Read Kalanga Luke 19 Bible Online

Luke 19 - Kalanga bible

Luke 19

¹Ngono Jesu kangina mu nzi we Jerikho kaupalama.

²Ipapo kwakabe kuna nlume unoyi Zakhayosi, ali nkhethisi nkulu, kakale akafuma.

³Wakabe eyemula kubona kuti Jesu ndiani, koga nge bufupi gugwe, kasitubule, ngobe esitigwa nge mbunga we bathu wakabe uli ipapo.

⁴Ndizo Zakhayosi kalabukila mbeli, kanotatha nkuyu, kuti abone Jesu ngobe wakabe enopinda ndi ipapo.

⁵Kukati Jesu eswika pa nti iwoyo kalinga pezhugwi ngono kati kuna Zakhayosi, “Zakhayosi, deluka ulibilidza, nasi ndi mwezi uwo.”

⁶Zakhayosi kadeluka elibilidza, kaamutjila Jesu nge kushatha kukulu.

⁷Bathu bakati bebona, bakang'ong'ola beti, “Wayenda kunobe mwezi we ntjinyi.”

⁸Zakhayosi kamilika kati kuna She Jesu, “Bonani She, ndotola ntome kwe thundu yangu ngwenu ndikobela bashayi. Kene kuna wandakatjebela, ndombuzila kanna kwe tjimwe ne tjimwe tjandakantolela.”

⁹Jesu kati kunli, “Nasi jidzo laswika mu nzi iwoyu, ngobe naiyebo, u nkololo wa Abhurahama.

¹⁰Ngobe Nkololo we Nthu wakazhila kuwoshaka ne kutjidza bakalashika.”

¹¹Kukati batjakahwilila zwithu izwezwi, Jesu kadwilila ebabudza tjifaniso, ngobe se akabe ali pejo nge Jerusalema bathu bakabe bekumbula kuti bushe gwe kudzimu gowoswika tjinyolotjo.

¹²Ndizo kati, “Mmwe nlume wakabe ali nkugwana abe pejo ngoyenda ku shango ikule kule kunopiwa bushe ekowobgwilila ku shango ya kanyi kwabo.

¹³Kadana balanda babe bali gumi kabapa maloso e golide[10] ali gumi, kati ku bali, ‘Zwadzani maloso iyawa kudzina ndizha.’

¹⁴Koga bathu be shango iye bakabe bebenga, ndizo bakatuma bathu shule kukwe beti, ‘Atitoshaka kuti nlume iwoyu atibuse.’

¹⁵“Kati ebuya asinoamutjila bushe, kadana balanda ibaba baakapa maloso eshaka ziba sekwa bakaazwadza.

¹⁶We kutanga kazha kati, ‘Tetshi, maloso enyu e golide akazwala mamwe maloso e golide ali gumi.’

¹⁷Mambo kati kunli, ‘Kubuyanana, nlanda wakalulwama. Ngobe unogagwabgwe mu zwithu zwitukununu. Unowobe ne simba pezhugwi kwe mizi ili gumi.’

¹⁸We bubili kazha kati, ‘Tetshi maloso enyu e golide akazwala mamwe maloso e golide ali mashanu.’

¹⁹Mambo kati kunli, ‘Nawebo, ibe ne simba pezhugwi kwe mizi ili mishanu.’

²⁰“Mmwe nlanda kazha kati, ‘Tetshi, bonani, loso lenyu le golide eli. Ndakalipetela nge jila, ali biganya.

²¹Ngekuti ndakabe nditja imwi, ngobe muli nlume nkukutu. Motola pamusakabiga, mukavuna pamusakadzwala.’

²²Mambo uwe kadabila eti, ‘Ndowokusumikilisa nge matama awo, nlanda mbi ndiwe. Wakabe uzibazo kuti ndi nlume nkukutu, ndotola pandisakabiga, avuna pandisakadzwala.

²³Ini ngono usakabiga maloso angu mu dula le mari, kuti nditi ndibuya ndiatole azwala?’

²⁴“Kati kuna ibabo bamile ipapo, ‘Muntolele maloso awe e golide, muape iwoyu una ali gumi.’

²⁵Ngono bakati kunli, ‘She, una mamwe ali gumi kale!’

²⁶Mambo kadabila eti, ‘Ndomubudza nditi, iye una tjaanatjo unowopaphidzigwa, koga iye usina ne tjitukununu tjaanatjo unowotjitolegwa.

²⁷Koga izwezo zwita zwangu zwakabe zwisingashake kuti ndizwibuse, muzwizhise ngeno muzwibulaye mbeli kwangu.’ ”

²⁸Ngono kukati Jesu aleba ikoku, kadwilila mbeli etathila ku Jerusalema.

²⁹Kati esedzela ku Bhetifage ne Bhetani pa dombo linodang'wa Dombo le Mitoba, katuma babili be badiyiwa babe eti ku bali,

³⁰“Yendani ku nzi umbeli kwenyu, mowoti mungina muuli, mowowana donkana yakasungiligwa ipapo, isina wakatongo itatha. Muisunungule muizhise ngeno.

³¹Ha mmwe emubhuzwa eti, ‘Moisunungulilani?’ Mun'dwe muti, ‘She banoishaka.’ ”

³²Ndizo ibabo bakabe batumwa bakayenda, bakawana kwakajalo sekwa ababudza.

³³Ngono bakati batjasunungula donkana, beni bayo bakati, “Ini musunungula donkana iyeyi?”

³⁴Bakadabila beti, “She banoishaka.”

³⁵Bakaizhisa kuna Jesu, bakawala hazu dzabo pezhugwi kwe donkana, bakatathisa Jesu mu donkana.

³⁶Kukati eyenda akatatha donkana, bathu bakawala hazu dzabo mu zila.

³⁷Kati eswika pejo ne pathu zila painokunguluka mu hwunde ne Dombo le Mitoba, mbunga wose we badiyiwa ukatangisa kupululudza bakashatha ne kukudza Ndzimu nge mahwi apezhugwi ngekwe mishingo yose inotjenamisa yabakabe babona beti,

³⁸“Kwakakombolegwa iye mambo unozha mu zina la She! Ngakube ne kunyalala kudzimu, gudzo alibe pezhugwi zhugwi!”

³⁹Bamwe Bafarasi pakati kwe mbunga bakati kuna Jesu, “N'diyi, tjemela badiyiwa babo!”

⁴⁰Jesu kadabila eti, “Ndomubudza nditi, nenguba banganyalala, mabgwe iwo nge kwawo anowomimila.”

⁴¹Jesu kati esedzelela nzi we Jerusalema eubona kaulilila,

⁴²kabe eti, “Dzene nasi wabe uziba zwithu zwingakuzhisila kunyalala! Koga ngwenu wazwisumbikigwa.

⁴³Ngobe misi inowokuzhila inowoti zwita zwizo zwikathama matathilo pa bhakasa lilo zwikupoteleka, kakale zwikukombeledza.

⁴⁴Zowokupkhwanyila pasi, iwe ne bana bamukuli. Akuna bgwe lazwinowosiya lakatiliyana ne limwe mukuli, ngobe auzoziba nsi we kumbiwa kuko.”

⁴⁵Kudwapo kangina mu Ng'umba ye Ndzimu, katangisa kutatila kuzhe bakabe betengesa.

⁴⁶Kabadwa kati, “Kwakakwagwa kuyi, ‘Ng'umba yangu inowobe ng'umba ye ntembezelo,’ koga imwi maithama guwu le batoleli.”

⁴⁷Wakabe ediya mazhuba wose mu Ng'umba ye Ndzimu. Bapirisiti* bakulu ne badiyi be nlayo ne batungamili be bathu bakabe begwisa kumbulaya.

⁴⁸Koga abazowana zila yabangakushinga ndiyo, ngobe bathu bakabe beteedza kwazo matama awe.