Read Kalanga Luke 15 Bible Online

Luke 15 - Kalanga bible

Luke 15

¹Bakhethisi ne batjinyi bakabe besedzela bose panli kun'hwilila.

²Koga Bafarasi ne badiyi be nlayo bakang'ong'ola beti, “Nlume iwoyu unoamutjila batjinyi, kakale kaja nabo.”

³Ndizo Jesu kababudza tjifaniso, eti:

⁴“Ndiupi nlume pakati kwenyu, ungati ana pkhwizi dzili zana ling'ompela (100) ebe elashikigwa nge ing'ompela yadzo, kasisiye dzili makumi ali zhanalume ana dzili zhanalume (99) mu shango, kanoshaka pkhwizi iyeyo yalashika kudzina eibona kene?

⁵Ngono ha aibona, unoipika nge kushatha.

⁶Ha eswika kanyi, unodana bazwalani babe ne babakidzani naye, kabakubunganya kati ku bali, ‘Shathani nami, ngobe pkhwizana yangu yakabe yamila ndaibona.’

⁷Koga saikoko ndomubudza nditi, kowobe ne kushatha kudzimu, ha ntjinyi ng'ompela eshandukila matjinyo awe, kupinda balulwami bali makumi ali zhanalume ana bali zhanalume (99) basingashetane ngokushanduka.”

⁸“Kene ndiupi nkadzi una maloso e siliva[7] e mazhuba ali gumi, unoti alashikigwa nge limwe lawo kasibhatidze luvone, katshwayila ng'umba, kalishaka nge njele kudzina elibona kene?

⁹Ngono ha alibona unodana bazwalani babe be tjikadzi ne babakidzani naye, ebakubunganya eti ku bali, ‘Shathani nami, ngobe loso langu le siliva lakabe lamila ndalibona.’

¹⁰Koga sa ikoko, ndomubudza nditi, batumwa be Ndzimu banoshatha ha ntjinyi nng'ompela eshandukila matjinyo awe.”

¹¹Jesu kapapha kati, “Kwakabe kuna mmwe nlume ana bakololo bali babili.

¹²Ntjetjana kati kuna tate babe, ‘Tate, mundipeni langu gobe mu thundu yenyu lakalingisana nami.’ Ndizo tate babo bakabakobanya thundu yabo.

¹³Shule kwe mazhuba mashomanana, nkololo ntjetjana kakubunganya thundu iye yose katola gwendo, kayenda ku shango ikule kule, ngono ikoko kazanisa fumwa iye mu butjilo gusingashathise.

¹⁴Ndizo kati azanisa kose kwaakabe anako, kukabe ne bhamba gulu mu shango iyeyo, katangisa kudziyila.

¹⁵Ngono wakamilika kazwiyisa ku mmwe nlume we shango iyeyo, wakantumila ku nnda uwe kunopa hwotji dzidze zojiwa.

¹⁶Kayemula kuja zojiwa zwinojiwa ne hwotji, koga akuna wakampa tjimwe.

¹⁷Koga kati ekumbula kati, ‘Bangana balanda ba tate bangu banoja zojiwa zwikasala, koga imi pano ndofa nge zhala!

¹⁸Ndowomilika ayenda kuna tate bangu, ngono ati ku bali, Tate, ndakatjinyila kudzimu kose namwi.

¹⁹Andizotjafanila dang'wa nkololo wenyu mundibhate se mmwe we bashingi benyu.’

²⁰Ndizo kamilika kayenda kuna tate babe. “Koga kukati atji thambo, tate babe bakambona, ngono bakanhwila ngoni kwazo. Bakatizhilila nkololo wabo, bakan'gumbatila bakamputa.

²¹Nkololo kati kuna tate babe, ‘Tate, ndakatjinyila kudzimu kose namwi. Andizotjafanila kudang'wa nkololo wenyu.’

²²Koga tate babe bakati ku bashingi babo ‘Libilidzani! Zhisani tjiambalo tjakanaka kupinda zose mun'ambadze itjo. Mun'ambadze ring'i ne khwebana.

²³Zhisani gondolo lakakola mulibhaye. Ngatijeni tishathe.

²⁴Ngobe nkololo wangu iwoyu, wakabe afa koga unotjila kakale, wakabe amila koga wabong'wa.’ Ndizo bakatangisa nzano.

²⁵“Nge tjibaka itjetjo nkololo hwola wakabe ali ku minda. Kati ezha pejo ne nzi, kahwa kumbiwa kuzang'wa.

²⁶Ndizo kadana mmwe we balanda kambhuzwa kuti koshingikalani.

²⁷Ngono nlanda kan'dabila eti, ‘Nnung'una uwo wabuya, ngono tate babo mbhayila gondolo lakakola, ngobe wabuya etjila kakale ezwihwa.’

²⁸“Nkuluwe kagwadzamoyo kalamba ngina mu nzi, ndizo tate babe bakabhuda bakanonteta.

²⁹Koga kadabila tate babe eti, ‘Lingani! Makole wose iyawa ndakabe ndimushingila kakale andithu atongo tjuluka milayo yenyu. Koga amuthu mukatongo ndipa kene tjili tjibudzana kuti ndithamile bakwinya bangu zojiwa.

³⁰Koga nkololo wenyu iwoyu wakazanisa thundu yenyu nge fukula dzinozwitengesa unoti eswika mu nzi mukambulayila gondolo lakakola!’

³¹Tate babe bakadabila beti, ‘Nkololo wangu, iwe unami misi yose, na zose zwandinazo nge zwizo.

³²Ndizo kuzana ne kushatha kofanila, ngobe nnung'una uwo iwoyu, wakabe afa koga wotjila kakale, wakabe amila koga wabong'wa.’ ”