Read Kalanga Luke 16 Bible Online

Luke 16 - Kalanga bible

Luke 16

¹Jesu kabudza badiyiwa babe kati, “Kwakabe kuna mmwe nlume we nfumi ana ntjengeti wakatjetiwa kunli, kuyi unotjinya thundu ya tetshi uwe.

²Ndizo kan'dana, kambhuzwa kati, ‘Ini ikoku kwandinohwa nge kuko kene? Undibikile ngekwe butjengeti gugo, ngobe autowodwilila uli ntjengeti.’

³Ntjengeti iwoyo kaalakana ali ega eti, ‘Ndowothamani wali? Tetshi wangu unondidusa mu nshingo. Andizosima kwandingatsha kakale ndina shoni dze kukumbila.

⁴Ndoziba tjandinowothama kuti ndizo nditi ndilashikigwa nge nshingo pano, bathu bandiamutjile mu mizi yabo.’

⁵“Ndizo kadana mmwe ne mmwe wakabe ana nlandu kuna tetshi uwe. Kabhuzwa we kutanga kati, ‘Una nlandu ngapani kuna tetshi wangu kene?’

⁶Kadabila eti, ‘Gabha le mafuta anobhika ali zana (100).’ Ntjengeti kan'dwa kati, ‘Tola lukwalo gugo gwe milandu ugale pasi ukwale tjinyolotjo, makumi ali mashanu (50).’

⁷Ipapo kabhuzwa mmwe kati, ‘Ngono iwe una nlandu ungapani?’ Kadabila eti, ‘Hwomo dze mathunde dzili zana ling'ompela (100).’ Kan'dwa kati, ‘Tola lukwalo gugo gwe milandu ukwale makumi ali zhanakadzi (80).’

⁸“Tetshi kakudza ntjengeti usina malebeswa, ngobe ashinga nge butjenjedu. Bathu be shango iyeyi bakatjenjela mu kushingidzana, kupinda bathu be tjedza.”

⁹Ndomubudza nditi, “Muzwithamile zwikamu nge fumwa isakalulwama, kuti ndizo ha yapela mowoamutjigwa mu magalo asingapele.

¹⁰Iye unogalikabgwe muna zwitukununu unogalikabgwe muna zwikulu, na iye usingagalikebgwe muna zwitukununu, aatogalikabgwe muna zwikulu.

¹¹Ndizo ha musakabe mugalikabgwe mu kushingisa fumwa isakalulwama, ndiani unowomugalabgwe mu kushingisa fumwa ye malebeswa kene?

¹²Kakale ha musakabe mugalikabgwe muna zwe bamwe, ndiani unowomupa zwinowobe zwenyu.

¹³“Akuna nlanda ungashingila botetshi babili. Ungadwa ebenga mmwe wabo, kada mmwe wabo, kene kabhatilila mmwe wabo, kalamba mmwe wabo. Aungashingile kose Ndzimu ne fumwa.”

¹⁴Bafarasi, ibo bakabe beda mari bakahwa kose ikoku, ngono bakaseka Jesu mahanya.

¹⁵Koga Jesu kati ku bali, “Imwi mu ibo banozwilulwamisa mu mesho e bathu, koga Ndzimu unoziba mimoyo yenyu, zwinokudziwa mu bathu zoshimisa mu mesho e Ndzimu.

¹⁶“Hwalo dze nlayo ne dze balebesambeli dzakashingisiwa kuswikila Johani ezha. Tjinga kwa ipapo, ndebo mbuya ye bushe gwe Ndzimu inosumikigwa, ngono mmwe ne mmwe unogwisa nge masimba kungina muguli.

¹⁷Kulelu kuti kudzimu ne shango zwipinde, pakuti kulashike shanga ing'ompela ye nlayo, kene ili tukununu kungapani.

¹⁸“Iye unolamba nkadzi uwe elobola mmwe nkadzi, unothama bupombgwe, na iyebo nlume unolobola nkadzi wakalambiwa, unothama bupombgwe.”

¹⁹“Kwakabe kuna mmwe nlume we nfumi, akaambala ngubo ye mbala we bushaba gwakabondelela ne jila lakanaka le themba ipezhugwi, ngono ethama mizano ye zojiwa mazhuba wose egala ali mu ipepkhwe.

²⁰Pa nkoba we nzi uwe kwakabe kuli lele nshayi unodang'wa Lazaro, ali zhele malonda,

²¹ngono eyemula kuja mamburumburu e zojiwa anowa mu tafuli ye nfumi ne mbgwa dumbu dzakazha dzikanazwa malonda awe.

²²“Nshayi iwoyo kafa, ngono batumwa be kudzimu bakansengela pa ifuba tja Abhurahama. Nlume wakafuma na iye kafa ngono kabiganyiwa.

²³Kati ali mu bugalo gwe bafi, kwaakabe ali mu kudziyila kukulu, kamilidza mesho kabona Abhurahama ali kule kule, ana Lazaro, pa ifuba tjitje.

²⁴Ndizo kamba kati, ‘Tate Abhurahama, mundihwile ngoni, mutume Lazaro adubike theswi ye tjinyala tjitje mu vula, atothodze lulimi gwangu, ngobe ndimu kuhwa zogwadza kukulu mu moto iwoyu.’

²⁵“Koga Abhurahama kadabila eti, ‘Nkololo wangu, kumbula kuti mu butjilo gugo wakawana zwithu zwizo zwakanaka, koga sa ikoko Lazaro kawana zwakabipa, ndizo ngwenu, unonyaladziwa pano, iwe umu kuhwa zogwadza kukulu kulu.

²⁶Pezhugwi kwa ikoku kose, pakati kwedu nawe, kuna gorokoro gulu linodzibila banoshaka zha ikoko bedwa ngeno, kene banoshaka zha ku tili bedwa ikoko.’

²⁷Kashandula eti, ‘Ngono ndomukumbila tate, kuti mutume Lazaro, ayende ku ng'umba ya tate bangu,

²⁸ngobe ndina bakololo ba tate bangu bali bashanu. Ngaanobatjenjedza, kuti ndizo basizhebo ku bugalo igogu gwe kuhwa zogwadza.’

²⁹“Koga Abhurahama kadabila kati, ‘Bana Mushe ne balebesambeli ngabahwe ibo.’

³⁰Koga kati, ‘Aa, Tate Abhurahama, ha mmwe unodwa mu bafi angayenda ku bali, banowoshandukila matjinyo abo.’

³¹Abhurahama kati kunli, ‘Ha basingahwilile Mushe ne balebesambeli, abangahwilile kene mmwe angamuka mu bafi.’ ”