Read Kalanga Luke 2 Bible Online

Luke 2 - Kalanga bible

Luke 2

¹Kwakati mu misi iyeyo, Kaisara Agusito, kadusa nlayo unoti, mazina e bathu mu shango yose ye Roma akwagwe.

²Kukwagwa ikoku, kwakabe kuli kwe kutanga kuthamiwa, Kwiriniyo ali nlauli we Siriya.

³Ngono mmwe ne mmwe kayenda kanyi kwabo kunozwikwalisa.

⁴Josefa na iye kabhuda mu Galili mu nzi we Nazareta, kayenda ku Judiya ku nzi wa Dafite unodang'wa Bhetelehema, ngobe wakabe ali we nsha wa Dafite.

⁵Kayenda ikoko kunozwikwalisa na Mariya waakabe abiganyidzila ndobolo. Mariya wakabe akuligwa.

⁶Kukati batji ikoko, tjibaka tjikazha tjekuti mwana azwagwe,

⁷ngono katshibama mbano iye ye tjilisana. Kampetela nge matyila ngono kankushika mu n'goro, ngobe kusina bugalo mu ng'umba ye bezi.

⁸Kwakabe kuna balisi mu ntuthu iwoyo, begala mu shango bakalisa pkhwizi dzabo busiku.

⁹Ntumwa wa She kaboneka ku bali ne tjedza tja She tjikapenya kubapoteleka, ndizo bakatja.

¹⁰Koga ntumwa we kudzimu kati ku bali, “Musitje! Ngobe bonani, ndamuzhisila ndebo mbuya ye kushatha kukulu, kunowozha mu bathu bose.

¹¹Nasi mu nzi wa Dafite, mazwaligwa Ntjidzi, Kirisiti ali She.

¹²Tjilakidzo kumuli tjowobe etji, mowowana mwana akapetegwa nge matyila ali lele mu n'goro.”

¹³Tjinyolotjo kwakaboneka ntumwa we kudzimu ana bunji gwe goko le kudzimu bekudza Ndzimu beti,

¹⁴“Gudzo ngalibe ku Ndzimu Upezhugwi zhugwi kudzimu, ne mu shango ngakubepo kunyalala mu bathu banoushathisa.”

¹⁵Kukati batumwa be kudzimu batjibgwilila kudzimu, balisi bakalebesana beti, “Ngatiyendeni ku Bhetelehema tinobona tjithu itjetji tjashingikala, tjatalakidziwa ndi She.”

¹⁶Ndizo bakalibilidza bakayenda, bakawana Mariya na Josefa ne mwana ali lele mu n'goro.

¹⁷Bakati bambona, bakaleba sekwa bababudziwa ngekwe mwana iwoyu.

¹⁸Bose bakahwa bakatjenamila tjalebwa nge balisi.

¹⁹Koga Mariya kalondolodza zwithu izwezwi zose, kazwikumbula mu moyo uwe.

²⁰Balisi bakabgwilila, bekudza Ndzimu beulumbidza mu zwithu zose zwabakabe bahwa ne zwabakabe babona ngobe zwakabe zwili sekwa bakabe babudziwa.

²¹Mu zhuba le buzhanakadzi, kukabe kwabe tjibaka tjekuti athumbigwe, ngono katumigwa zina kuyi Jesu, zina laakapiwa nge ntumwa we kudzimu mmeyabe basathu bakazwisenga.

²²Kukati tjibaka tje kutjenepadza kuyendidzana nge nlayo wa Mushe tjazha, Josefa na Mariya bakayisa Jesu ku Jerusalema kumpa She Ndzimu

²³sekwa kwakakwagwa mu nlayo wa She kuyi, “Mbano imwe ne imwe ye mbisana inowobigigwa ntome kuti ibe mwana wa She,”

²⁴kakale bakabe benolondolodza tjimu nlayo wa She nge kudusa tjibhayilo, “Njiba mbili kene ngurukukwana mbili.”

²⁵Kwakabe kuna mmwe nlume mu Jerusalema edang'wa kuyi Simiyoni. Wakabe akalulwama mu mesho e Ndzimu akazwipa nge buzhalo. Wakabe akalindila Ndzimu kubhatsha Iziraela ne Meya yakayengemala yakabe ili munli.

²⁶Wakabe azumbunuligwa nge Meya yakayengemala kuti aangafe asathu kabona Kirisiti wa She.

²⁷Meya yakayengemala ikathama kuti Simiyoni angine mu ng'umba ye Ndzimu. Kukati bazwadzi bazhisa mwana wabo Jesu kuwonthamila tjinoshakwa nge nlayo,

²⁸Simiyoni kamfukata nge maboko awe, ngono kakudza Ndzimu eti,

²⁹“She, sekwa makagadzabgwe, ngwenu tjiletjani nlanda wenyu eyizele nge mbakiso.

³⁰Ngobe mesho angu abona jidzo lenyu,

³¹lamakathama mbeli kwe bathu bose.

³²Tjedza tje zumbunulo kuna be zwitjaba, ne tjilumbi tje bathu benyu Iziraela.”

³³Tate na mme be mwana bakatjenamisiwa nge tjinolebgwa nge kukwe.

³⁴Ipapo Simiyoni kabakombolela, ngono kati kuna Mariya mmeyabe, “Mwana iwoyu wakabigigwa kuwa ne kumuka kwe banji mu Iziraela ne kube tjilakidzo tjinowonyanyayidziwa.

³⁵Ngono unowohwa zogwadza ukanga nthu wabhayiwa nge thumo kuti ndizo Ndzimu uzumbunule tjinokumbugwa ne mmwe ne mmwe.”

³⁶Kwakabe kuli yapo nlebesambeli we tjikadzi edang'wa Anna, ali nkololokadzi wa Fanuele, we ludzi gwa Asheri. Wakabe akakwegula kwazo. Wakatjila ne nlume uwe makole ali kutendeka shule kwe ndobolo yabo, nlume uwe kabe efa.

³⁷Ngono ipapo kabe tjilikadzi kuswikila ana makole ali makumi ali zhanakadzi ana makole manna. Wakabe asingabhude mu Ng'umba ye Ndzimu, koga enamata Ndzimu siku ne sikati, ezwinyima zojiwa, etembezela.

³⁸Kazha ku bali tjibaka itjetjo, kaboka Ndzimu kalebeleka ngekwe mwana kuna bose bakabe bakalindila kusunungugwa kwe Jerusalema.

³⁹Kukati Josefa na Mariya bapedza zose zwinoshakwa nge nlayo wa She, bakabgwilila ku nzi wa kanyi kwabo we Nazareta mu ntuthu we Galili.

⁴⁰Ndizo mwana kakula kasima kakale akatjenjela kwazo ne Ndzimu un'da.

⁴¹Gole ne gole bazwadzi ba Jesu bakabe beyenda ku Jerusalema ku Nzano we Kupinda pezhugwi.

⁴²Kukati ana makole ali gumi lina makole mabili, bakayenda ku nshingo se wolobela kwabo.

⁴³Kukati nshingo wapela bebgwilila kanyi, mbisana Jesu kasala mu Jerusalema, koga bazwadzi babe bakasizibe ikoku.

⁴⁴Bakayenda gwendo gwe zhuba lose bekumbula kuti umuna ibabo babanoyenda nabo. Bakatangisa kunshaka mu makamu abo ne mu bazwalani babo.

⁴⁵Bakati bansheta bakabgwilila ku Jerusalema kunshaka.

⁴⁶Shule kwe mazhuba matatu bakan'wana mu Ng'umba ye Ndzimu ali gele pakati kwe badiyi be nlayo, akabahwilila kakale ebabhuzwa dzibhuzo.

⁴⁷Bose bakahwa bakatjenamila kuhwisisa kukwe nenge dabilo dzidze.

⁴⁸Kukati bazwadzi babe bembona bakakaabala. Mmeyabe bakati kunli, “Mwanangu, ini watibhata uyijali! Bona, tabe tikushaka na tate babo, tidziyidzika mu meya.”

⁴⁹Kababhuzwa kati, “Ini mabe mundishaka? Amuzobe muziba kuti ndakafanila kube mu ng'umba ya Tate bangu kene?”

⁵⁰Koga bakasihwisise ndebo yaaleba ebabudza.

⁵¹Shule kwa ikoko kayenda nabo ku Nazareta, ngono ebateta. Koga mmeyabe bakalondolodza zwithu izwezwi zose mu moyo wabo.

⁵²Jesu kakula akatjenjela kwazo, ediwa nge Ndzimu nenge bathu.