Read Kalanga Luke 17 Bible Online

Luke 17 - Kalanga bible

Luke 17

¹Jesu kadwa badiyiwa babe kati, “Miliko ye jinyo yakafanila kuti izhe, koga yee mme wee! Wapalala iye wainozha ndiye.

²Kungayita kuti asungiligwe gwiyo mu ntshibha uwe, ekowolashigwa mu gungwa, pana kuti ayite mmwe waibaba batukununu kuti atjinye.”

³Ndizo muzwilise, “Ha ikamu tjitjo tjitjinya, utjitjemele, ngono ha tjishandukila matjinyo atjo, utjizwiibhatigwe.

⁴Koga ha tjikuyitila jinyo kanjinji nge zhuba, koga tjizha ku kuli katendeka, tjizwibona nlandu tjiti, ‘Ndoshandukila matjinyo angu,’ utjizwiibhatigwe.”

⁵Batumwa bakati kuna She, “Paphidzani kugalamoyo kwedu.”

⁶Ngono She kadabila eti, “Ha mabe muna kugalamoyo kungapa phudzi ye lusaba, mungabe muti ku nti iwoyu we malibheri, ‘Dzikunuka, udzikilike mu gungwa,’ Ngono ukamuhwa.”

⁷“Apa kuna mmwe wenyu ungati ana nlanda unolima kene unolisa pkhwizi, ngono ungati iwoyo nlanda edwa ku minda kan'dwa kati, ‘Izha ngeno tjinyolotjo ugale pasi uje kene?’

⁸Apa bukulu aangati, ‘Undithamile tjilayilo, ube undipakulila ndije nding'we, shule kwaipapo ungajabo ukang'wa?’

⁹Apa unowoboka nlanda uwe, ngobe ashinga tjaadwiwa kuti atjishinge kene?

¹⁰Ndizo namwibo ha mashinga tjimwe ne tjimwe tjamadwiwa kuti mu tjishinge, muti, ‘Ti balanda basi betjimwe, tashinga iwo nshingo wedu koga.’ ”

¹¹Jesu kati ali mu zila eyenda ku Jerusalema, kapinda pakati kwe Samariya ne Galili.

¹²Ngono kati engina mu mmwe nzi, balume bali gumi bakabe begwala mapele bakanshanganidza, bakama thambgwana, ngono

¹³bakamilidzila mahwi abo pezhugwi bakadana beti, “Jesu, Tetshi wedu, mutihwile ngoni!”

¹⁴Kati ebabona kabadwa kati, “Yendani munozwilakidza ku bapirisiti.” Ngono bakati batjayenda bakapola.

¹⁵Ipapo mmwe wabo kati ebona kuti wapola kashanduka, ekudza Ndzimu nge hwi lipezhugwi.

¹⁶Kazwilashila pa makumbo a Jesu kamboka. Wakabe ali Nsamariya.

¹⁷Ngono Jesu kabhuzwa kati, “Apa babe basi gumi bose bapodziwa kene? Bamwe bali zhanalume bangayi?

¹⁸Akuna ne ng'ompela washandukila shule kukudza Ndzimu, kuzhe kwa iwoyu ntaya kene?”

¹⁹Ipapo kati kunli, “Milika uyende, kugalamoyo kuko kwakutjidza.”

²⁰Jesu kati ebhuzwiwa nge Bafarasi kuti bushe gwe Ndzimu gowozha lini, kadabila eti, “Bushe gwe Ndzimu agutowozha nge zila kene nge zwilakidzo zwinobong'wa,

²¹naiko bathu abatowoti ‘Wogogu kene wogu jee!’ Ngobe bushe gwe kudzimu gu mu muli.”

²²Ngono kati ku badiyiwa babe, “Misi inowozha yamunowoyemula kubona limwe le mazhuba e Nkololo we Nthu, koga amutowolibona.

²³Bamwe banowoti kumuli, ‘Wojee!’ Kene ‘Woyoyu!’ Musiyende, musibatobele.

²⁴“Se lupenyo gwe vula gunopenya, guvoneka zhuzhugwi gudwa ku lubizho kunoti ku lubizho, Nkololo we Nthu unozha mu zhuba lile[8] ngekwakajalo.

²⁵Koga kutanga wakafanila adziyidziwe nge zwithu zwinjinji, kakale alambiwe nge bathu bangwenu.

²⁶Sekwa kwakabe kuli iko mu misi ya Nuwa, kowobe sa ikoko mu misi ye Nkololo we Nthu.

²⁷Bathu bakabe beja beng'wa, belobola kakale belobodziwa kunoti zhuba Nuwa laakangina mu ng'umba inoangama mu vula se n'goro, ngono nkubila ukazha ukalobesa bathu bose.

²⁸Sa ikoko, konga sekwa kwakabe iko mu misi ya Lote, bathu bakabe beja beng'wa, betenga kakale betengesa, bedzwala kakale bebaka,

²⁹koga nsi Lote waakabhuda mu Sodoma, Ndzimu wakanisa moto ne bgwe linonyawuka le salifa se vula, ngono zwikabalobesa bose.

³⁰Kowobe kwakajalo mu zhuba linozumbunugwa Nkololo we Nthu.

³¹“Mu nsi iwoyu upezhugwi kwe denga le ng'umba ana zwija zwizwe mukati, ngaasideluke kuzwitola. Sa ikokobo, umu nnda ngaasishandukile ku nzi.

³²Kumbulani nkadzi wa Lote.

³³Iye unogwisa tjengeta butjilo gugwe, gonlashikila, koga unopa Ndzimu kutjengeta butjilo gugwe, gombuyila.

³⁴Ndomubudza nditi, mu busiku igogo babili banowobe bali lele mu bulalo gung'ompela, koga mmwe unowotogwa mmwe kasiyiwa.

³⁵Bakadzi babili banowobe bekwiya zojiwa bose; mmwe unowotogwa mmwe kasiyiwa.”[9]

³⁷Bakabhuzwa bakati, “Ngayi She?” Kadabila eti, “Pana itumbu magola anokubunganapo.”