Read Kalanga Luke 20 Bible Online

Luke 20 - Kalanga bible

Luke 20

¹Limwe zhuba Jesu kati ediya bathu mu Ng'umba ye Ndzimu esumikila ndebo mbuya, bapirisiti bakulu ne badiyi be nlayo ne bakulu be Bajuta bakazha kunli,

²bakati, “Utibudze kuti unoshinga zwithu izwezwi nge simba lipi ndiani wakakupa simba ileli?”

³Kadabila eti, “Ndowomubhuzwabo bhuzo ing'ompela. Mundibudze,

⁴kudubika kwa Johani kwakadwa kudzimu kene mu bathu?”

⁵Bakalebeleka tje kwabo beti, “Ha tingati, ‘Kwakadwa kudzimu,’ unowoti, ‘Ini musakan'galamoyo munli?’

⁶Koga ha tingati, ‘Kwakadwa mu bathu,’ bathu banowotikikithidza nge mabgwe, ngobe bose banogalamoyo kuti Johani wakabe ali nlebesambeli.”

⁷Ndizo bakashandula beti, abatoziba kwakwakadwa.

⁸Jesu kati ku bali, “Namibo andingamubudze kuti zwithu izwezwi ndozwishinga nge simba lipi.”

⁹Jesu katangisa budza bathu tjifaniso etji, eti, “Mmwe nlume wakalima nnda we mizhambi. Kauhirisa ku bamwe balimi, ngono iye kayenda ku imwe shango tjibaka tjilefu.

¹⁰Kukati tjibaka tje zhambi tjiswika, katuma nlanda ku bahiri be nnda uwe kuti bampe mimwe mitjelo ye zhambi. Koga bahiri be nnda bakanloba bakantata kayenda akalembedza maboko.

¹¹Mweni we nnda katuma nlanda we bubili ngono na iyebo bakanloba bakambhatisa shoni, bakantata kayendabo akalembedza maboko.

¹²Katuma we butatu, na iyebo bakanloba bakandusa mbonje bakanlashila kuzhe.

¹³Ipapo mweni we nnda we mizhambi wakati, ‘Ndowotini kene? Ndowotuma nkololo wangu, wandinoda, pamwe banowonteta.’

¹⁴Koga kukati bahiri be nnda bembona, bakalangana beti, ‘Oyu ndiye n'gali thaka. Ngatimbulayeni, kuti ndizo thaka ibe yedu!’

¹⁵Bakamposela kuzhe kwe nnda we mizhambi bakambulaya. “Ngono mweni we nnda we mizhambi unowobatini kene?

¹⁶Unowozha kalobesa bahiri ibabo, ngono unowohirisa nnda iwoyo we mizhambi kuna bapoga.” Kukati bathu behwa ikoku bakati, “Ikoku akungashingikale!”

¹⁷Jesu kabalingisisa, kababhuzwa kati, “Ngono kodwani ikoku kwakakwagwa kuyi “ ‘Bgwe lakalambiwa nge babaki ndilo lakabe bgwe linotambunudza mbako?’

¹⁸“Iye unowila pezhugwi kwe bgwe ilelo, unowovunikana kasala ali zwitibhutibhu, koga ha liwila nthu lowompkhwanya.”

¹⁹Badiyi be nlayo ne bapirisiti bakulu bakagwisa kumbhata ipapo, ngobe beziba kuti wabe elebeleka nge kwabo mu tjifaniso itjetji. Koga bakabe betja bathu.

²⁰Ndizo bankanlalila ngono bakatuma shodzi dzakabe dzizwithama bathu bana malebeswa. Bakabe bekumbula kuti banowombhatshila muna tjaangaleba, kuti ndizo ban'yise ku nlayo ne mu simba le nlauli.

²¹Ngono shodzi dzakambhuzwa dziti, “N'diyi, toziba kuti moleba kakale mukadiya tjakalulwama amutoshalaula, koga modiya zila ye Ndzimu nge malebeswa.

²²Apa kumu nlayo kene, kuti tilipe lukhetho kuna Kaisara Mambo we Roma kene aa?”

²³Jesu kaziba bupitipiti gwabo ngono kati,

²⁴“Mundilakidze loso ling'ompela. Tjifano tjaani itjetji, kakale kwakakwagwa nge kwaani mulili?” Bakashandula beti, “Nge zwa Kaisara.”

²⁵Kati ku bali, “Ndizo ipani Kaisara zwithu zwizwe, ngono mupe Ndzimu zwawo.”

²⁶Bakasitubule kumbhatshila nge matama pakati kwe bathu. Kakale nge kutjenamisiwa nge dabilo dzidze, bakanyalala.

²⁷Ipapo Basadusi bamwe, ibo banoti akuna kumuka kwe bafi, bakazha kunli nge bhuzo,

²⁸beti, “N'diyi, Mushe wakati kwalila eti, ‘Ha nlume efa esiya nkadzi asina bana, nnung'una uwe ngaan'gale thaka, athamile nkulu uwe bana.’

²⁹Kwakabe kuna thobeledzani dze balisana dzili kutendeka, ngono hwola yabo ikalobola, koga ikafa isina bana.

³⁰Ipapo thobeledzo iye ikan'gala thaka, ngono ikafabo isina bana.

³¹We butatu katolabo tjilikadzi iyeyo ngono nge zila iyeyo, bose bali kutendeka bakafa basina bana.

³²Bhelelo nkadzi kafabo.

³³Ndizo ngwenu, mu kumuka kwe bafi, unowobe nkadzi waani muna bose bali kutendeka bakanlobola?”

³⁴Jesu kabashandula eti, “Bathu be misi ino banolobola bakalobodziwa.

³⁵Koga ibabo banowobe bakalizana kungina mu nsi ihwoyo we kumuka mu bafi, abatowolobola kene kuli kulobodziwa,

³⁶Ngoti abangatjafe, ngobe banolizana ne batumwa be kudzimu kakale bana be Ndzimu, ngoti bali bana be kumuka mu bafi.

³⁷Mushe na iye unotjenesa mu ndebo ye denje linotshwa, kuti bafi banowomusigwa mu butjilo. Unoleba ngekwa She eti ndibo, ‘Ndzimu wa Abhurahama, Ndzimu wa Isaki ne Ndzimu wa Jakubo.’

³⁸Ndizo ate uli Ndzimu we bafi, koga nge we batjili, ngobe bose banoutjilila.”

³⁹Bamwe badiyi be nlayo bakadabila beti, “Maleba zubuyanana, n'diyi!”

⁴⁰Ngono bakasitjabhuzwe bhuzo dzimwe kakale.

⁴¹Ipapo Jesu kati ku bali, “Banodwatjini ha beti Mesiya nkololo wa Dafite?

⁴²Ngobe Dafite nge kukwe mu lukwalo gwe Njimbo unoti, “ ‘She bakati kuna She wangu, Gala ku luboko gwangu gwe luji,

⁴³kudzina ndithama zwita zwizo tjigalo tjaunobiga makumbo awo.’

⁴⁴“Dafite unondana eti, ‘She.’ Ngono ungabe nkololo uwe tjini kene?”

⁴⁵Kukati bathu bose bakahwilila, Jesu kati ku badiyiwa babe,

⁴⁶“Tjenjelelani badiyi be nlayo. Banoda yenda bakaambala hazu dze makubakuba, beda kudumiliswa pakati kwe bathu ne kugala mu zwigalo zwi pezhugwi mu ng'umba dze mitembezelo ne magalo a hwunde ne nkoki mu mizano ye zojiwa.

⁴⁷Banotjebela tjilikadzi nge kudzitolela thundu dzadzo, bakayita mashungwa ndibong'we nge mitembezelo milefu. Bathu bakajali banowolobgwa shamu inogwadza kwazo.”