Read Kalanga Luke 18 Bible Online

Luke 18 - Kalanga bible

Luke 18

¹Kudwa ipapo Jesu kabudza badiyiwa babe tjifaniso, kubalakidza kuti bakafanila bagale betembezela basinganyalemoyo.

²Kati, “Mu mmwe nzi kwakabe kuna nsumikilisi wakabe asingatje Ndzimu, kakale asina hanya ne nthu.

³Ngono mu nzi iwoyo, kukabe kuna tjilikadzi yakabe igala izha kunli i kumbila, iti, ‘Hwililani tjililo tjangu, mundigwile mu tjita tjangu.’

⁴Ngono kalamba kwe tjibakana. Koga shule kazwidwa kati, ‘Nenguba ndisingatje Ndzimu, kakale ndisina hanya ne nthu,

⁵koga se tjilikadzi iyeyi igala izha enditshonyonga, ndoyigwila mu tjita tjayo!’ ”

⁶Ngono She kati, “Hwililani tjinolebgwa nge nsumikilisi usakalulwama.

⁷Ngono apa Ndzimu autowogwila bashalugwa bawo banolilila kuuli siku ne sikati kene? Apa ungabanonokela kene?

⁸Ndomubudza nditi, unowobagwila nge kulibilidza. Koga apa Nkololo we nthu ezha, unowowana kugalamoyo kuliyapo mu shango kene?”

⁹Ku bamwe bakabe begalabgwe kuti ibo balulwami, ngono belingila bamwe pasi, Jesu wakaleba tjifaniso etji,

¹⁰“Balume babili bakatathila ku Ng'umba ye Ndzimu kunotembezela, mmwe wabo ali Nfarasi, mmwe ali nkhethisi.

¹¹“Nfarasi kamilika, kazwitembezelela eti, ‘Ndzimu, ndomubokela kuti anditonga bamwe bathu, batoleli ne babi ne phombgwe kene sa iwoyu nkhethisi.

¹²Ndozwinyima zojiwa kabili nge tshipi, apa tjebugumi muna zose zwandinowana.’

¹³“Nkhethisi kama thambgwana, kasitongo linga na iko pezhugwi, koga kazwibona nladu kati, ‘Ndzimu, mundihwile ngoni imi ntjinyi.’

¹⁴Ndomubudza kuti iwoyu nlume we nkhethisi wakayenda ku nzi uwe alulwamisiwa nge Ndzimu, isi Nfarasi; ngobe, iye unozwikudza unowoyisiwa pasi, na iye unozwiyisa pasi unowokudziwa.”

¹⁵Bakabe bezhisa bo bana batukununu kuna Jesu, kuti ababige maboko. Badiyiwa bakati bebona ikoku bakabatjemela.

¹⁶Koga Jesu kabadanila kunli kati, “Letjani bana bazhe kundili, musibadzibile, ngobe bushe gwe Ndzimu nge gwe bakajali.

¹⁷Ndolebesa ndoti kumuli, iye usingaamutjile bushe gwe Ndzimu se mwana, aatowongina muguli.”

¹⁸Mmwe nkulu kambhuzwa kati, “N'diyi wakalulwama, ndingashingani kuti ndiwane butjilo gusingapele?”

¹⁹Jesu kadabila kati, “Ini undidana wakalulwama? Akuna wakalulwama kuzhe kwe Ndzimu woga.

²⁰Unoziba milayo inoti, ‘Usithame bupombgwe, usibulaye, usikwibe, usipe butendeki gwe manyepkhwa, kudza tate babo na mmeyabo.’ ”

²¹Kati, “Kose ikoku ndakakulondolodza kudwila mu butjetjana gwangu.”

²²Kukati Jesu ehwa ikoku kati kunli, “Utjasheta tjithu tjing'ompela. Tengesa kose kwaunako ukobele bashayi, ndizo unowobe ne fumwa kudzimu. Shule kwa ipapo uzhe unditobele.”

²³Kati ehwa ikoku kangina buyendasi, ngobe wakabe akafuma kwazo.

²⁴Jesu kanlinga ngono kati, “Kwakasima seni, kuti bana fumwa bangine mu bushe gwe Ndzimu!

²⁵Kulelu kuti kamela ingine nge buli le lunji, pakuti nfumi angine mu bushe gwe Ndzimu.”

²⁶Ibabo bakahwa ikoku, bakabhuzwa beti, “Ndiani ngono ungatjidziwa?”

²⁷Jesu kadabila eti, “Tjisingatubuke mu bathu tjotubuka mu Ndzimu.”

²⁸Pita kati kunli, “Bonani, takasiya mizi yedu kumutobela.”

²⁹Jesu kati ku bali, “Ndolebesa nditi, akuna iye wakasiya nzi uwe, kene nkadzi uwe kene bana ba tate babe, kene bazwadzi babe, kene bana babe ngekwe bushe gwe Ndzimu,

³⁰usingawoamutjila kunjinji kupinda zwaakasiya, mu tjibaka tjino ne butjilo gusingapele mu misi inozha.”

³¹Jesu katolela ntome bali gumi lina babili kabadwa kati, “Bonani, totathila ku Jerusalema, kunowoti matama wose akalebgwa nge balebesambeli ngekwe Nkololo we Nthu, akashingikala.

³²Unolongwa mu maboko abe Zwitjaba. Banowon'dadila, bakantuka, bakanthwila mate,

³³bakanloba, ngono bakambulaya. Mu zhuba le butatu unowomuka kakale.”

³⁴Badiyiwa bakasihwisise ikoku kose. Tjeneso yako yakabe yakasumbikika ku bali, ndizo bakasizibe tjaakabe eleba nge kwatjo.

³⁵Kukati Jesu apejo ne Jerikho, nlume we bhofu kabe ali gele pa hwunde ye zila e kumbila.

³⁶Kati ehwa mbunga we bathu upinda, kabhuzwa kuti koshingikalani.

³⁷Bakambudza kuti, “Jesu we Nazareta unopinda.”

³⁸Kamimila kati, “Jesu, Nkololo wa Dafite, mundihwile ngoni!”

³⁹Ibabo bakabe bali mbeli bakantjemela bakati anyalale, koga kamimila kwazo eti, “Nkololo wa Dafite, mundihwile ngoni!”

⁴⁰Jesu kama, kati nlume iwoyo azhisiwe kunli. Kati abe pejo, Jesu kambhuzwa kati,

⁴¹“Unoshaka kuti ndikuyitileni kene?” Kadabila eti, “She, ndoshaka kuti ndipofunuke.”

⁴²Jesu kati kunli, “Pofunuka! Kugalamoyo kuko kwakupodza.”

⁴³Tjinyolotjo kapofunuka, ngono katobela Jesu ekudza Ndzimu. Kukati bathu bose bebona ikoku, na ibobo bakakudza Ndzimu.