndzimu koga imwi malashigwa kuzhe.

²⁹Bathu banowozha bedwa ku bhezhuba ne ku golombedzo ne ku bunandzwa ne ku burwa, ngono banowogala pasi bakaja zojiwa mu bushe gwe Ndzimu.

³⁰Ngono bonani, bamwe bashule banowobe bambeli ne bamwe bambeli banowobe bashule.”

³¹Nge tjibaka itjetjo, bamwe Bafarasi bakazha kuna Jesu bakati kunli, “Bhuda ipapa uyende ntome ngobe Herode unoshaka kukubulaya.”

³²Jesu kadabila kati, “Yendani munobudza phungubgwe iyeyije kuti, ‘Ndowodusa meya mibi, apodza bathu nasi na mangwana, ngono mu zhuba le butatu ndowowidza nshingo wangu.’

³³Nekwakajalo, ndakafanila yenda nasi na mangwana na nn'gwani, ngobe dumbu, akuzofanila kuti nlebesambeli ungafila kuzhe kwe Jerusalema.

³⁴“Jerusalema! Jerusalema wee! Iwe unobulaya balebesambeli ukakikithidza nge mabgwe batumiwa ku kuli, ndikangana ndiyemula kukubunganya bana babo, se hwuku ibubatila hwukwana, koga ulamba?

³⁵Bonani, ng'umba yenyu yabe dongo. Ndomubudza, amutowondibona kakale, kudzina muti, ‘Wakakombolegwa iye unozha nge zina la She!’ ”